Anvieteringspries veur Attie Nijboer

Attie, 29-01-15

Attie Nijboer (foto: Lenus v.d. Broek)

Op 29 jannewaori wodde in Wolvege de Stellingwarver Veurleeswedstried holen. Dat is een verni’jde anvieteringspries veur et gebruuk van et Stellingwarfs, die insteld is deur de beide Stellingwarver gemienten. De orgenisaosie van de wedstried was in hanen van de biebeltheken. Bi’j de kiender gong de eerste pries naor Annemieke Jager uut Berkoop, bi’j de volwassenen was de eerste pries veur Christine Mulder van Wolvege.

D’r wodde ok een anvieterinspries uutrikt, die pries was veur Attie Nijboer uut Oosterwoolde . Zi’j dreug heur gedicht ‘Ik bin Charlie’ veur; Attie schreef dat oflopen 14 jannewaori:

Ik bin gien moslima

Geleuf niet in god

Gao niet op mijn kni’jen

Bepaol mien eigen lot.

 

Ik stried op mien eigen menier

Verschoel mi’j niet aachter een sluier of masker,

Gao mit een eupen vizier

Drief mit gieniene de spot.

 

Vecht zonder koegels, zonder geweld

Veur een rechtveerdige wereld

Waorin vri’j daenken en schrieven

en een meenskeleven nog telt.

 

Waorin liefde en verdreegzemhied tegere blieven

Wi’j mekaander niet daelemi’jen

mar de helpende haand rieken

Waorin de Biebel en de Koran oons verbint, niet beknot.

 

Mar nog hieltied dot blieken liggen leven en laoten leven

Zo veer uut mekere as dag en naacht

Drokt et geweld oons op ‘e bost

Kleeft de dood an een potlood

‘Qui vivre  vera’ in ien keer ontkracht.

 

Kost wat et kost zullen wi’j niet boegen

Oonze principes niet laoten vermoegen

Vive la liberté, egalité, fraternité

Charlie Hebdo kuj’ oons vergeven?

 

Attie Nijboer schrift al langer in et Stellingwarfs. Zo is mit riegelmaot wark van heur te lezen in o.e. de Stellingwarver Spreukekelender, et tiedschrift De Ovend en in de kraanterebriek ‘Stellingwarver Zaeken’. Ok schreef ze gedichies veur et boek ‘Gien plak dat mi’j zo trekt. De 13 dörpen van Stellingwarf vroeger’ (Henk Bloemhoff, 2008, SSR 132, ISBN 978 90 6466 160 0)

 

 

Nog meer winterse foto’s!

Ok in Oosterwoolde wodde et an et aende van jannewaori een witte wereld. Onderstaonde foto’s maekte Ype Dijkstra bi’j de vaort an de Nanningeweg:

P1240691 (1)

P1240694 (1)

Meer winterse foto’s!

Van Jaap Elzenaar uut Berkoop kregen we arg mooie winterse foto’s toestuurd. De foto’s bin op 30 jannewaori maekt bi’j De Lende aachter Boshoeve in Ni’jberkoop:

bi'j Lende, 2, 30-1

bi'j Lende 30-1

 

 

Annemieke Jager en Christine Mulder winners veurleeswedstried

29-1-15

Van links naor rechts: Ella Dekker, Mariska Schouten en Allesse Eizinga (Buttinge), Annemieke Jager en Christine Mulder. Aachter Roelov Kuipers, Gerard van Klaveren en Doeke Duursma.  (Foto: Lenus van der Broek).

De eerste ‘Stellingwarver Veurleuspries’ is een sukses wodden. Zeuventien kiender en volwassenen deden 29 jannewaori an de veurleeswedstried mit. Ze bruukten daorveur eigen gedichten en verhaelen in et Stellingwarfs.

De pries is een gemientelike Stellingwarver pries van West- en Oost-Stellingwerf. De gemienten willen d’r op disse wieze graeg an mitwarken dat et Stellingwarfs in ere holen wodt. De orgenisaosie was in hanen van de biebeltheek Zuudoost Frieslaand. Ok de perveensie verstrekte een financiële bi’jdrege. De jury beston uut burgemeester Gerard van Klaveren (veurzitter), Doeke Duursma en Roelov  Kuipers. De aovend wodde prissenteerd deur jeugdbibliothekeresse Klaasje Herder van Oosterwoolde.

In de kattegerie individuele jeugd tot en mit 12 jaor wodde Annemieke Jager uut Berkoop eerste en in de kattegerie volwassenen Christine Mulder van Wolvege. In disse katttegerie kreeg Attie Nijboer (Oosterwoolde) de anmoedigingspries. In de kattegerie schoelen wodde OBS Buttinge van Oosterwoolde eerste. De gedichten wodden veurdreugen deur Mariska Schouten, Ella Dekker en Allesse Eizinga en schreven deur meester Wim Hunneman.

Volgend jaor wodt de Stellingwarver Veurleespries in de bieb van Oosterwoolde holen.

 

 

Winterse wereld

30-1-15,a

 

Foto van de maond: een winterse wereld op de vroege morgen van 30 jannewaori 2015

(Sietske Bloemhoff)