Aktiviteiten
aktiviteiten
Stellingwarver laandschoppen en netuur in keunstboek
De Stellingwarver Schrieversronte is van doel en geef in de zommer van 2020 een biezunder keunstboek uut. In dat boek zullen ofbelings van wark van keunsteneresse Sybranda Wieringa uut Grunningen opneumen wodden. De uutgifte wodt koppeld an de tentoonstelling van Wieringa zoas die in de maondenn juli en augustus bi’j de Schrieversronte te zien wezen zal. Op et mement is de schilderes al drok in de weer mit heur veurbereidings daorveur. De onderwarpen van heur wark veur de tentoonstelling bin verschillende netuurgebieden en laandschoppen in Oost- en West-Stellingwarf.
Oproep veur verhaelen en gedichten
Al dit wark van Sybranda Wieringa zal opneumen wodden in een biezunder keunstboek. Et boek zal daornaost veurzien wodden van Stellingwarver verhaelen en gedichten die inspireerd binnen op ’e gebieden die Wieringa veur heur tentoonstelling schildert. Daorbi’j gaot et om al bestaonde verhaelen en gedichten, mar de uutgeveri’je van de Schrieversronte wil ok graeg ni’j wark van zoveul meugelik verschillende Stellingwarver schrievers opnemen. Dat daoromme wodt now al vraogd om veur disse uutgifte wark op te sturen. Dat kan tot 1 meie 2020, daornao gaot een speciaole kemmissie an de slag om een keuze te maeken uut et al bestaonde wark en uut et wark dat inzunnen is.
Sybranda Wieringa
Sybranda Wieringa wodde in 1959 geboren in Emmen en volgde in de jaoren 1979-1984 heur opleiding an de keunstakedemie Minerva in Grunningen. Vandaege-de-dag geft ze les an Keunstakedemie Frieslaand. Stellingwarf is veur heur gien onbekend gebied, ze woonde alderdeegst kotte tied in Else. Over heur wieze van warken zegt ze: ‘De intensiteit van de beleving is de motivatie van je keuze voor bepaalde materialen en kleuren. Mijn motivatie is geworteld in een diepe nieuwsgierigheid naar hetgeen er om mij heen is en de vraag waarom het er is. Er ontstaat dan een boeiende wisselwerking tussen mijzelf en het onderwerp dat ik schilder. In die zin zou je kunnen zeggen dat ik mijzelf schilder; niet meer en niet minder.’
Femmie van Veen wint Groot Stellingwarfs Diktee
Femmie van Veen van Hooltpae gong donderdagaovend 21 november mit een dik pakket an boeken op huus an, omreden ze mit mar zeuven fouten et Groot Stellingwarfs Diktee wunnen hadde. An et diktee deden mit mekeer zestien meensken mit.
Mit prachtige meziek van meziekverieninge De Woudklaank wodden de dielnemers, heur anhang en de orgenisaosie welkom hieten in de gezellige foyer van Et Buurthuus in Noordwoolde. Ondaanks et zo mooie ofwisselende pergramme van et körps was d’r toch wel wat spanning onder de dikteegangers te vernemen, zodat dikteeschriever Henk Bloemhoff om goed acht ure vot-en-daolik mit et veurlezen d’r van begon… Behalven et veurlezen van de zinnen was d’r in de zael niks te heuren, op ien biezunder geluud nao dan. Dat was et opvalende geluud van et schrieven, et soms weer deurkrassen, et opni’j schrieven, en mit now en dan tussendeur es een diepe zocht. Om even veur negenen mos iederiene de penne daeleleggen, en zorgde De Woudklaank veur een twiede optreden om de periode van et waachten op de uutslag zo noflik meugelik te maeken.
