De Beukepolle is de naeme van een huus op ‘e Oosterstreek dat in vroeger daegen een boerderi’je was. Polle betekent in dit geval dan ok boerderi’je of boerespul. (Foto’s en tekst: Johan Veenstra)
Stellingwarfs in et ‘wild’
Fotorebriek Stellingwarfs in et eupenbaor
173. De Drietippe
De Drietippe is de naeme van een appattementekompleks an de Heerenveenseweg in Wolvege. Bi’j mien weten wodde de naeme indertied andreugen deur de Stellingwarver schriever Fokke Midendorp (Fokke van Lute) naor anleiding van een veldnaeme die daor eertieds veurkwam (Johan Veenstra).
172. ’t Buurthuus
In Noordwoolde het et dörps- en aktiviteitencentrum bi’j et Rietvlechtmuseum al een schoffien de mooie Stellingwarver naeme ’t Buurthuus. Dat kuj’ lezen op et gebouw zels, op ‘e wapperende vlaggen bi’j de ingaank, mar ok op ‘e kleraosie van de vri’jwilligers die et centrum beheren.
171. De Lendevallei
Nog zoe’n netuurgebied van It Fryske Gea, dat officieel zien naeme in et Stellingwarfs holen het is de Lendevallei, in de buurt van Steggerde, Peperge en De Blesse. Jim zien de naeme hier op et infermaosiebod an de oolde weg tussen Wolvege en De Blesse.
170. Blessebroggepolder
De schaans bi’j De Blesse ligt in et gebied van It Fryske Gea dat de ‘Blessebroggepolder’ nuumd wodt. Ok hier lat de Friese netuurinstelling weer zien dat ze in Beetsterzwaog gebruuk maeken van naemgevings in et Stellingwarfs van heur terreinen in oonze kontreinen. Dat is een ploeme weerd, ok al zol hier aenlik ‘poolder’ staon moeten hebben…