’Vrede en vri’jhied’: themanommer De Ovend

‘Vrede en vri’jhied’ is de naeme van et themanommer van De Ovend dat in et laest van april verschenen is. De redaktie het een oproep daon veur ni’j wark en daor is roem op reageerd. Toegelieke is ok een keuze maekt uut oolder wark. Bi’j et uutzuken van die kattegerie vul op hoeveul d’r wel niet publiceerd is mit de Twiede Wereldoorlog as aachtergrond. Dat was in De Ovend, mar liekewel ok eers, zoas in de deur de Stellingwarver Schrieversronte uutgeven boeken. D’r is daoromme uut een hiele tiedrekte een selektie maekt, want de SSR bestaot al sund 1972.

Ok ere perioden

Niet alliend bin verhaelen, gedichten en herinnerings opneumen die mit de Twiede Wereldoorlog en de bevri’jding te maeken hebben, mar d’r ok is wark te lezen dat over ere perioden of omstaandigheden gaot waor et thema een belangrieke rolle in speult.

Sommige verhaelen in disse unieke uutgifte bin fiktief, eren hebben betrekking op wat d’r gebeurd is. ’t Vaalt op van hoeveul verschillende auteurs d’r wark in ‘Vrede en vri’jhied’ plaetst is. Wat veural opvaalt is hoe diepe en tekenend et thema op et gemoed van schrievers en dichters inwarkt het en hoe dat op de lezers overkommen kan.

Uutdield an kollege- en raodsleden

75 jaor nao de bevri’jding leeft de thematiek nog volop. Vanwegens dit biezundere jaor, en vanwegens de speciaole uutgifte van ‘De Ovend’ het et bestuur van de Stellingwarver Schrieversronte veurige weke alle kollege- en raodsleden van de beide Stellingwarver gemienten een exemplaor anbeuden. Alle leden hebben uteraord ‘Vrede en vri’jhied’ al toestuurd kregen; et tiedschrift is liekewel ok los te koop bi’j de boekhaandels en te bestellen bi’j de SSR in Berkoop (info@stellingwarfs.nl).

Uut ‘Vrede en vri’jhied’:

VRI’JHIED – VREDE

Jongkerels veer van huus

streden veur vrede

betaelden de pries;

de hoogste pries

veur oonze vri’jhied.

Duzenden

kwammen niet meer thuus.

Wi’j gedaenken,

herdaenken,

vieren de vri’jhied!

Vri’jhied om te kiezen

te dielen.

Greenzen sluten,

vlochtelingen weren?

Hoe kuwwe, hoe durven we?

Willen we vri’jhied niet dielen?

Hoevule is ’t weerd,

wat willen wi’j geven

veur vrede en vri’jhied?

Wat now as 75 jaor leden

al die jongkerels docht hadden:

ikke, ikke en

de rest kan stikken?

Roely Bakker

*****

IK BIN CHARLY

Ik bin gien Moslima

Geleuf niet in god

Gao niet op mien kni’jen

Bepaol mien eigen lot.

Ik striede op mien eigen meniere

Verschoel mi’j niet aachter een sluier of masker,

Gao mit een eupen vizier

Drief mit gieniene de spot.

Vecht zonder koegels, zonder geweld

Veur een rechtveerdige wereld

Waorin vri’j daenken en schrieven

en een meenskeleven nog telt.

Waorin liefde en verdreegzemhied tegere blieven

Wi’j mekaander niet daelemi’jen

mar de helpende haand rieken

Waorin de Biebel en de Koran oons verbint, niet beknot.

Mar nog hieltied dot blieken: liggen leven en leven laoten

Zoveer uut mekere as dag en naacht

Drokt et geweld oons op ‘e bost

Kleeft de dood an een potlood

‘Qui vivre vera’ in ienkeer ontkracht.

Kost wat et kost zullen wi’j niet bugen

Laoten wi’j oonze niet vermoegen

Vive la liberté, egalité en fraternité

Charlie Hebdo kuj’ oons vergeven?

Attie Nijboer

*****

VERBURGEN

Diepe verburgen

in nog een klein tal heufden

spoeken verhaelen

van de oorlog rond.

Te slim om te vertellen,

te arg om opni’j deur te maeken,

te schaandelik om over te praoten,

te diepe zonken om weer op te haelen.

Et kassien is al lange sleuten,

de sleutel is niet meer te vienen,

de schernieren van et deurtien

bin roestig wodden deur de tied.

D’r liggen wat traonen in et laegien

dat al jaoren dichte zit…

Soms huust d’r nog een dagboek

in een stoffig hoekien op een vliering,

of kommen brieven teveurschien,

waordeur we beter begriepen

waoromme woorden nooit zegd binnen…

Harmen Houtman

Oplossing fotopuzel kelender 2019

De tied vligt… want now verschient eerdaegs al weer de spreukekelender veur et jaor 2021. En bi’j et bericht daorover van de uutgever bedochten we dat de uutslag van de fotopuzel van de kelender van 2019 nog de hieltied niet bekend maekt is! Dat gaon we daoromme now dan toch eindelik doen. Een winner is d’r niet, want van alle inzenders was d’r niet iene bi’j die alle foto’s goed hadde…

De goeie antwoorden bin: jannewaori: de karke van Berkoop, feberwaori: De Fochtel, meert: De Lende, april: Noordwoolde, meie: Ni’jberkoop, juni: Wolvege, juli: Fochtelervene, augustus: de klokkestoel van Sunnege, september: De Kuunder, oktober: die van Ni’jhooltpae, november: die van Makkinge, december: gebouw Stellingwarver Schrieversronte in Berkoop.