226. Johannes Visser zien plakkien

De Lende is niet zomar een mooi reviertien. In vroeger daegen was daor et zwembad van Ni’jhooltpae. D’r stonnen zels badhokkies. Johannes Visser was daor de badmeester. Johannes was een held! Hi’j reddede in december 1925 zes meensken uut een wak en kreeg daor een getuugschrift en een bedrag van honderd gulden veur van et Carnegie Heldefoons. Op et plak van et oolde zwembad is now een netuurbelevingspunt, dat in meie 2019 eupend wodde deur burgemeester André van de Nadort van West-Stellingwarf. Et is hiel toepasselik dat et de naeme Johannes Visser zien plakkien kregen het! (Foto en tekst: Johan Veenstra)

225. De Olde Tramhalte

De meensken schrieven nogal es olde in alderhaande naemen. Eins heurt et oolde te wezen. Dit is De Olde Tramhalte, een eetkefé, woonwinkel en B&B in Else. Aandere veurbeelden in disse serie mit olde daor et eins oolde wezen moet: De olde duker (32), ’t Olde café (33) en ’t Olde Wold (77). (Foto’s en Tekst: Johan Veenstra)

223. Geert’s Pattien

Geert’s Pattien is een pattien in Ni’jhooltpae. Et lopt vanof Jan van Huzenslaentien an de noordkaante van Padbargs Bos. Et pattien is nuumd naor winkelman Geert van der Vlugt. Hi’j reddede indertied de patties in de bossen van Ni’jhooltpae op. Veur al zien vri’jwilligerswark kreeg hi’j een keuninklike onderscheiding. De foto is maekt deur Emiel Heida, veur de tekst zorgde Johan Veenstra.

222. De Barte

De Barte is een straotnaeme in een woonwiek in Wolvege daor de naemen verwiezen naor netuurgebied Rottige Miente, westelik van Wolvege. Eins hadde et De Batte wezen moeten. Een batte is een hoolten brogge over een briede sloot, meerst zonder leuning. Eerder stonnen in disse serie: De Brogge (13), De Foeke (54), De Miete (82), De Stoeke (142) en De Splitting (183). (Tekst en foto: Johan Veenstra)