De oplossing van et feberwaoripuzeltien van de Stellingwarver Spreukekelender 2016 is: SPROKKEL. De woorden die invuld wodden moesten weren: ieS, dopPe, gRuun, maOnd, eKkel, roK, waEter, leLk.
Oplossing jannewaoripuzeltien 2016
e
et
ets
snet
snute
nusten
steunen
Freddie de Vries en Ruurd Jelle van der Leij winnen de H.J. Bergveldpries 2016
Freddie de Vries (links) en Ruurd Jelle van der Leij (foto: Andries van Huizen)
Op veurdracht van de jury kent et bestuur van de Stellingwarver Schrieversronte de H.J. Bergveldpries 2016 toe an Freddie de Vries en Ruurd Jelle van der Leij, schriever en fotograaf van Et Stellingwarver Voegelboek. Bi’j Et Stellingwarver Voegelboek gaot et om een boek waor de voegels in beschreven wodden die in et gebied Stellingwarf veurkommen of veurkommen kunnen. De dudelike, toegaankelike wieze van et beschrieven van al die voegels, et prachtige fotomateriaol en een register mit naost de Stellingwarver naemen ok de naemen in et Nederlaans en Latien maekt dit boek biezunder en uniek.
De H.J. Bergveldpries wodt toekend an personen of an instellings die heur inzetten, of inzet hebben, om et Stellingwarfs en de Stellingwarver streekkultuur uut te dregen, in schrift of op een aandere wieze. In heur besluut te kiezen veur Et Stellingwarver Voegelboek volgt et bestuur van de Stichting Stellingwarver Schrieversronte de unanieme veurdracht van de jury.
Et is de eerste keer dat de Schrieversronte disse eervolle pries, bestaonde uut een geldbedrag en een penning, uutrikken zal. Et doel is om dat iens in de zes jaor te doen. Eerder rikten de Stellingwarver gemienten Oostaende en Westaende de pries om toerbeurt uut.
De uutrikkinge zal wezen op maendagaovend 17 oktober in et gebouw van de Schrieversronte in Berkoop. De bi’jienkomst is veur geneudigden.
Amama: indrokwekkende film!
In et buurthuus van Noordwoolde wodde vri’jdagaovend 30 september de Baskische film Amama vertoond. De film is veurzien van een Stellingwarfstaelige ondertiteling, daorveur zorgde Henk Bloemhoff van Oosterwoolde. Amama wodde dri’jd in et kader van de dag van de Europese taelen op 26 september. De bezukers geneuten ommeraek van de film die gaot over een generaosiekonflikt op et plattelaand. De Stellingwarver ondertiteling wodde ommeraek wardeerd en bleek veur iederiene goed te volgen, zo wodde nao de tied angeven. De orgenisaosie was in hanen van de Stellingwarver Schrieversronte i.s.m. et Europese buro veur kleine taelen. Veur technische hulpe zorgde et Filmhuus Noordwoolde, wiels de perveensie Frieslaand financieel ien en aander meugelik maekte. Wie de film ok graeg zien wil: veur de twiede veurstelling zorgt Stichting Kunstwerf op zaoterdagaovend 8 oktober in Hotel De Zon in Oosterwoolde.
Veul lof veur verhaelefietstocht SSR
Links: Klaas Dijkstra las een volksverhael veur over et ontstaon van De Lende. Rechts: Johan Veenstra vertelde uut eigen wark in de tuun bi’j de Cranberryhoeve. (Foto’s: Lenus v.d. Broek) Linksonder: An de Karkeweg in Buil vertelde Otto, heer van Buil, zien verhael. Rechtsonder het Femmie van Veen et bi’j de sluus tussen Berkoop en Ooldehoorn over vroeger tieden, doe d’r in oolde kolken van De Kuunder nog Pietermannen veurkwammen… Hielemaole onderan: Lekkers pruven bi’j Marijke van de Cranberryhoeve! (Foto’s: Hans Salverda)
Roem dattig meensken deden mit an de deur de Stellingwarver Schrieversronte orgeniseerde fietstocht mit verhaelen. Tiedens de tocht die mit prachtig zommers weer deur et middengebied van Stellingwarf gong, vertelden Klaas Dijkstra, histotolk Frank Spijkers, Johan Veenstra en Femmie van Veen oolde volksverhaelen of uut eigen wark. Halverwege de tocht dee al blieken dat veul meensken enthousiast weren over disse biezundere tocht. Et doel is dan ok dat de SSR in 2017 opni’j een vergeliekbere tocht orgeniseren zal.