Fins tiedens Stellingwarfs Meziekfestival

Zaoterdagaovend 16 november wodt veur de twiede keer et Stellingwarfs Meziekfestival holen in de Rustende Jaeger in Hooltpae. De opzet van et festival zal dit jaor wat eers wezen as de veurgaonde keren. In plak van zes dielnemers bin et d’r dit keer viere, zodat d’r veur iederiene wat meer tied en ruumte is om van him of heur heuren te laoten. Et doel is om vanof volgend jaor et festival te verbrieden, dat hoolt in dat d’r dan ok dichters en schrievers an et festival mitdoen gaon.

Speciaol uut Finlaand: Carolien Hunneman   

Dit keer doen an et festival mit Et Veenpoolderkoor van Scharpenzeel (o.l.v. Madelon Kok uut Ni’jhooltpae), Lammy Bruyns (Et Vene/Vinkege) en Carolien Hunneman (Finlaand/Oosterwoolde).

Et Veenpoolderkoor zal veural lieties naor veuren brengen uut de ommeraek bekende Stellingwarf Cantate; naor dat optreden kieken now al veul meensken uut. Lammy Bruyns zal veural ni’je lieties heuren laoten mit teksten van Harmen Houtman; ze begeleidt heurzels op de moenieke. Ok Carolien Hunneman het een tal ni’je lieties in et Stellingwarfs, mar ze zal grif ok een peer Finse heuren laoten. Sund al weer hiel wat jaoren woont Carolien, die van oorsprong van Oosterwoolde komt, in de Finse heufdstad Helsinki. Carolien begeleidt heurzels op ’e gitaar; heur Stellingwarver teksten bin veur et grootste pat schreven deur heur heit Wim.

A capella: Emma Winter

Vlak veur et schoft zal Emma Winter van Wolvege et lied ‘Stellingië’ a capella zingen. Dat is et filmlied van de film ‘Daor klept de klokke weer’, en ok in die film wodt dit prachtige lied zongen deur Emma.

Et festival begint om 20.00 ure en zal zo tegen 11.00 ure oflopen wezen. De toegang is vergees, mar een kleine financiële gift wodt deur de orgeniserende Stellingwarver Schrieversronte slim op pries steld.

Tentoonstelling Jeltje Baas: Koenen op ’e stal

Vanof november is d’r bi’j de Stellingwarver Schrieversronte in Berkoop een tentoonstelling mit wark van Jeltje Baas uut De Oosterstreek te bezichtigen. Dit keer het de schilderes veur heur tentoonstelling een keuze maekt uut heur wark van koenen. De tentoonstelling is ok krek in de periode dat de koenen van ooldsher op ’e stal binnen, want de tentoonstelling duurt tot begin april. Baas schildert tal van verschillende soorten koenen, van zwatbont vee tot Lakenvelders tot biezundere, van oorsprong hoornloze, koenen in Ni’j Zeelaand.   

Petretten/Laandschoppen

Behalven koenen schildert Jeltje Baas (Drachten, 18-05-1944) ok petretten en laandschoppen. Zo schilderde ze o.e. de bekende serie petretten van heur bejaorde mem, van kiender, van opdrachtgevers, mar ok van Mata Hari. Heur laandschoppen schildert ze in oonze omkrieten, mar ok in Ni’j Zeelaand. Toegelieke mit de tentoonstelling bi’j de Schrieversronte is d’r ok wark van Baas te zien in de Akaroa Art Gallery in Akaroa op de Banks Peninsula op et Zuder Eilaand. Zi’j volgde heur opleiding indertied an akkedemie Minerva in Grunningen en geft now zels al weer jaoren les in heur atelier op ’e Oosterstreek (zie www.jeltjebaas.nl).   

De tentoonstelling is te bezichtigen op deensdag-, woensdag- en donderdagmiddag tussen 13.30 en 16.30 ure. Groepen kun op ofspraoke ok op ere tieden kommen; dat kan deur te bellen naor 0516-451108 of te mailen naor info@stellingwarfs.nl. De toegang is vergees.

Stellingwarfs in Dwingel

Op zundag 10 november is d’r bi’j Grand Café  De Brink in Dwingel weer een ‘Tael an taofel’. De orgenisaosie van disse aorige zundagse aktiviteit is in hanen van et Drentse ‘Huus van de Taol’. De opzet d’r van is dat ien keer in de maond streektaelschrievers en muzikaanten twie keer een ure optreden. Tussen die twie uren deur krigt et publiek een waarme maoltied en heurt d’r ok koffie en thee bi’j et hiele arrangement.

   Alweer een schoffien leden wodde de Stellingwarver Schrieversronte benaoderd mit de vraoge naor naemen en gegevens van Stellingwarver schrievers en muzikaanten, zodat ok die es van heur heuren laoten konnen krek an de ere kaante van de greens mit Drenthe. Daor wodde uteraord an voldaon, zodat intied o.e. Roely Bakker, Koosje Hornstra, Attie Nijboer en Rob Zethoven al veur een bi’jdrege zorgden in ‘Tael an taofel’, somstieden tegere mit Drentstaelige kollega’s.  

