Redaktie

In Wolvege en Et Vene hebben ze de mooie, oolde postkantoren indertied tegen de vlakte sleugen. In Frederiksoord bin ze een stok verstaandiger west. Daor staot et nog recht overaende en is et een sieraod veur et toch al mooie dörp. Et hiet now van Huygens Huys. Et aorige is dat twie kaemers in et gebouw streektaelnaemen hebben. In De Eetkaemer kuj’ wat drinken en eten. Ze serveren daor lunchgerechten daor biologische streekprodukten in verwarkt binnen. (Foto’s en tekst: Johan Veenstra)

De Diek is ok een gewone, mar mooie Stellingwarver naeme veur een straote in Ni’jvene. Eerder wodde een weg of straote meerstentieds diek nuumd in et Stellingwarfs. De eerste naeme op et bod kuwwe nog niet goed thuusbrengen. Misschien wet iene van de kiekers en lezers van disse serie wat ‘Danninge’ inhoolt. Misschien gaot et om een naeme, mar misschien wodt d’r wel hiel wat eers mit bedoeld! (Foto en gegevens: Hans Salverda)

Op et verkeersomleidingsbod in Ni’jvene staot ok de naeme De Ryge. Vermoedelik wodt mit ‘ryge’ ‘riege’ bedoeld wat dan weer riegel of in et Nederlaans ‘rij’ betekent. (Foto en gegevens: Hans Salverda)

In Ni’jvene hebben in een ni’jbouwwiek nogal wat straoten een Stellingwarver naeme zoas De Veenties. Die naeme zal grif slaon op een oolde veldnaeme in disse buurt. (Foto en gegevens: Hans Salverda)

In een woonwiek in Wolvege, an de oostkaante van et spoor, hebben de straotnaemen Stellingwarver naemen die te maeken hebben mit et netuurgebied Rottige Miente an de westkaante van Wolvege. Een peer eerdere veurbeelden in disse serie: De Foeke (54), De Miete (82) en De Barte (222). En hier dan De Snikke. Een snikke was een boot veur et vervoer van meensken, dieren en bosschoppen. Et peerd kwam in vroeger tieden in de liende veur de snikke. (Foto en tekst: Johan Veenstra)