Stellingwarfs in et ‘wild’

     

‘Et Koningspad is een kuier van mit mekeer 120 km laank waorbi’j et Keuningsdiep of Aldjip de heufdrolle speult. De verrassing was groot om op dit pad een Poëzieroute tegen te kommen mit veur mi’j as eerste een gedicht in et Stellingwarfs,’ vertelt Miranda die van oorsprong van Blesdieke komt. ‘Een peer veur mi’j onbekende woorden kon ik via et online woordeboek gelokkig opzuken zodat de hiele strekking van et gedicht mi’j hiel dudelik was en zo toepasselik bleek bi’j mien kuieraktiviteit die weke.’

In de buurtschop Boekelte bi’j Buil zag Hendrik Betten van Else een alderaorigste Stellingwarver naeme op een huus.  Die naeme is ’t Haezehusien, et huus staot an de Boekelterweg.

Een mooie Stellingwarver naeme zien we an De Monden bi’j Else. Et peerdepension van de femilie Bergsma hiet et Elserveld, en dat is de oolde veldnaeme van de omgeving daore. Et is vanzels arg mooi dat zokke oolde veldnaemen zichtber blieven! De foto’s wodden oons toestuurd deur Hendrik Betten van Else.

En hier is hi’j dan… Nommer 100 in de serie Stellingwarfs in et ‘wild’!  Et Schoelepad in Zaandhuzen!

De foto’s wodden oons toestuurd deur Ype en Joke Dijkstra van Oosterwoolde. Et Schoelepad is et oolde pad dat van vroeger van Zaandhuzen naor De Oosterstreek leup. De kiender van Zaandhuzen gongen langs dat pad naor de schoele in Noordwoolde. Et Schoelepad komt ok over de Zaandhuzer Wetering, dat van hiel vroeger een oold ziedstroompien is van De Lende. Et lopt butendat deur et prachtige netuurgebied Et Zaandhuzerveld, dat in eigendom is van Staotsbosbeheer. Et gebied is mit naeme bekend deur de prachtige orchidenen die daor in juni in volle bluui staon.

Kotleden stuurde Annie Dedden van Blesdieke een ni’je foto op veur de rebriek Stellingwarfs in et ‘wild’. Jim zien hier de Stellingwarver naeme van de kantine van vekaansiepark ‘Bosmeer’ in Noordwoolde. De Miente geft an dat et om gezaemelik bezit van (weide)grond gaot. De naeme is ok bekend van de buurtschop ‘De Miente’, die ok vlakbi’j Noordwoolde ligt. Mar as veldnaeme duukt ‘De Miente’ ok nog wel es op, zoas bi’jglieks veur et gebied tussen Buil en Else-zuud; dat is de ‘Builiger Miente’. Eertieds gong et daor dus om gemienschopslaand, et was in bezit van meerdere boeren.