Stellingwarfs in et ‘wild’

Noordwoolde het verschillende Stellingwarfstaelige straotnaemen. Daenk mar es an Meulewiek (nommer 58 van disse serie), Hevetille (72), De Kwekerije (78) en De Greverije (162). En dit is dan Haenepolle. De naeme wodde instuurd deur Annie Dedden en Johan Veenstra

Op ien van de muren in dörpshuus De Bult van Der Izzerd staot disse mooie spreuke. Aj’ je dus argens thuus en op je gemak vulen willen, moej’ naor Der Izzerd! (Foto en tekst: Johan Veenstra)

Aj’ in ziekenhuus Tjongerschaans in Et Vene liggen en eten kriegen,  kriej’ daor servetten bi’j daor in drie taelen op staot dat ze hopen daj’ smaekelik eten zullen: Nederlaans, Fries en Stellingwarfs! Ik wete uut onderviening dat et eten daor ok smaekelik is! Behalven vanzels veur de zeurderds en pieperds die altied wat te mierken hebben. (Tekst en foto: Johan Veenstra)

Verschillende dörpen hebben vandaege-de-dag infermaosiebodden bi’j et begin van een dörp staon. Daor staon dan alderhaande aktiviteiten op vermeld die in dat betreffende dörp hullen wodden. De Hoeve het ok van dat soort bodden. Dat doe daor een jaormennig leden de Stellingwarver Dag hullen wodde, wodde dat keurig op die bodden ankondigd. (Tekst en foto: Johan Veenstra)

De Beukepolle is de naeme van een huus op ‘e Oosterstreek dat in vroeger daegen een boerderi’je was. Polle betekent in dit geval dan ok boerderi’je of boerespul. (Foto’s en tekst: Johan Veenstra)