Stellingwarfs in et ‘wild’

Kotleden stuurde Annie Dedden van Blesdieke een ni’je foto op veur de rebriek Stellingwarfs in et ‘wild’. Jim zien hier de Stellingwarver naeme van de kantine van vekaansiepark ‘Bosmeer’ in Noordwoolde. De Miente geft an dat et om gezaemelik bezit van (weide)grond gaot. De naeme is ok bekend van de buurtschop ‘De Miente’, die ok vlakbi’j Noordwoolde ligt. Mar as veldnaeme duukt ‘De Miente’ ok nog wel es op, zoas bi’jglieks veur et gebied tussen Buil en Else-zuud; dat is de ‘Builiger Miente’. Eertieds gong et daor dus om gemienschopslaand, et was in bezit van meerdere boeren.

Niet allienig et dörpskefé van Ni´jhooltpae het een Stellingwarver naeme. Zie nommer 74 in disse serie. Et kefé van Blesdieke het de mooie naeme De Polle. Beide foto’s veur Stellingwarfs in et ‘wild’ wodden instuurd deur Johan Veenstra.

Ok op heur infermaosiebodden bruukt It Fryske Gea de Stellingwarver naemen van de netuurgebieden die ze in heur beheer hebben. Zoas op dit bod mit daorop angeven de Delleboersterheide, et Diakonievene en de Catspoele. Jammer is dan wel dat op et kaortien niet de officiële naeme van de revier de Tsjonger of De Kuunder nuumd wodt!

Krek as bi’j et Diakonievene in Ni’jberkoop (nr. 94 in disse serie) is ok van de Delleboersterheide de oorspronkelike Stellingwarver naeme in et eupenbaor beholen bleven. Et staot It Fryske Gea, dat dit prachtige netuurgebied bi’j Berkoop in eigendom het, butengewoon te priezen dat et in weerde laoten van die oorspronkelike naemen heur beleid is.

In Oosterwoolde-Noord bin d’r een tal straoten vernuumd naor oolde veldnaemen die op dat plak eertieds veurkwammen. Veul straotnaemen hebben daoromme as laeste woorddiel ‘maad’, in et Stellingwarfs liekewel ‘maod’. En maod, of meerstal bruukt in et meervoold maoden, bin van ooldsher hujlanen. Ien van de straotnaemen mit ‘maad’ is dan, wat et eerste diel angaot, wel weer in et Stellingwarfs, dat is de Meulemaad. Van sommige eren is dat muuilik te zeggen: want Noordmaad, Winkelmaad, Blauwmaad en Evertsmaad bin van die naemen die in et Nederlaans en in et Stellingwarfs op dezelde wieze schreven wodden… We kommen daor in disse rebriek Stellingwarfs in et ‘wild’ laeter nog weeromme!