D’r kommen niet allienig Stellingwarfstaelige teksten in ’t wild in de Stellingwarven veur, mar daorbuten ok! Dat is vanzels een goeie zaeke! Een schoffien leden wodde d’r een poëzieroute eupend om Oranjewoold henne. In Katliek is et gedicht De hujbarg van Harmen Houtman op een keurig bottien te lezen. De foto’s maekte Jacob Jellema, en die wodden mit de bi’jheurende tekst instuurd deur Johan Veenstra.
Tael buten deure
132. Vistrap Meulereed
De naeme Meulereed kwam tot now an toe al twie keer veur in de serie Stellingwarfs in ’t wild. Nommer 6 was de straotnaeme Meulereed in Berkoop en nommer 62 was et netuurgebied van It Fryske Gea. Mar in dat netuurgebied, vlakbi’j de sluus van Ooldehoorn, staot een bod dat daor een vistrappe is. Dat is vanzels een goed ding! De vissen moe’n zwemmen kunnen waor ze mar willen! (Johan Veenstra
130. ’t Bliekien
Nommer 130 al weer in de serie Stellingwarfs in ’t wild. Dit keer gaot et om de naeme van et sportveld van Zaandhuzen. Dat het de mooie naeme ’t Bliekien. De blieke is et Stellingwarfs veur ‘bleekveld’, een hoekien grös om et wasgoed te blieken. Now zal et sportveld van Zaandhuzen daor liekewel niet zo vaeke veur bruukt wodden…