‘Stille Wille’ is de mooie Stellingwarver naeme van een huus an de Spangehoekweg in Spange in Stellingwarf-Westaende. Annie Dedden van Wolvege maekte d’r een foto van en stuurde oons die toe. Eerder zag Akkie Zeilsttra van Raevenswoold dezelde naeme op een vekaansiehuus in Appelsche in Oostaende (nr.169 in de serie Stellingwarfs in et ‘wild’).
De Lendepoolder is een ni’j anlegd netuurgebied tussen de Lindewijk in Wolvege en de revier De Lende. Et gebied is van It Fryske Gea, en het krek as de ere netuurgebieden van disse netuurverieninge een Stellingwarver naeme kregen. In et Friestaelige diel van Frieslaand kriegen zokke netuurgebieden een Friese naeme.
OBS Heidepolle is de naeme van de basisschoele in Wolvege, die in ‘Meertmaond-Streektaelmaond’ twie weken in de weer is mit et Stellingwarfs. Dat hielemaole toeval is et vanzels niet dat Heidepolle nr. 200 wodden is in de serie Stellingwarfs in et ‘wild‘. Bi’j et woord ‘polle’ kuj’ an twie dingen daenken: an een ‘struke’ of an een ‘boerespul’. Bi’j ‘Heidepolle’ in Wolvege liekt et te gaon om de eerste betekenis, die van ‘struke’ dus. ‘Polle’ kwammen we ok tegen in de naemen ‘De Gaegelpolle’ (28), ‘De Tentepolle’ (52), ‘Meulepolle’ (75) en ‘De Polle’ (109). Bi’j de laeste drieje gaot et haost zeker om de betekenis van ‘boerespul(legien)’, bi’j ‘De Gaegelpolle’ liekt de eerste betekenis meer veur de haand liggende. Schoele ‘Heidepolle’ is een onderdiel van de briede schoele Futura. (Foto’s: Johan Veenstra)
‘Blossem’ is et mooie Stellingwarver woord veur ‘bloesem’, in sommige Stellingwarver dörpen zeggen ze ok wel ‘blussem’. Woonzorgcentrum Lindestede bruukt ok dit woord veur iene van zien ofdielings. (Foto’s: Annie Dedden)
‘de Struke’, is ok een woonruumte binnen de sleuten ofdieling van Woonzorgcentrum Lindestede in Wolvege. Ok veur disse foto’s veur Stellingwarfs in et ‘wild’ zorgde Annie Dedden.
