Jong van hatte mit et Stellingwarfs de toekomst in
Fotorebriek Stellingwarfs in et eupenbaor
Tiedens et dörpsfeest van Hooltpae zag ik dit bod bi’j een huus staon. Ik hebbe gien foto van et betreffende huus maekt. Ik wil graeg diskreet blieven. Et kan wezen dat dat kwaoie wief in dat huus woont. Kwaod mit ao en niet mit oa. Kwaod kan negatief wezen, mar et hoeft niet. Een kwaod wief kan een aekelik, lelk wief wezen. Mar et kan ok een oppassend wief wezen dat goed mit de centen ommegaon kan. (Foto en tekst: Johan Veenstra)
Johan Veenstra zag een schoffien leden de naeme De Krimpe op een huus an de Frieseweg in Blesdieke staon; zie nr. 328 van disse serie. Et is liekewel ok de naeme van een redelik ni’je ni’jbouwstraote in Ooldemark. Eerder laggen hier deur boswallegies begreensde kaampen. Bi’j disse straote lag (neffens topotijdreis) eerder een smaller perceel drekt aachter een brieder perceel (zie foto). Vermoedelik slat de naeme daor op; et gaot om een veldnaeme dus. (Foto en tekst: Henk Jager)
De Bentemaden is een strekien dat onder de buurtschop Jardinge bi’j Oosterwoolde vaalt. Bente is de Stellingwarver anduding veur et ‘pijpestrootje’ dat in disse omkrieten altied al veurkwam en nog veurkomt. Bente wodde eertieds veural bruukt veur et maeken van pieperaegers, dokken (bossies bente veur onder de dakpannen) en veur et vlechten van bi’jekörven. Et is jammer dat ok et woorddiel ‘maden’ niet in et Stellingwarfs is, dan zol et Bentemaoden west hebben, en die naeme wodt van ooldsher bruukt. (Foto’s en tekst: Sietske Bloemhoff)
Nommer 26 van disse serie lat al de Zorgboerderi’je De Stobbepoele in Tronde (bi’j Else) zien. Intied is daor een winkel bi’jkommen, zoas op et bod dat op disse foto te zien is angeven wodt. Op et richtinganwiezersbod wodt ok de Stobbepoele zels angeven, alliend is de ‘e’ votvalen… Dat moet haost wel een verzin wezen van de Elsigers! (Foto: Hans Salverda)