Niet allienig et dörpskefé van Ni´jhooltpae het een Stellingwarver naeme. Zie nommer 74 in disse serie. Et kefé van Blesdieke het de mooie naeme De Polle. Beide foto’s veur Stellingwarfs in et ‘wild’ wodden instuurd deur Johan Veenstra.
Stellingwarfs in et ‘wild’
Fotorebriek Stellingwarfs in et eupenbaor
97. Infermaosiebod Fryske Gea
Ok op heur infermaosiebodden bruukt It Fryske Gea de Stellingwarver naemen van de netuurgebieden die ze in heur beheer hebben. Zoas op dit bod mit daorop angeven de Delleboersterheide, et Diakonievene en de Catspoele. Jammer is dan wel dat op et kaortien niet de officiële naeme van de revier de Tsjonger of De Kuunder nuumd wodt!
96. Delleboersterheide
Krek as bi’j et Diakonievene in Ni’jberkoop (nr. 94 in disse serie) is ok van de Delleboersterheide de oorspronkelike Stellingwarver naeme in et eupenbaor beholen bleven. Et staot It Fryske Gea, dat dit prachtige netuurgebied bi’j Berkoop in eigendom het, butengewoon te priezen dat et in weerde laoten van die oorspronkelike naemen heur beleid is.
95. Meulemaad
In Oosterwoolde-Noord bin d’r een tal straoten vernuumd naor oolde veldnaemen die op dat plak eertieds veurkwammen. Veul straotnaemen hebben daoromme as laeste woorddiel ‘maad’, in et Stellingwarfs liekewel ‘maod’. En maod, of meerstal bruukt in et meervoold maoden, bin van ooldsher hujlanen. Ien van de straotnaemen mit ‘maad’ is dan, wat et eerste diel angaot, wel weer in et Stellingwarfs, dat is de Meulemaad. Van sommige eren is dat muuilik te zeggen: want Noordmaad, Winkelmaad, Blauwmaad en Evertsmaad bin van die naemen die in et Nederlaans en in et Stellingwarfs op dezelde wieze schreven wodden… We kommen daor in disse rebriek Stellingwarfs in et ‘wild’ laeter nog weeromme!
94. De Steense
De Steense is de naeme van de sporthal in Wolvege. In et Stellingwarfs schrieven we steenze of stienze mit een z en niet mit een s. Op dit plak ston vroeger de Lycklama Stins die bouwd laoten wodde deur grietman Rinco Lycklama à Nijeholt. Et gebouw was op et laeste een brakke en wodde in 1736 ofbreuken. In laeter jaoren ston d’r een deftig laandhuus (zie foto) dat ok van Lycklama Stins hiette. Dat gebouw wodde in 1933 ofbreuken. Wat toch spietig… Johan Veenstra stuurde beide foto’s op veur Stellingwarfs in et ‘wild’.