Nao de meziek leut Henk Bloemhoff op een groot schaarm de tien zinnen van et diktee zien en gaf hier en daor wat uutleg. Et wodde dudelik dat verschillende meensken hier en daor twiefeld hadden an de schriefwieze van een woord en soms dan krek de verkeerde keuze maekten. Flink wat dielnemers hadden mar tussen de tien en twintig fouten, een diel tussen twintig en dattig en sommigen daor nog even boven. Femmie van Veen was liekewel de ienige – mit zeuven fouten – die onder de tiene bleven was. Behalven een certifikaot en een pakket boeken veur heur, hadde de orgeniserende warkgroep Publiciteit van de Stellingwarver Schrieversronte veur alle ere dielnemers ok een certifikaot mit een boek.
As ofsluter van disse biezundere aovend las schriever Freddie de Vries van Hooltpae – hi’j dee ok al es mit sukses mit an een eerder diktee – vier humoristische verhaelen veur uut zien boek ‘Ok et beste peerd stroffelt wel es’.
Nao oflooop van de aovend die blieken dat veul dielnemers toch ommeraek veul plezier beleefd hadden an et mitdoen en gavven an dat ze graeg vaeker zoe’n diktee maeken willen zollen. De Stellingwarver Schrieversronte overweegt dan ok om in 2020 of 2021 opni’j een Groot Stellingwarfs Diktee te orgeniseren.
Van et diktee van oflopen 21 november wodden radio-opnaemen maekt veur et ni’je pergramme ‘In Twielochten’ dat elke vri’jdag tussen 18.00 en 19.00 ure te heuren is op de lekaole omroepen Odrie en West-Stellingwarf Centraol.
Foto’s: Lenus v.d. Broek
Smoek Stellingwarfs Meziekfestival
Smoek, gezellig en kwalitatief een goed meziekfestival, dat was waor de dielnemers en bezukers op weerommekieken kunnen angaonde et Stellingwarfs Meziekfestival. Dat wodde zaoterdagaovend veur de veertiende keer holen, en veur de twiede keer was dat in de Rustende Jaeger van Hooltpae. Zat die zael veurig jaor liekewel stampvol bezukers, dat was spietig genoeg now niet et geval. Dat zal te maeken had hebben mit o.e. de voetbalwedstried Nederlaand-Noord-Ierlaand, zo wodde docht. De aovend wodde op kundige wieze prissenteerd deur warkgroeplid Klaasje Herder, wiels de warkgroepleden Piet Tjassing en Kjest Herder veur et geluud zorgden.
Et Veenpoolderkoor uut Scharpenzeel o.l.v. Madelon Kok van Ni’jhooltpae brocht een mooi ofwisselend pergramme mit o.e. lieties uut de bekende Stellingwarf Cantate. Et twiede optreden wodde ofsleuten mit et zingen van et Stellingwarfs Volkslied dat deur alle bezukers staonde mitzongen wodde.
Ni’je lieties van Carolien Hunneman
Speciaol uut Finlaand was overkommen Carolien Hunneman die zorgd hadde veur een tal ni’je lieties, en die bi’j iederiene ommeraek in de smaek vullen. Mit naeme was dat et lietien ‘Taelemannegien’, et lietien over heur vierjaorige zeuntien dat niet alliend in et Fins en Nederlaans opvoeded wodt, mar toegeliekrtied ok hiel wat Engels mitkrigt en daor niet de minste muuite mit het, integendiel. Hoe goed et leven Carolien in Finlaand bevaalt bleek uut et fraaie lietien ‘Naor huus’.
Teksten van Harmen Houtman
Lammy Bruyns brocht, heurzels begeleidende op ’e moenieke, veul lieties mit teksten van Harmen Houtman, waor ok een flink tal ni’jen bi’j weren. Ok Lammy zorgde veur een mooie ofwisseling in heur riegel lieties, en leut an et aende nog even een echte Fraanse musette heuren. Lammy wun indertied talloze wedstrieden mit heur akkordeonspel, zi’j volgde dan ok heur opleiding op een konservatorium.
A capella: Emma Winter
Vlak veur et schoft zong Emma Winter van Wolvege op speciaol verzuuk a capella et lied ‘Stellingië’, dat is et filmlied van de film ‘Daor klept de klokke weer’. Ok veur heur bi’jdrege was veul wardering.
