Van de bekende schriefster Lamkje Hof-de Boer uut Berkoop is et volgende verhael
Et verhael was in 1990 te lezen in de Stellingwarver rebriek Op ‘e schostienmaantel van de regionaole kraante ‘Stellingwerf’.
Redaktie
Goeie jaorvergeerdering Stellingwarver Schrieversronte
Et bestuur van de Stellingwarver Schrieversronte kan weerommezien op een goeie jaorvergeerdering die oflopen 16 meie holen wodde. Veuran v.l.n.r: ponghoolder Henk Koelma, Jan Baas en Peter Riksma. Aachter heur v.l.n.r: veurzitter Ype Dijkstra, twiede veurzitter Attie Nijboer, Geke Zanen en siktaoris Fokke Bron.
Et verslag van de vergeerdering is te lezen op www.stellingwarfs.nl. (Foto: Lenus van der Broek)
Dadde pries veur Roely Bakker
Mit et Stellingwarver verhael ‘De oolde stee’ wun Roely Bakker kotleden de dadde pries in een deur de Liwwadder kraante en de Boerderijenstichting Frieslaand instelde verhaelewedstried. Veur de priezen was ok Kees Koopstra van Else nomineerd mit zien verhael ‘Et boereknechien – de stagiair’, mar hi’j vul buten de priezen. Beide Stellingwarver schrievers bin sund jaor en dag aktief mit et Stellingwarfs an de gang, zo warkten beide ok weer mit an de Stellingwarver Spreukekelender veur 2014. Daornaost is Roely Bakker ok aktief veur de kursus Stellingwarfs veur beginners en zet Kees Koopstra him in veur et Kenniscentrum van de Stellingwarver Schrieversronte.
Deur op De oolde stee te klikken kuj’ et verhael van Roely Bakker lezen.
Et verhael van Kees Koopstra kuj’ hier vanzels ok lezen, klik daorveur op Oold en ni’j
Vroeg juninommer van tiedschrift De Ovend
Vroeg vanwegens anbod biezundere dag
Et juninommer van et Stellingwarfs tiedschrift De Ovend wodt halverwege meie al drokt vanwegens een biezunder anbod. Et gaot om et anbod van een biezundere kulturele dag die op zaoterdag 22 juni plakvienen zal in en om Appelsche henne. De dag wodt orgeniseerd deur pannekoekehuus De Oude Hof (an de Boerestreek in Appelsche) i.s.m. de Stellingwarver Schrieversronte. De dag zal in et teken staon van ‘Et Stellingwarver voegelboek’ en begint mit een prachtige powerpoint-prissentaosie van netuurfotograaf Ruurd Jelle van der Leij, auteur Freddie de Vries vertelt tiedens een bustocht over de voegelwereld om Appelsche henne. De Oude Hof zorgt morgens veur heerlike koffie mit wat d’r bi’j, nao ofloop kan iederiene genieten van heerlike pannekoeken, mit ies of koffie daor aachteran. De kosten veur et hiele pergramme, inklusief bustocht en pannekoeken, bin € 35,00 per persoon, anmelden kan tot 10 juni bi’j de Stellingwarver Schrieversronte in Berkoop.
Exkursie naor Diever, Wilhelminaoord en et Holtingerveld op zaoterdag 7 september
G.H. Voerman (foto: archief Drents Museum)
In De Ovend is dit keer o.e. ommedaenken veur misschien wel de bekendste schriever in et Drents, Gerard Nijenhuis, redakteur Jannes Westrerhof zorgde veur een biezunder aorig artikel. Ommedaenken is d’r ok veur de interessaante tentoonstelling ‘Rendierjagers in het Holtingerveld’ die in et Schultehuus in Diever te zien is. Kotleden verscheen ok een boek over dat onderwarp, in De Ovend van april wodde dat al nuumd. Mit naeme ammeteur-archeoloog G.H. Voerman hadde daor veul mit te maeken, hi’j was veural aktief de gemiente Westerveld. Mar ok in de omkrieten van Buil was Voerman aktief, Hans Salverda schrift anslutend over him en dee veur zien artikel extra onderzuuk naor et wark van Voerman. Op zaoterdag 7 september is d’r veur Schrieversronte-leden een exkursie orgeniseerd naor Diever en et Holtingerveld. Ok over die exkursie is vanzels meer te lezen in De Ovend.
In De Ovend is ok weer de rebriek ‘Dot plak dot me wat’ opneumen. Redakteur Jannes Westerhof praotte dit keer mit Suze Sanders van Der Izzerd. Uteraord bin in de ni’je Ovend ok verhaelen en gedichten te lezen, én d’r is ommedaenken veur de ni’jste uutgiften van de Schrieversronte.
Ofscheid: Bundel mit gelegenhiedsteksten veur rouwplechtigheden
Al vaeker was d’r vraoge naor een verzaemeling van teksten in et Stellingwarfs daor gebruuk van maekt wodden kan bi’j o.e. et opstellen van overliedensberichten en rouwplechtigheden. Veul meensken blieken tiedens ingriepende gebeurtenissen as et verlös van een naoste heur graeg te uteren in de eigen tael, de tael die gevuulsmaotig et dichtste bi’j heur staot. Daoromme verscheen op 17 meie de bundel ‘Ofscheid’, mit tal van bruukbere teksten veur o.e. rouwkaorten, adverteensies, de ofscheidplechtighied zels en daankbetugings. Bi’j de mappe daor de bundel in opneumen is bin butendat twie dichtbundels insleuten (Storm in et leven, van Stien van Anne, en De wiend blaost ok wel es aandersomme van Jan Veldhuizen) en de cd Dag, Stellingwarvers van Henk Bloemhoff.
V.l.n.r. Attie Nijboer, Grietje Bosma en Jan Schonewille
Et idee veur de bundel ontston al weer een jaor of wat leden, doe d’r in kotte tied aorig vraoge naor zoks bleek. Schrieversrontemitwarkers Saskia Douma en Sietske Bloemhoff zorgden veur een eerste opzet, die laeter veerder uutwarkt wodden zol deur Grietje Bosma, Attie Nijboer en ds. Jan Schonewille.
Columba van Geldorp zorgde 17 meie veur sfeervolle meziek
De mappe mit de bundel, et boekien en de cd wodde 17 meie deur de Stellingwarver Schrieversronte ommenocht uutdield an meensken die beroepshalve mit overlieden en rouwplechtigheden te maeken hebben. Tiedens de prissentaosie dreug Grietje Bosma-Dijkstra toepasselike gedichten uut eigen wark veur, wiels harpiste/violiste/gitariste Columba van Geldorp veur sfeervolle meziek zorgde. De leiding van disse biezundere middag was in hanen van Attie Nijboer, zi’j is vice-veurzitter van de Stellingwarver Schrieversronte.
Uteraord blift de Stellingwarver Schrieversronte ten alle tiede behulpzem bi’j et opstellen of vertaelen van persoonlike teksten as daor verlet van is, ok aovens of in et weekaende!
Foto’s: Lenus van der Broek