De Ronde Menning is een straotnaeme in Steggerde. Aenlik wodt altied menninge zegd, ok deur (ooldere) inwoners van Steggerde. Menning(e) is een Stellingwarfs woord veur reed. (Foto en gegevens: Henk Jager)
Tael buten deure
524. Noabers
Op een eer bod in Steggerde zag Henk Jager et woord Noabers. Dat wodt nogal es bruukt om je buren mit an te duden. Now schrieven we in et Stellingwarfs bi’j de ao-klaank altied de a eerst, dus zol et aenlik Naobers wezen moeten… (Foto en gegevens: Henk Jager)
523. Loekebossie
Ok de inwoners van Steggerde holen wel van et verzettien. Henk Jager van Blesdieke zag et gebruuk van et Stellingwarfs ok bi’j de feestversiering veur et Steggerdefeest, zoas de anduding Loekebossie.
522. Else is Wonderland
Kotleden hul et dörp Else een groot feestweekaende, en et wodde een geweldig mooi gebeuren. Iene van de hoogtepunten was een optocht van versierde waegens. Hans Salverda maekte disse foto van de waegen van de Klompebuurt. Mit gebruuk van et Stellingwarfs: Else is Wonderland. Ok al hadde et vanzels Wonderlaand wezen moeten, de waegen kreeg toch de eerste pries!
521. ’t Zunnig Pottien
Op nommer 290 in disse serie wodde ’t Boskefé Kobus wodde al eerder nuumd. Mar niet alliend de naeme van dit eetkefé in Zorgvlied is in et Stellingwarfs, etzelde gelt veur een peer gerechten op ‘e kaorte: ’t Zunnig pottien en Gien Kippegie. En aj’ nao daj’ d’r lekker eten hebben de nota kriegen, ziej’ daor opni’j Stellingwarfs op: Tot een aandermoal. Now schrieven we altied ao in et Stellingwarfs, en kiepien is in plak van kippegie… Wie wet past Kobus dat nog es an!
Hiel mooi is dar ok op ‘e webstee Stellingwarfs bruukt wodt: “Bliede da’j d’r binnen, ie bin hier veur een happien en een draankien op de goede plak.” (Foto’s en gegevens: Hans Salverda)