Ni’js – Pagina 204 – StellingPlus.nl

Bi’jienkomst onderwiesprojekt KEK

5 juni 2015 door Redaktie

Op deensdagmiddag 2 juni was d’r bi’j de Schrieversronte in Berkoop een bi’jienkomst in et kader van et onderwiesprojekt KEK. KEK is een laandelik vier jaor durend projekt mit et doel meer ommedaenken te kriegen veur kultuur binnen et onderwies. In de Stellingwarven doen daor tien schoelen an mit, daor het et projekt de naeme KIEK ES kregen. Et projekt lopt t/m 2016.

Veur KIEK ES bödt uteraord, as ontwikkeler van lesmateriaol veur et vak Hiemkunde, de Schrieversronte veul advies en ondersteuning. Tegere mit de biebeltheken en Kunst en Coo begeleidt de SSR ok dit mooie projekt.

Zo wodde in Oosterwoolde kotleden op de Oostenburgschoele een schoelebried projekt rond de buurtschoppen bi’j Oosterwoolde ofsleuten. De Schrieversronte stelde hier een tal routegidsen De buurtschappen van Oosterwolde veur beschikber. Ok de Historische Veriening van Oosterwoolde wodde bi’j et prachtige projekt betrokken. Op de foto geft juf Jos van de Oostenburg uutleg an ere schoelen en an meensken die aktief bi’j KEK /KIEK ES betrokken binnen.

Op de hiemkundewebstee www.stellingwerf-heemkunde.nl is meer infermaosie over KEK/KIEK ES te lezen.

Dippeteerde Sietske Poepjes lest veur uut Stellingwarver Tomke

1 juni 2015 door Redaktie

(Foto’s: Lenus van der Broek)

Maendagmorgen 1 juni was in ukkespeulplak Meulewiek in Noordwoolde de eupening van de Friese Tomke-veurleesweke. Veur disse biezundere gebeurtenis was vrouw Sietske Poepjes, zi’j is de ni’je dippeteerde van kultuur, nuugd om daor uut et Stellingwarver Tomkeboekien veur te lezen. De kiender van et ukkespeulplak geneuten d’r ommeraek van, mar dat gul liekegoed ok veur de dippeteerde zels. Et Stellingwarfs gong heur trouwens ok mar poerbest of, vrouw Poepjes had daor dudelik goed op oefend.

Tiedens et welkomstwoord van Schrieversronte-veurzitter Ype Dijkstra dee mitien al blieken hoe belangriek mevrouw Poepjes de diversiteit an taelen in de perveensie vint: ‘Ienhiedswost daor vien ik niks an; al die verschillende taelen in oonze perveensie bin toch prachtig!’ Ok et belang van disse gezaemelike aktie van Afûk, it Selskip foar Fryske Schriftekennisse en de Schrieversronte onderstreepte ze. ‘En ik wil d’r mit veur zorgen dat tiedens 2018, et jaor dat Liwwadden kulturele heufdstad is, de streektaelen dan ok goed heur gerak kriegen, ok et Stellingwarfs,’ zo leut de dippeteerde weten. ‘Dat jaor zal et, as et an mi’j ligt, niet alliend om Liwwadden gaon, mar om de hiele perveensie.’

Vrouw Poepjes: ‘Al die verschillende taelen in oonze perveensie bin toch prachtig!’ (Foto: Tineke van der Woude)

Bi’j de eupening van de veurleesweke weren ok vertegenwoordigers van de Afûk en It Selskip foar Fryske Schriftekennisse. Geeske Frieswijk, zi’j is veurzitter van de veurleeskemmissie van It Selskip, gaf an dat disse veurleesaktie et levende bewies is van levende taelen en hoe riek Frieslaand daor an is. ‘En in de Stellingwarven bin we dubbel riek, want daor gaot et niet om een streek, mar om twie gemienten mar liefst. In beide gemienten kommen daordeur jaorliks zoe’n 600 ukken in de kunde mit heur eigen tael. Wat moe’n de beide gemientebesturen hier bliede mit wezen, wat een riekdom ok veur heur!’

Nao et veurlezen wodde schriefster Sjoukje Oosterloo, zi’j vertaelt al sund jaor en dag et Tomkeboekien vanuut et Fries in et Stellingwarfs, mit een bos bloemen in et zunnegien zet. Ok veur vrouw Poepjes was d’r as daank veur heur eerste officiële haandeling in Stellingwarf as ni’je dippeteerde van kultuur bloemen, mar ok de ni’je jaordagkelender van Tomke. Vrouw Poepjes beloofde gauw es weer naor de Stellingwarvern toe te kommen, et hadde heur ommeraek goed voldaon.

