Johan Veenstra vertelt uut ‘Een vrouw van ivoor’ – zien 25e boek – tiedens de prissentaosie daorvan. (Foto: Lenus v.d. Broek)

De Stellingwarver schriever Johan Veenstra het veur zien laeste roman Een vrouw van ivoor veur de twiede keer een nommenaosie kregen. Een schoffien leden wodde Veenstra mit vier Friestaelige schrievers  nommeneerd veur de Rink van der Veldepriis. Now is de schriever uut Ni’jhooltpae nommeneerd veur de Streektaelpries van et Dagblad van het Noorden. Veenstra is op ’e kotlieste/shortlist terechtekommen mit de Drentse schrievers Gerard Nijenhuis, Klaas Koops, Tieme Woldman en de Grunninger schriever Jan Siebo Uffen. Butendat is een biezundere edisie van et Drentse literaire tiedschrift Roet nommeneerd. Johan Veenstra kreeg de Streektaelpries van et Dagblad van het Noorden 2009 veur zien roman Et geheim van de wiend. In et Dagblad van het Noorden wodt Een vrouw van ivoor ongewoon eupenhattig in de streektaelliteretuur nuumd. Op zundag 3 april wodt in de Winsinghhof in Roden bekendmaekt wie de Streektaelpries 2015 krigt.

De roman Een vrouw van ivoor verscheen 21 augustus veurig jaor bi’j de Stellingwarver Schrieversronte in Berkoop en telt 176 bladzieden. De roman kreeg geweldig goeie receensies in de Liwwadder Kraante en et Dagblad van het Noorden.

Ok in 2014 en 2015 weren d’r nommenaosies veur boekuutgiften van de Stellingwarver Schrieversronte. In 2014 was dat veur et kienderboek Winterwille en in 2015 veur et boek Van schossel tot slingerpad mit wark van drie Stellingwarver dichters en drie beeldend keunsteners.

In de naozommer van 2016 verschient d’r een Stellingwarver verzaemeling van de wereldberoemde sprokies van de gebroeders Grimm: Sprokies van Grimm in et Stellingwarfs. Et gaot om een ni’j diel in een serie van de Grimmsprokies in kleine taelen. Eerder verschenen al een Friese vertaeling (2012) en een Bildtse (2015), en op 19 meert 2016 kommen ze mit een Grunninger vertaeling veur ’t locht.

Veur de Stellingwarver vertaeling zorgen Sietske en Henk Bloemhoff, bekend van de Stellingwarver Schrieversronte; de uutgever is Taalburo Popkema. In et boek zullen ongeveer twintig sprokies opneumen wodden, mit kleurrieke illestraosies van Peter Boersma&Hilda Groenesteyn (zie ofbelinge).

Et is veur et eerst dat d’r zoe’n omvangrieke verzaemeling Grimmsprokies in et Stellingwarfs verschient. Et boek is bedoeld veur iederiene, mar ’t is vanzels ok biezunder aorig om uut veur te lezen an jonge kiender.

Donderdagmiddag 10 meert wodde bi’j de Stellingwarver Schrieversronte in Berkoop et mediaboekien Op ’e luuster staon prissenteeerd. Op ’e cd van et mediaboekien bin verhaelen van H.J. Bergveld, Johan Veenstra en Klaas van der Weg te heuren. As ofwisseling bin op de cd butendat een tal lieties van Henk Bloemhof opneumen. Et mediaboekien is koppeld an et veurleesprojekt veur oolderen zoas dat al een stokmennig jaoren lopt, en dat now veerder uutbreided is naor de kleine dörpen.

(Foto’s: Lenus v.d. Broek)

Eerste exemplaor veur Femmie van Veen

Et eerste exemplaor van et mediaboekien wodde deur SSR-veurzitter Ype Dojkstra uutrikt an veurlezer Femmie van Veen. Al sund de invoering van et vak Hiemkunde in et basisonderwies is de inwoonster van Hooltpae arg aktief mit et veurlezen van verhaelen. Zo lest ze veur t.b.v. de hiemkundewebstee stellingwerf-heemkunde.nl, mar dot ok mit an de Tomke-veurleesweke in juni én tiedens de winterveurleesaktie veur oolderen, zoas die disse weke ok weer holen is, zo vertelde Dijkstra. ‘Jow hebben dit eerste exemplaor van ’Op ’e luuster staon’ as bliek van grote wardering meer as verdiend!’

Dijkstra gong in zien praotien ok nog even in op et belang van et veurlezen in et Stellingwarfs. Dat belang gelt liekegoed veur de jeugd as veur de oolderen, zo vun hi’j.

Tiedens de middag las behalve Femmie van Veen (verhaelen van Bergveld) ok Klaas Dijkstra veur, wiels Henk Bloemhoff een vuuftal Stellingwarver lieties heuren leut.

Et twiede exemplaor van ‘Op ‘e luuster staon’ was veur veurlezer Klaas Dijkstra. Spietig genoeg kon Johan Veenstra – van him bin op ‘e cd ok twie verhaelen te heuren – deur ere verplichtings niet bi’j de prissentaosie wezen. (Foto: Lenus van der Broek)

Henk Bloemhoff zong niet alliend zien lieties die op de cd staon, mar hadde ok nog een toegift mit o.e. et onbekendere lied ‘Et oold turfgrevershuus’. (Foto: Lenus v.d. Broek)

Henk Bloemhoff hadde ok nog veur een speciaole ‘mitzinger’ zorgd, op een melodie van Cornelis Vreeswijk. Ok wethoolder Sierd de Boer van Oost-Stellingwarf – ok veur him was d’r uteraord een cd én verhaelebundel – zong van hatte mit!

Foto: Lenus v.d. Broek

Sutelders naor Twiede Kaemer

Op uutneudiging van Twiede Kaemerlid Lutz Jacobi gong een groep van tegen de veertig sutelders naor Den Haag. Jacobi dee veurig jaor een aovend mit an de Stellingwarver sutelaktie en hadde daor zoe’n aorighied an dat alle sutelders nuugd wodden om een middag te gaaste te wezen in de Twiede Kaemer.

De sutelders van de Stellingwarver Schrieversronte woonden as eerste et vraoge-uurtien bi’j en kregen vervolgens een rondleiding deur de gebouwen. An et aende van de middag wodde mit mekeer nog even naopraot in de fraktiekaemer van de PvdA. Schrieversronteveurzitter Ype Dijkstra daankte Lutz Jacobi veur de ommeraek plezierige bi’jienkomst en gaf heur de laeste uutgiften van de SSR.

Lutz Jacobi dot ok dit jaor weer mit an sutelaktie.

Hieronder een foto=impressie van Lenus v.d. Broek: