Redaktie
266. De Olde Stee
Op ‘e Schaopedrift vlakbi’j et Rooie Dörp in Noordwoolde hej’ een gezellige minicamping mit de naeme ‘Schapendrift’. Et huus dat d’r al veul en veul eerder ston – dat bliekt ok wel uut de naeme – hiet ‘De Olde Stee’. Zoas we vaeker in disse serie zien is ‘olde’ mit mar iene o schreven, in plak van twieje, zoas dat in et Stellingwarfs gebrukelik is.
Op Oranje 2: gedicht van Attie Nijboer
Op Oranje 2
Hiel Hollaand kleurt oranje
Vanwegens een ni’je pandemie
Disse gekte kent gien beparking
We hebben et d’r poer drok mit
Somstieden ok slim te kwaod
Straoten, pleinen en grachten
Huzen, winkels en meensken
Et gaot van halem, wi’j gaon los!
As de balle rollen gaot
Kuwwe niet meer waachten
Et virus gript in et ronte
De R(onte) fakter is anstikkelik
Gaot finaol over de kop
D’r is gien holen meer an
We bin ien en al oge en oor
De happies van Cora van Mora
Vliegen de frituurpanne uut
Gaon grif van mond tot mond
Et bier zorgt veur lange meters plezier
En daegenlaank protte vertier
Behalven as oons elftal strukelt
Dan dukelt de besmettingsgraod
Van menuut tot menuut
En is et uut mit de warking
Van al die oranje fleur en franje!
Mar we gaon d’r veur
We lopen niet veuruut
En gaon we wel nat
Dan ligt et niet an oons
Dat is een feit, en simple zat!
We hadden vule meer in oonze masse
We misten niet alliend kaansen
Mar die VARS zien ook gien snas
Of zien et hielendal verkeerd
Wat speulde die tegenstaander gemien!
Attie Nijboer
265. Wi’j warken an een mooi Lendedal
Van Wolly Huinink-van der Veen kregen we disse foto, mit weer een mooie tekst in et Stellingwarfs op een perveensiaol bod. Dit bod staot tot an et aende van dit jaor an de Stienwiekerweg op ‘e hoogte van de Domeinenweg in De Blesse.
Opnaemen voice-over dokementaire Fochtelervene in dörpskantine Ni’jberkoop
Oflopen zaoterdag wodde in de daorveur zo geschikte dörpskantine van Ni’jberkoop de voice-over opneumen t.b.v. een dokementaire over et Fochtelervene. Die dokementaire wodt schreven en regisseerd deur historikus Thomas Rovers uut Grunningen. Hi’j dot dat in opdracht van de Stellingwarver Schrieversronte, die veur dit prachtige projekt een flink subsidiebedrag kreeg van Rabobaank Heerenveen-Zuidoost Friesland.
Links: Sietske Bloemhoff nemt nog even een stokkien tekst deur mit Femmie van Veen. Rechts: Thomas Rovers konterleert tegere mit Robert Lanting een opnaeme in saemenhang mit et beeldmateriaol. (Foto’s: Lenus van der Broek)
Intied bin alle opnaemen klaor; Rovers is now drok in de weer mit et ofronden van de dokementaire. Femmie van Veen (Hooltpae) las oflopen zaoterdag de teksten veur de voice-over in, de filmmeziek is van Robert Lanting uut Arnhem, die ok veur et geluud. De produktie is in hanen van Sietske Bloemhoff (Ni’jberkoop). De dokementaire zal in september prissenteerd wodden.
Ontstaons- en laandschopsgeschiedenis
In de verhaelende dokementaire, die ongeveer een ure duren zal, kommen veul verschillende aspekten an de odder die mit et Fochtelervene te maeken hadden, of nog altied hebben. Hoe ontston et gebied, wie woonden d’r, hoe leefden de meensken mit en op et vene, wat veraanderde d’r deur de jaoren henne.
Veul ommedaenken is d’r veur de ontstaons- en laandschopsgeschiedenis van et gebied. In de film vertellen daor mit naeme dr. Roy van Beek (archeoloog) en promovendus Cindy Quik (fysisch geograaf) over. Beide bin verbunnen an de WUR (Wageningen University & Research), en bin deur laandschopshistorikus drs. Dennis Worst uut Else hierveur benaoderd. Worst, sund een posien warkzem bi’j Landschapsbeheer Friesland in Beetsterzwaog, vertelt zels over de laandschopsgeschiedenis. An de dokementaire warkten o.e. ok Natuurmonumenten (eigener en beheerder van et gebied) mit en streekkenner Otto de Vent van De Fochtel. Ok Jan Oosterkamp van De Fochtel, die een schoffien leden uut de tied raekte, is in de film te zien en te heuren. In et vroege veurjaor van 2020 was Rovers nog op bezuuk bi’j Oosterkamp en maekte doe die opnaemen.
Van oergebied tot van levensbelang
Mit disse briede opzet wil de Stellingwarver Schrieversronte veural zien laoten wat et Fochtelervene deur de ieuwen henne west is: van oergebied tot van levensbelang veur de bewoners, tot et netuurgebied van now. Antrekkelik veur de meensken in de buurt en veur bezukers van heinde en veer.