183. De Splitting

D’r is een woonwiek in Wolvege daor Stellingwarfstaelige straotnaemen verwiezen naor netuurgebied Rottige Miente, westelik van Wolvege. Dit is De Splitting. Een splitting is een ongeveer zes meter briede geule in et vene. Vanuut die splitting koj’ dan an weerskaanten wiedergaon mit et turfstikken. Eerdere straoten uut die woonwiek in disse serie weren De Brogge (13), De Foeke (54), De Miete (82) en De Stoeke (142). (Foto en tekst: Johan Veenstra)

181. Wi’j zullen d’r veur waeken

Ok in de kastdaegen bin d’r oplettende ‘wildkiekers’ onder de bezukers van StellingPlus. Zo kuierde de femilie Bruggink van Raevenswoold in de buurt van et Kannedemeer bi’j Else en zaggen bi’j de zonuumde ‘spattelplasse’ dit zitplak mit een Stellingwarver tekst van H.J. Bergveld. De foto’s bin maekt deur Renzo Bruggink.

180. Tot kiekes

In meerdere Stellingwarver dörpen willen ze graeg daj’ nog es weerommekommen. Dit bod staot in Hooltpae aj’ daor de Stellingenweg oprieden zullen. In Noordwoolde staot Tot kiek es (nommer 39 in disse serie) en in Noordwoolde staot ok et bod Tot kiekes van Staotsbosbeheer (80). (Foto en tekst: Johan Veenstra)