Deur een klein verzin van de kassier van de sutelaktie, bliekt de opbrengst van de jaorlikse huus-an-huus verkoopaktie een stokkien hoger as eerder angeven. De opbrengst is dit keer niet € 7.000,-, mar zowat € 8.500,-!
Naozoemer op ‘e Ieze
Stellingwarf is mooi, en de gebieden d’r ommetoe ok! Zo is et heerlik naozoemeren op ‘e heide van et laandgoed De Ieze, krek over de greens mit Overiessel. De foto’s bin van Jaap Elzenaar van De Hoeve.
Mooie opbrengst sutelaktie
Maendag 19 september wodde bi’j de Stellingwarver Schrieversronte de jaorlikse sutelaktie ofsleuten. De vri’jwilligers zorgden mit mekeer, deur veur € 7.000,- te verkopen, veur een mooie opbrengst. Mit naeme de verschillende routegidsies, et boek ’De sprokies van Grimm in ’t Stellingwarfs’ en de Stellingwarver Spreukekelender wodden goed verkocht.
Krek as bi’j ere, vergeliekbere, instellings et geval is, zicht et bestuur van de stichting liekewel dat et tal sutelders wat weerommelopt. Deurdat meensken vandaege-de-dag langer deurwarken (moeten) liekt iene van de redens daorveur. Een ere reden is dat in de periode van de sutelaktie, an et aende van augustus, begin september, de hieltied meer meensken nog even op vekaansie gaon.
De sutelaktie begint in 2017 op maendag 4 september.
112. Daenk d’r omme…
Van Hendrik Betten en Johan Veenstra kregen we veur de rebriek Stellingwarfs in et ‘wild’ foto’s binnen van disse waorschouwende tekst op een bod in Else. Johan Veenstra zegt daorover: ‘Hoewel de spelling van et Stellingwarfs niet hielemaole neffens de veurschriften is, is de bosschop op dit bottien in Else meer as dudelik. Aj’ hier et hiem opdurven te gaon maek ie kaans daj’ deur een kwaoie hond pakt en lichtkaans opvreten wodden. Al sutelende he’k me laestdaegs niks van die tekst antrokken. Ik bin gewoon et arf oplopen, hebbe veur een goeie twintig euro an negosie verkocht, en bin zonder kleerscheuren mit de kroje weer op ’e hadde diek kommen. Ik hebbe d’r gien hond zien…’
Pietermannen in De Kuunder
Femmie van Veen en Klaas Dijkstra vertellen over Pietermannen in De Kuunder en over hoe De Lende warkelik ontstaon is (foto’s: Sietske Bloemhoff)
Jim kun et geleuven of niet, mar in twielochten kon et bi’j de revier De Kuunder ommeraek geveerlik wezen. Niet op alle plakken, mar veural bi’j oolde kolken. Bi’j Berkoop is nog zoe’n stee, waor aj’ verhipte goed uutkieken moesten. Daor zatten in vroeger tieden Pietermannen in et waeter. Aj’ d’r dichte bi’j in de buurt kwammen, kon et zomar gebeuren dat die je bi’j de bienen grepen en je et waeter in trokken… Hoe dat allemaole percies zat, en as et d’r vandaege-de-dag ok nog zo geveerlik is, kuj’ geweerwodden aj’ mitdoen an de fietstocht mit verhaelen, now kommende zundag 25 september. Femmie van Veen zal et je, bi’j de sluus tussen de Meulereed en de Tjongervallei, percies uutstokken! Ok op drie ere plakken staon verhaelevertellers klaor, zoas Johan Veenstra (Cranberryfarm, De Hoeve), Klaas Dijkstra (begin De Lende, Tronde) en Frank Spijkers (Karkeweg, Buil).
De fietstocht kan tussen 10.00 en 12.00 ure begonnen wodden bi’j et kantoor van de Stellingwarver Schrieversronte in Berkoop (Willinge Prinsstraote 10), mar ok bi’j kefé-resteraant Boszicht in Ni’jberkoop (Bovenweg 26). De tocht is 52 kilemeter, mar kan onderwegens makkelik inkot wodden. An et aende is d’r veur ieder een aorighied as andaenken. De kosten bin € 5,00 per persoon en kun an et begin van de tocht betaeld wodden.