Stellingwarfs in et ‘wild’

Fotorebriek Stellingwarfs in et eupenbaor

289. Buttinge

door
Bi’j nommer 283 gaf ik al an dat d’r rond Oosterwoolde een flink tal buurtschoppen te vienen binnen. Bi’j elke buurtschop staot een arg mooi infermaosiebod mit tal van gegevens over die buurtschop. De naeme van de buurtschop, liekegoed as de meerste infermaosie op et bod, is in et Stellingwarfs. Al was die op et bod in de buurtschop Buttinge niet best te lezen doe ik daor kwam… Et bod is op et mement aorig gruun uutsleugen, dat daor moet even een soppien an te passe kommen om alles weer leesber te maeken. A’k die kaante opkom za’k daor wis en zeker even veur zorgen!
(Tekst en foto’s: Sietske Bloemhoff)

288. ’t Pennekaampie

door
Disse foto van et bottien mit de mooie Stellingwarver naeme ’t Pennekaampie wodde maekt an de Baorsweg in de buurtschop Baors. De naeme op et bottien is die van een camping. Baors ligt in de gemiente Stienwiekerland, waorvan de tael dus, krek as die van et zuudwesten van Drenthe, taelkundig bi’j et Stellingwarfs heurt. De foto wodde instuurd deur Henk Jager uut De Blesse die tussen zien thuuswark deur even een fietstochien in de omgeving maekte en doe dit bottien zag.

287. Uutblaosbaankie

door

‘Ik zit op dit baankien in Wapservene en bin onderwegens naor de Doeze in ’t Holtingerveld. Ik bin an de gang om de boekprissentaosie te regelen op vri’jdagaovend 24 september in Zorgvlied om half achte.’ Dat gaf Hans Salverda laest an doe hi’j drok was mit et orgeniseren van de prissentaosie van zien boek Groot Wateren Een oase van weldaad. Hi’j stuurde mitien een foto van et baankien mit.

Omreden de tael van et zuudwesten van Drenthe taelkundig onder et Stellingwarfs vaalt, nemen we in disse rebriek ok Stellingwarver naemen, die in die streek in et eupenbaor bruukt wodden, mit. Etzelde gelt trouwens veur de tael van et noordwesten van Overiessel; et gaot dan om et gebied dat meerstentieds de ‘Kop van Overiessel’ nuumd wodt..

286. Bliede

door
In Noordwoolde gaot kommende zaoterdag 16 oktober dit ni’je kefé los. Et kefégien, zoas eigeneresse Jeanet Miedema et zels nuumt, het van heur de mooie Stellingwarver naeme Bliede kregen. Eerder was dit et ‘Café aan de Vaart’. We bin d’r bliede omme dat de hieltied weer meensken gebruuk maeken gaon van et Stellingwarfs in et eupenbaor. (Tekst en foto: Hans Salverda)

285. Lolkema’s laene

door

Lolkema’s Laene is een fietspad vanof de Stellingenweg in de richting van De Hoeve. Dit bottien staot vlakbi’j de oolde sluus van Ni’jhooltpae. De naeme komt van de femilie Lolkema die hier vroeger in de buurt boerkte en laand hadde.

(Tekst en foto: Johan Veenstra)