Op ‘e Haule bin meerdere wegen mit een Stellingwarver naeme, ze bin zowat allemaole opneumen in disse serie. Dit keer gaot et om de Veenpettenweg, eerder zullen d’r in disse hoeke van De Haule venepetten legen hebben.
Stellingwarfs in et ‘wild’
Fotorebriek Stellingwarfs in et eupenbaor
501. Doevekamp
De Doevekamp is een lappe grond in et midden van Berkoop, daor een doevetille op staot. Ik zegge trouwens altied van Doevekaampe, et hadde naor mien idee mooier west as dat op et hekke staon hadde. (Foto en tekst: Johan Veenstra)
500. Stellingwarver Schrieversronte
Dit is nommer 500 in disse slim biezundere serie naemen. Aenlik hadde dit vanzels de nommer iene wezen moeten! In et gebouw van de vroegere Veurschotbaank van Berkoop huust de Stichting Stellingwarver Schrieversronte. Instituut veur Stellingwarver tael en kultuur mit historisch en volkskundig archief. Now, dat is wel een hiele mond vol! In 1997 kwam de Schrieversronte vanuut de Meulehoeve in Oosterwoolde naor dit mooie gebouw, midden in et Stellingwarver laand. Et is de bedoeling dat de Schrieversronte in de loop van 2024 verhuzen zal naor et Business Centre Bercoop. Ze schoeven dus ongeveer 200 meter op in westelike richting. In dat witte gebouw kwam in 1996 Baank Bercoop, de opvolger van de Veurschotbaank. D’r wo’n grote ruumten huurd deur de Schrieversronte en ik hebbe verneumen dat et gebouw een Stellingwarver naeme kriegen mag/zal. (Foto’s en tekst: Johan Veenstra)
499. Fenneweg
Op ‘e Haule hej’ de Fenneweg. Now zollen we dat in et Stellingwarfs gewoon mit een ‘V’ schrieven, mar op oolde kaorten ziej’ wel es ‘Fenne’ staon as. Mit et woord ‘venne’ of ‘fenne’ wodt liekewel etzelde bedoeld as mit et Nederlaanse woord ‘ven’.
498. A’k mij now umkeer
In Drenthe ziej’ nogal es vuilkonteners mit een mooie stikker d’r op. Zo ok in Zorgvlied, en Hans Salverda maekte d’r een foto van. De tael van Zorgvlied vaalt onder et Stellingwarfs, et zol zomar zo wezen kunnen dat ze daor dan ok vaeker ‘ommekeer’ zeggen…