Stellingwarfs in et ‘wild’

Van Henk Jager uut Berkoop kwammen disse beide foto’s binnen veur de rebriek Stellingwarfs in ’t wild.  De naeme ‘kiek es’ is de naeme van et snoepwinkeltien in Wolvege an de Heufdstraote-Oost. Soms wodt ok wel es ‘Kiekes’ schreven, dat is vanzels niet goed. De winkel in Wolvege het et wel goed veur mekere!

De Stoeke is een straotnaeme in Wolvege, in een buurt daor de naemen wat te maeken hebben mit et riet- en waeterlaand van de Westhoeke van West-Stellingwarf. Een bepaold tal bossen of garven rogge of (in dit geval) riet wodt an de stoeke zet. (Foto en tekst: Johan Veenstra)

Dit huus an de Idzardaweg op Der Izzerd het de naeme klaover drie. Hier het de femilie Bruinsma een hattehoolderi’je. Aj’m dus graeg hattevleis hebben willen kuj’m dat hier bezetten. (Foto’s en tekst: Johan Veenstra)

Stellingwarfs in et ‘wild’ komt ok veur op ‘e Langelille. Dat zag Annie Dedden doe ze een fietstochien in de omgeving van dat kleine dörpien in de Westhoek zag. De kiender hebben daor een eigen speulplak mit de Stellingwarver naeme ‘Oons hoekien’.

Waor aj’ Berkoop ok binnenkommen, ie wo’n altied welkom hieten mit een mooi spreukien van Lamkje Hof-de Boer (1908-1991). Zoas hier an et oolde en zo mooie Schuinpad:

Kom mar veerder rie mar deur

Want ie bin aanst zo te plak

In oons mooie kleine dörpien

Bin ie zo op je gemak