Kultuurdippeteerde Sietske Poepjes eupent veurleesweke Tomke in Noordwoolde

29 mei 2015 door Redaktie

Kommende maendagmorgen 1 juni is de eupening van de Tomke-veurleesweke in ukkespeulplak Meulewiek in Noordwoolde. De eupening zal gebeuren deur kultuurdippeteerde Sietske Poepjes. Zi’j zal daorveur een verhaeltien veurlezen uut et ni’jste Tomkeboekien Hoj Tomke. Et is veur et eerst dat disse biezundere veurleesweke, die sund jaor en dag in de hiele perveensie Frieslaand holen wodt, in Stellingwarf uut aende gaot.

De Tomke-veurleesweke is een initiatief van It Selskip foar Fryske schriftekennisse. Dit zelschop het deur de hiele perveensie henne overal vri’jwillige mitwarkers zitten die de weke in heur dörp of regio orgeniseren. In de Stellingwarven gebeurt dat al sund jaor en dag deur twie vri’jwilligers van de Stellingwarver Schrieversronte, dat bin Akkie Zeilstra veur Oostaende en Wikje Haan veur Westaende.

Et boekien Tomke mit daorin de aeventuren van et joongien Tomke, zien kammeraotien Romke et hontien en Kornelia de kangeroe verschient dit jaor veur de 19^e keer. Et wodt uutgeven deur de Afûk en komt behalven in et Fries en et Stellingwarfs o.e. ok uut in et Bildts en dit jaor veur et eerst in et Schiermonnikoogs. Veur de Stellingwarver ukken wodt Tomke vanuut et Fries in et Stellingwarfs vertaeld deur Sjoukje Oosterloo. De Stellingwarver Schrieversronte stelt veur alle ukken een boekien beschikber.

De feestelike eupening wodt bi’jwoond deur vertegenwoordigers van It selskip foar Fryske schriftekennisse, de Afûk en de Schrieversronte.

Et veurjaor in foto’s

26 mei 2015 door Redaktie

Bovenstaonde veurjaorsfoto’s maekte Jaap C. Elzenaar op eerste pinksterdag bi’j De Lende aachter Boshoeve in Ni’jberkoop. Et waeter van De Lende zit vol leven! De foto hieronder mit bluuiend koolzaod en fluitekruud maekte Jaap een dag eerder bi’j Ni’jhooltwoolde an de weg naor Mildam.

Op eerste pinksterdag fietsten Ype en Joke Dijkstra van Oosterwoolde in de omgeving van heur dörp, bi’j Donkerbroek en bi’j Else. Ok zi’j maekten onderwegens mooie veurjaorsfoto’s, zoas hier van et pad naor de Stobbepoele vanof de Peperstraote:

De volgende twie foto’s maekten Ype en Joke bi’j de Balkweg in de buurt van de Tjabbekaamp. Boven o.e. bluuiende koekoeksbloemen, daoronder de prachtige bloeme van een kestanje:

En weer bi’j Else: bluuiend fluitekruud en Bremer heide (brem) langs et fietspad dat vanof de Haerweg uutkomt op de Haerdijk:

Sietske Bloemhoff maekte op twiede pinksterdag de volgende veurjaorsfoto’s vlakbi’j heur huus in Ni’jberkoop:

Van boven naor beneden: uutbluuide peerdebloemen, scharpe botterbloemen en fluitekruud; dan de koekoeksbloeme en daornaost bluuiend sepiepehoolt.

koekoeksbloeme

Tot slot et prachtige geel van een ‘gewone’ botterbloeme:

Fokke gaot, Hendrik komt

25 mei 2015 door Redaktie

Links Fokke Bron, rechts Hendrik Fokkema (foto: Sietske Bloemhoff)

Op de jaorvergeerdering van de Stellingwarver Schrieversronte wodde ofscheid neumen van bestuurslid Fokke Bron van Munnikeburen. Fokke had al weer zes jaor in et bestuur zeten en daormit was et maximum tal jaoren dat daorveur staot berikt. Bi’j de Schrieversronte is et een goed gebruuk dat een bestuurslid twie keer drie jaor diel uutmaekt van et bestuur. Alliend de veurzitter kan nog veur een dadde periode benuumd wodden.

Veurzitter Ype Dijkstra roemde de briede inzet van Fokke veur de stichting. Zo was hi’j veur verschillende zaeken inzetber, docht altied in verni’jende zin mit, mar stelde bi’jglieks ok zien loods beschikber as d’r es even meubilair tiedelik een eer onderkommen hebben moest.

Et bestuur was d’r in slaegd om op 20 meie een ni’j bestuurslid veur te dregen. Dat was de heer Hendrik Fokkema uut Sunnege. Fokkema wodde zonder tegenstemmen deur de Algemiene Raod van de stichting benuumd. Laeter dit jaor het redaktielid Jan Koops veur De Ovend een gesprek mit him.