   Dit keer is et pergramme liekewel hielemaole in et Stellingwarfs. Schriever Freddie de Vries lest een peer van zien verhaelen veur uut zien boek ‘Ok et beste peerd stroffelt wel es’, wiels Harmen Houtman mit een tal van zien gedichten komt. Veur de muzikaole bi’jdrege zorgt zangeres Lammy Bruyns; zi’j lat eigen Stellingwarver vassies heuren, heurzels begeleidende op ‘e moenieke.

De veurstelling begint om 11 ure en is om 14 ure oflopen. Risserveren kan tillefonisch bi’j de orgennisaosie van Tael an Taofel: Ans Klok 0521-592468 0f Geesje Oosting 0521-592468 of via de mail naor ans.klok@ziggo.nl of j.oosting01@home.nl

Ni’j boek mitien de sutelkrojen in

Mitien naodat Schrieversronteveurzitter Klaas van Weperen maendagmiddag de eerste exemplaoren van et ni’je boek ‘Luudklokken en klokkestoelen in Stellingwarf’ uutrikt hadde an de beide auteurs d’r van, kon et boek ok de krojen in van de sutelaktie. Die jaorlikse verkoopaktie van boeken en ere negosie zol even laeter uut aende gaon. Et ni’je boek, dat schreven wodde deur Jan Koops en Sietske Bloemhoff, was morgens rechtstreeks vanuut Tsjechië in Berkoop bezorgd. Van Weperen gaf an dat et bestuur van de Schrieversronte ommeraek wies is mit disse ni’jste uutgifte, omdat opni’j een belangriek diel van de historie van de Stellingwarver regio vaastelegd is. In et boek staon arg veul ni’je gegevens, niet alliend over de klokkestoelen, mar veural ok over de luudklokken: daor is eerder niet op zoe’n uutgebreide en verantwoorde wieze over schreven. Dat gelt hielemaole veur et heufdstok dat Jan Koops schreef over de geschiedenis van de klokken in de Twiede Wereldoorlog. Op vri’jdagmiddag 20 september is d’r in Else een speciaole bi’jienkomst angaonde et verschienen van dit belangrieke boek veur de regio, zo vertelde de veurzitter.

Eupening sutelaktie

Ok veur de ere ni’je uutgiften in de krojen hadde Van Weperen vanzels ommedaenken, zoas ‘As ik kiezen moch…’ van Harmen Houtman, de Stellingwarver Spreukekelender 2020 en de stick mit daorop de film ‘Daor klept de klokke weer’. Hi’j vertelde butendat dat et eerstvolgende boek dat de stichting uutgeft half oktober al verwaacht wodt. Dat is ‘De wereld van Zander, een egodocument van een landverhuizer uit Donkerbroek’ en wodde schreven deur Rienk Klooster.

De sutelaktie kon liekewel pas echt beginnen gaon naodat die ‘eupentoeterd’ was. De ere was dit keer veur Jan Koops, omreden die him dit jaor wel hielemaole extra inzet veur de schrieveri’je in et Stellingwarfs. Zo is hi’j mit nog een boek in de weer, ok dat zal nog dit jaor verschienen. Daornaost is hi’j et hiele jaor deur doende as redakteur veur et Stellingwarfs tiedschrift ‘De Ovend’. Koops bleek gelokkig nog genoeg aosem over te hebben veur een beste galp op ’e toeter…

Klaas van Weperen weenskte iederiene een hiele goeie sutelaktie toe, en hoopte dat et risseltaot weer krek lieke goed wezen zal as veurig jaor. De sutelaktie is disse weke en kommende maendag in West-Stellingwarf, daornao wodt veerder suteld in Oostaende.

Foto’s: Lenus v.d. Broek

Klokkestoelen in miniaturen

Links de klokkestoel van Else, rechts die van Buil (Sietske Bloemhoff)

Vanof et kommende weekaende zal bi’j de Stellingwarver Schrieversronte in Berkoop niet alliend et prachtige wark van keunsschilder Dick Bakker van Ooldetriene te zien wezen, mar ok de miniaturen van alle Stellingwarver klokkestoelen. De reden daorveur is dat op 2 september et boek ‘Luudklokken en klokkestoelen in Stellingwarf’ (van Jan Koops en Sietske Bloemhoff) verschienen zal. De twaelf miniaturen bin in de negentiger jaoren van de veurige ieuw maekt deur de heer Aaldert Alten (1921-2000) van Noordwoolde. Alten was doe iene van de infermaanten t.b.v. et vaktaele-onderzuuk van de Stellingwarver Schrieversronte, in dit geval gong et om die van de klokkestoelebouwer.

De miniaturen bin allemaole percies op schaol maekt en hebben ok om die reden een belangrieke weerde. Van die tied of bin ze ok te lien deur de basisschoelen in et kader van et vak Hiemkunde in et basisonderwies.

De miniaturen van de klokkestoelen en de schilderi’jen van Dick Bakker bin tot 19 augustus alle middaegen tussen 13.00 en 18.00 ure te bezien in et gebouw van de Stellingwarver Schrieversronte in Berkoop, daornao tiedens de kantooruren van de stichting. De toegang is ommenocht.