Tael buten deure

Waor aj’ Berkoop ok binnenkommen, ie wo’n altied welkom hieten mit een mooi spreukien van Lamkje Hof-de Boer (1908-1991). Zoas hier an et oolde en zo mooie Schuinpad:

Kom mar veerder rie mar deur

Want ie bin aanst zo te plak

In oons mooie kleine dörpien

Bin ie zo op je gemak

Et thema van et dörpsfeest 2017 in Hooltpae was Hobby’s in Olpae. Ze schrieven daor Olpae in plak van Hooltpae. Dat dee al een keer eerder blieken in disse serie. Zie nommer 81! Veur nommer 138 van Stellingwarfs in ’t wild zorgde Johan Veenstra.

Mooi is ok et veurbeeld van Stellingwarfs in et ‘wild’ bi’j Tuuncentrum Scheltinga in Blesdieke. Annie Dedden, tot veur kot van Blesdieke, zag et en maekte de foto. Een mooi initiatief om et Stellingwarfs ok op disse wieze te bruken!

Op verschillende begreefplakken in de Stellingwarven kommen grafstienen veur mit opschriften in et Stellingwarfs. Dit is de grafstien van Jan Houtman en Pietsje Houtman-Stremler op et karkhof van Ni’jhooltpae. Et bin de oolden van de Stellingwarver schriever Harmen Houtman. Zien heit was Stellingwarfs, zien mem Fries. De foto mit de bi’jheurende tekst wodde instuurd deur Johan veenstra.

Et is vanzels hiel gewoon dat d’r ok Stellingwarver naemen in ’t wild buten de Stellingwarven veurkommen. Et Stellingwarfs wodt ja niet allienig in de Stellingwarven praot, mar ok in de angreenzende gebieden van Drenthe en Overiessel. Et MFC van et dörp Willemsoord het dan ok een mooie Stellingwarver naeme. En ok nog in de juuste spelling! (Tekst en foto: Johan Veenstra)