In Woonzorgcentrum LindeStede in Wolvege bruken ze veul Stellingwarver naemen veur verschillende ruumten in et gebouw. Dat is vanzels hiel mooi, mar jammer is et dat daor niet altied de juuste zorg an besteded is. Want zo is et Nederlaanse woord ‘schoof’ in et Stellingwarfs ‘vertaeld’ naor ‘scheuf’. En dat woord bestaot in dit verbaand hielemaole niet! Een ‘schoof’ wodt in et Stellingwarfs een ‘gaaste’ nuumd wodt. Dat is een verzaemeling van bi’jglieks zes tot acht bossen stro die tegen mekeer op et laand anzet wodden, zodat et stro bi’j een bujje regen niet al te nat wodt. En zoe’n bos wodt dan meerstal een ‘garve’ nuumd. Wie wet passen ze daor in Lindestede et woord nog es an, want is ‘gaaste’ ok niet veul mooier om in dat woonvrundelike centrum te bruken?
In Woonzorgcentrum LindeStede in Wolvege bruken ze veul Stellingwarver naemen veur verschillende ruumten; eerder zaggen jim al een tal veurbeelden daorvan in disse serie. Et woord ‘dieke’ wodt hier bruukt as et Nederlaanse ‘dijk’, as waeterkering in dit geval kuj’ wel an et plaetien zien. Mar ok tegen een ‘weg’ wodt et woord ‘diek’ vaeke bruukt: ‘Hi’j is even de diek uut, mar zal zo wel weer thuuskommen’. Et woord wodt trouwens gewoonlik as ‘diek’ schreven, dus zonder een ‘e’ d’r aachter. Veur de foto zorgde Annie Dedden uut Wolvege.
In Wolvege ligt naost et spoor et kompleks mit volkstunegies van tuunverieninge De Wrotters. D’r moet vanzels eerst ok wel wrot of vrot wodden veurdaj’ grune boonties, bieties, wottelties en aander lekkers uut je eigen (volks)tuun eten kunnen! (Tekst en foto: Johan Veenstra)
In Ooldetriene ligt et Overlendepad en dat pad ligt d’r al jaoren. Op officiële botties komt de naeme Lende in plak van Linde dus al langer veur. Et is niet wat van de laeste jaoren. De Lende kuj’ hier overstikken mit een pontien, daj’ zels over et waeter trekken moeten. (Foto en tekst: Johan Veenstra)
