Weven mit Marianne Kemp

  

 

Oflopen vri’jdag verzorgde keunsteneres Marianne Kemp uut Utrecht een warkwinkel weven veur de groepen acht van de basisschoelen De Tjongeling van Berkoop en De Stelling in Makkinge. Die beide warkwinkels weren nog in et kader van et Under de toer-projekt De Verdwenen Peerden. Marianne Kemp warkt en weeft veul mit peerdehaor, vandaor dat ze vraogd was veur et geven van de warkwinkels op beide schoelen. Omreden de theatertocht De Verdwenen Peerden him ofspeulde in de dörpen Ni’jberkoop en Berkoop kregen die beide schoelen dit anbod. De aovend d’r veur gaf Kemp een slim interessaante lezing over heur wark as keunsteneres. De lezing liekegoed as de warkwinkels zollen geven wodden veurofgaonde an De Verdwenen Peerden op 3 en 4 augustus, mar deur ziekte van Kemp mossen die uuutsteld wodden. Veur wie meer weten/lezen wil over et wark van Marianne Kemp rikkemederen we heur webstee an:  http://horsehairweaving.com.

Op ‘e foto’s: de leerlingen van groep acht van De Stelling weren slim enthousiast over de warkwinkel en geneuten daor meraokels van (foto’s: Lenus v.d. Broek)

 

Hadde warken an De Verdwenen Peerden

  

  

  

D’r wodt hadde warkt an et straottheater De Verdwenen Peerden dat opvoerd wodden zal op 3 en 4 augustus in Ni’jberkoop en Berkoop. Op 3 juli warkten artistiek Leider Mariken Biegman en vri’jwilligers overdag an de rok en onderrok, die tegere een belangrieke funktie hebben zullen. De bovenrok zal 12 x 12 meter groot wezen en bestaot uut 14.400 kleurige lappies stof.

Aovens wodde d’r oefend op de eerste lekaosie an Boshoeveweg in Ni’jberkoop deur zangers, speulders en koor Donna Dora. Mar eerst was d’r koffie en uutleg in de dörpskantine van et dörp. In Ni’jberkoop speulde et verhael van de beide peerden die verdwenen en ommekwammen him rond 1825 of.

(Foto’s: Sietske Bloemhoff)