Emiel Beijk van Staotsbosbeheer kreeg de ni’je routegidsen uut hanen van Geert Lantinga (links) en Jan Koops (rechts). Foto: Lieuwkje Cnossen
Naodat eerder de routegidsen De buurtschappen van Oosterwoolde, Wandelen rond Wolvega en Taalfietstocht rond Berkoop deur de Stellingwarver Schrieversronte uutgeven wodden, verschenen oflopen donderdag in pannekoekhuus ‘De Oude Hof’ in Appelsche de routegids Fietsen in en om Appelscha (deur Jan Koops uut Oosterwoolde) en de al even mooie kuier Langs oolde en ni’je Hooltpaeden (deur Geert Lantinga van Wolvege). Vanwegens de jaorenlange goeie baand tussen de Stellingwarver Schrieversronte en Staotsbosbeheer wodden de eerste twie exemplaoren uutrikt an Emiel Beijk van SBB. Schrieversronte-direkteur Sietske Bloemhoff prees in heur toespraoke de altied grote bereidwillighied van Staotsbosbeheer om an veul aktiviteiten van de Schrieversronte mit te warken. ‘Dat gelt niet alliend angaonde de hulpe en goeie raod an oonze routegidsen, mar ok bi’j et orgeniseren van biezundere exkursies en d’r was bi’jglieks financiële steun veur ’Et Stellingwarver Voegelboek’. Ok de toestemming in 2009 veur et orgeniseren van Stellingwarfpop bi’j de Spoekeplasse in Noordwoolde was vanzels meraokels mooi en daor weren we slim wies mit,’ zo zee Bloemhoff. Kotleden verzorgde de heer Beijk butendat een belangriek diel van de kursus Laandschopsgeschiedenis: ‘We hopen vanzels dat we ok bi’j de eerstvolgende kursus weer een beroep op jow doen kunnen.’ Vlak veur et uutrikken van de gidsen verzorgden Koops en Lantinga een film- en fotorippertage van de beide routes.
Fietsen in en om Appelsche komt deur historisch interessaante dörpsgebieden van Appelsche, mar gaot ok deur et Fochtelervene, deur Veenhuzen en de Kaele Dunen. De routegids geft behalven de route (60 km, mit inkotmeugelikheden) ok veul infermaosie over de gebieden daor aj’ al fietsende langes kommen en is veurzien van prachtige foto’s en een routekaorte.
Langs oolde en ni’je hooltpaeden gaot langs (bos)paeden van Hooltpae en Ni’jhooltpae en komt langs plakken daor aj’ gewoonlik niet zo gauw kommen zullen. In de gids vertelt Lantinga over de slim interessaante historie van et gebied, mar het ok ommedaenken veur de netuur.
Et doel is dat in 2015 opni’j twie gidsen uutgeven wodden, en in 2016 alderdeegst drieje. In die serie van drieje wo’n routes beschreven langs en in de naoste omgeving van de revier De Lende. Alle routegidsen bin Nederlaanstaelig.