Stellingwarfs in et ‘wild’

Bi’j et netuurbelevingspunt Johannes Visser zien plakkien in Ni’jhooltpae staot een Dierezuker. Van alderhaande dieren die daor in de omgeving veurkommen, kuj’ op dit bod van alles geweerwodden. (Foto en tekst: Johan Veenstra)

Kuunderhof is een straotnaeme in Oosterwoolde. An disse straote staot een appattementekompleks dat dezelde naeme het. (Foto en tekst: Johan Veenstra)

De Lende is niet zomar een mooi reviertien. In vroeger daegen was daor et zwembad van Ni’jhooltpae. D’r stonnen zels badhokkies. Johannes Visser was daor de badmeester. Johannes was een held! Hi’j reddede in december 1925 zes meensken uut een wak en kreeg daor een getuugschrift en een bedrag van honderd gulden veur van et Carnegie Heldefoons. Op et plak van et oolde zwembad is now een netuurbelevingspunt, dat in meie 2019 eupend wodde deur burgemeester André van de Nadort van West-Stellingwarf. Et is hiel toepasselik dat et de naeme Johannes Visser zien plakkien kregen het! (Foto en tekst: Johan Veenstra)

De meensken schrieven nogal es olde in alderhaande naemen. Eins heurt et oolde te wezen. Dit is De Olde Tramhalte, een eetkefé, woonwinkel en B&B in Else. Aandere veurbeelden in disse serie mit olde daor et eins oolde wezen moet: De olde duker (32), ’t Olde café (33) en ’t Olde Wold (77). (Foto’s en Tekst: Johan Veenstra)

’t Voegelpattien is een pattien op ‘e Zanen van Ni’jhooltpae in de buurt van voegelkiekhutte Gerrit’s Hutte. De foto is maekt deur Emiel Heida.