Algemien

Alle mitwarkers van StellingPlus weensken jim een ommeraek goed, gezond én Stellingwarfs ni’jjaor toe!

Alle mitwarkers van StellingPlus weensken jow hiele noflike kastdaegen toe en een gezellige jaorwisseling!

Sni’j of gien sni’j… Et kantoor van de Stellingwarver Schrieversronte in Berkoop is sleuten van maendag 23 december tot maendag 6 jannewaori!

Ien van de eerste Schrieversronte-aktiviteiten in et ni’je jaor is de ni’jjaorsreceptie op zaoterdagaovend 25 jannewaori in ’t Vlechtwark in Noordwoolde. Op die altied gezellige aovend bin d’r dit keer optredens van o.e. et mingd koor van Hooltpae, Freddie de Vries (mit humoristische verhaelen) en et körps van Makkinge. Aj’ van doel binnen en kom die aovend, zoj’ je dan nao 6 jannewaori even tillefonisch anmellen willen? Mailen kan ok naor info@stellingwarfs.nl. De aovend begint om 20.00 ure.

Zaoterdag 30 november wodde in de karke van Berkoop et Stellingwarfs Volkslied opneumen. Et lied, waorvan de tekst in de vuuftiger jaoren van de veurige ieuw schreven is deur H.J. Bergveld, wodde zongen deur ‘Oons genoegen’, et mingd koor van Hooltpae. De opnaemen van et lied komt op een cd die in een 24 bladzieden tellend boekien in feberwaori 2014 verschienen zal.

Morgens kwammen alle koorleden en heur dirigente Hinke Jelsma (vlak veur et schoelebod) eerst bi’j mekeer in et gebouw van de Schrieversronte veur een peer bakkies koffie. Daornao gong et fleurige gezelschop naor de veur de opnaemen zo geschikte karke van Berkoop. (Foto’s: Lenus v.d. Broek) 

Veur de opnaemen zorgde Serge Epskamp van Casco Songs uut Zaandhuzen. Epskamp zorgt daornaost ok veur een instermentaole versie van et volkslied op de cd. De tekst van et boekien wodt verzorgd deur Bergveldkenner Henk Bloemhoff van Oosterwoolde, veur de opmaek zorgt vormgever Alain ter Schuur uut Wolvege. De verkooppries van de cd zal omdebi’j € 10,00 wezen.

Lies Boersma, rechts op ‘e foto, beschreef heur biezundere leven an now toe in ‘t Is genoeg west… Veur de Stellingwarver bewarking d’r van zorgde Sjoukje Oosterloo (links).  Foto: Lenus v.d. Broek)

Vri’jdagmiddag 29 november verscheen bi’j de Stellingwarver Schrieversronte in Berkoop et ni’jste boek’t Is genoeg west…, een autobiografische roman van Lies Boersma uut Noordwoolde. Et boek vertelt et biezundere verhael van Lies, die opgruuide in et westen van Stellingwarf-Westaende, en die nao een mooie, mar ok deur et geleuf strakke, jeugd in een huwelik belaande dat heur slim ongelokkig maekte. Et ni’je boek wodde de schriefster anbeuden deur Attie Nijboer, twiede veurzitter van de Stellingwarver Schrieversronte. Veur de Stellingwarver bewarking zorgde Sjoukje Oosterloo uut Drachten.  Et boek is een echte anraoder, telt 176 bladzieden en kost € 12,50. Et is te koop bi’j de Schrieversronte in Berkoop, Primera in Noordwoolde, Bruna Oosterwoolde en The Readshop (Zwikstra) in Wolvege.