4. Et Mientepad

door

Mientepad, Joke 1   Mientepad, 2

In Oosterwoolde kuj’, aj’ bi’j de sporthal weg naor de Snellingerdiek lopen of fietsen, gebruuk maeken van ‘Et Mientepad’. Et pad komt uut op et terrein van et aktiviteitencentrum De Miente.

Miente betekent neffens et Stellingwarfs Woordeboek ‘gezamenlijke weidegrond (vroeger), thans voornamelijk nog als terreinnaam tussen Noordwoolde en Berkoop. Mar in Donkerbroek en Noordwoolde is et ok bekend in de betekenis van  ‘gemeenschappelijke bleek’. Noordwoolde kent nog een dadde betekenis en dat is ‘deel van het kerkhof waar mensen werden begraven die zo arm waren dat er uit hun bezit geen graf kon worden betaald’.

Joke Brouwer uut Oosterwoolde stuurde veur de rebriek ‘Stellingwarfs in et wild’ de foto’s van Et Mientepad op.

Et gaot best mit de sutelaktie!

door

Anneke en Harmen, sutelen 15

Et gaot best mit de sutelaktie van de Stellingwarver Schrieversronte. Die aktie is now krek over de helte, d’r zullen now nog drie aovens suteld wodden. Dat zal wezen op maendag 7, woensdag 9 en maendag 14 september in o.e. Makkinge, Waskemeer, Appelsche, Blesdieke en Noordwoolde. Maendag 14 september is een extra aovend, omreden de sutelders een peer aovens last had hebben van de regen.

De aktie leverde an now toe roem € 7.500,- op, en daor is iederiene slim wies mit. Toppers in de verkoop bin de Stellingwarver Spreukekelender, de roman Een vrouw van ivoor van Johan Veenstra, et boek Jongesjaoren van Gerrit Hof en de verschillende routegidsies.

Op de foto staon Anneke Koopstra en Harmen Houtman klaor om mit een kroje vol boeken Noordwoolde-Zuud in te gaon. (Foto: Sietske Bloemhoff)

3. De Ni’je Stienze

door

Ni'je stienze, Johan

In Ni’jhooltpae staot een mooi MFC. Hiel mooi is ok dat et MFC daor een Stellingwarver naeme het, et hiet De Ni’je Stienze. ‘Ni’j’ omreden ieuwen leden d’r in Ni’jhooltpae een stienze staon het. Die stienze Friesburg, die an de Friesburgerweg ston, wodde eerder  Lemenburg of Leemburg nuumd. De stienze wodde spietig genoeg ofbreuken, dat moet al véúr 1780 gebeurd wezen. De onderstaonde tekening van de stienze is van Jacobus Stellingwerf en zal zo rond 1720 maekt wezen.

Veur de rebriek ‘Stellingwarfs in et wild’ maekte Johan Veenstra van Ni’jhooltpae een foto van De Ni’je Stienze.

Oude afbeelding van de State uit 1722 van J. Stellingwerf

Fries-Stellingwarver aovend op 18 september

door

Sjoukje

Sjoukje Oosterloo schreef an now toe twie verhaelebundels:’Malle meraokels’ en ‘Warkieslappe’ (foto Sietske Bloemhoff)

Vanwegens de Stellingwarver sutelaktie en de Friese boekemaond orgeniseren de Fryske Krite in Oosterwoolde, de biebeltheek  en de Stellingwarver Schrieversronte opni’j een gezaemelike literaire aovend. Die aovend is op vri’jdag 18 september in de biebeltheek van Oosterwoolde. De Stellingwarver schriefster Sjoukje Oosterloo zal uut eigen wark veurlezen, wiels de Friese schriever en verhaeleverteller Mindert Wijnstra een tal van zien verhaelen vertellen gaot.

Et is ondertussen veur de dadde keer dat in dit saemenwarkingsverbaand een literaire aovend orgeniseerd wodt. In 2013 vertelden de schrievers Johan Veenstra en Douwe Kootstra uut eigen wark, in 2014 vertelde Auke Zeldenrust over zien boek ‘Dorp achter tralies’ en vertoonde Jan Koops een PowerPoint over de dörpen van Oost-Stellingwarf n.a.v. et boek ‘De dörpen van Stellingwarf in oolde beelden’. Veur beide aovenden was ommeraek veul belangstelling, zodat besleuten wodde om ok in 2015 een gezaemelike aovend te orgeniseren. Tiedens de aovend zorgt boekhaandel Bruna veur een Fries-Stellingwarver boekekraom. Et pergramme van 18 september begint om 20.00 ure, de toegangspries is veur leden van de Krite, biebeltheek en Schrieversronte € 5,00, eren betaelen € 7,50.

Foto van de maond

door

Regeboge, '15

Zaoterdag 29 augustus was et schitterend weer, zo an et aende van augustus. Mar eerder disse weke was et ok wel es even eers. Mit now en dan dikke bujjen, en dan weer zunne. En soms levert zoks dan weer een mooie regenboge, en soms ok twieje, op. In Oosterwoolde was dat laeste et geval. Disse mooie foto daorvan wodde maekt deur Joke Dijkstra.