Lekaole omroepen
Tiedens de aovend maekte Kjest Herder opnaemen veur et ni’je radiopergramme ‘In Twielochten’ dat elke vri’jdag van 18.00 tot 19.00 ure uutzunnen wodt op ’e lekaole omroepen Odrie en Weststellingwerf Centraol. Dat daoromme kan iederiene die disse mooie aovend miste een tal van de lieties weeromme heuren in dat pergramme.
Et Stellingwarfs Meziekfestival is een aktiviteit van de Stellingwarver Schrieversronte: veur de kommende keer wodt vanwegens et 15-jaorige jubileum veur een ere, biezundere opzet keuzen. De warkgroep komt in december al weer bi’j mekeer om mit de veurbereidings daorveur uut aende te gaon
Et verhael van Zander
Tiedens de perveensiaole verhaeleaovend verscheen in Donkerbroek et biezundere verhael ‘De wereld van Zander’ in boekvorm. Et verhael van ‘de vrome landverhuizer Zander Jacob Klooster (1820-1906)’ uut Donkerbroek wodde schreven deur dr. Rienk Klooster uut Liwwadden. Et eerste exemplaor van et ni’je boek rikte de auteur uut an Martha en Lieuwe Tiesinga van Oosterwoolde. Martha kende de antekens van Zander en zorgde d’r veur dat Klooster, die daor veul belangstelling veur hadde, et dokement in hanen kreeg. Now is Lieuwe in de veerte ok nog femilie van Zander, zodat et verhael van Zander veur de Tiesinga’s zels ok hiel weerdevol is. Et twiede exemplaor was veur Jan Koops uut Oosterwoolde, die as ‘mitlezer’ van et manuskript veur de auteur van groot belang west hadde.
Mitien nao de prissentaosie vertelde Rienk Klooster over et biezundere verhael van de uut Donkerbroek ofkomstige laandverhuzer Zander Jacobs Klooster. Die was al even boven de tachtig doe hi’j alderhaande herinnerings uut zien leven an et pepier toevertrouwde. Hi’j kikt in zien antekens weeromme op zien jeugd, zien schoeletied, zien femilie, gebeurtenissen die hi’j mitmaekte en personen die hi’j ontmoet het; in Donkerbroek liekegoed as in de ‘ni’je wereld’. Hi’j vertelt liekewel ok over zien persoonlike geleufsleven, en die antekenings maeken de uutgifte interessaant vanuut godsdienstpsychologisch en godsdiensthistorisch oogpunt. Zo kommen d’r verschillende aspekten in an et locht over de ofscheidingsbeweging in Donkerbroek, Haulerwiek en Appelsche.
Op zien Donkerbroekemers
Omdat Zander in zien antekens veural ’op zien Donkerbroekemers’ schrift – dat wil zeggen dat hi’j in et Stellingwarfs schrift zoas dat in de negentiende ieuw in zien geboorteplak praot wodde – is dit egodokement ok taelkundig van belang. Dat was dan ok de reden dat in et twiede pat van de aovend taelkundige dr. Henk Bloemhoff van Oosterwoolde ingong op de biezundereheden van de tael uut de tied van Zander. An et begin van zien inleiding gaf hi’j ok an dat in et Donkerbroek van doe veerweg et grootste pat van de inwoners nog Stellingwarfs praotte.
Et boek ’De wereld van Zander. Herinneringen van de vrome landverhuizer Zander Jacobs Klooster’(1820-1906) uit Donkerbroek’ is een weerdevolle anvulling op de boeken die an now toe over de streekgeschiedenis van Oost-Stellingwarf verschenen. Et wodde uutgeven deur de Stellingwarver Schrieversronte, telt 288 bladzieden, is veurzien van foto’s en kost € 17,50. Veur de vormgeving en et mooie omslag zorgde ‘BVK vormgeving’ van Haulerwiek.
Foto’s: Lenus v.d. Broek