Op vri’jdagaovend 20 april wodt op ‘e Rizzerd de vierde Stellingwarver ienakteraovend holen in et kader van veertig jaor Stellingwarver Schrieversronte. De aovend is veur iederiene vri’j toegaankelik, de intree is ommenocht! Disse aovend zal de tenielklub van Der Izzerd De Vriendenkring twie ienakters naor veuren brengen: Et is allemaole de schuld van de katte, een deur Koosje Hornstra uut et Nederlaans vertaelde ienakter en Een schoon milieu kost een protte centen, een komische ienakter van Johan Veenstra. Daornaost zullen de Fying Stars van Hooltpae veur prachtige Stellingwarver lieties zorgen, mar de suksesvolle klub zal ok prachtige schetsies zien laoten uut heur pergrammes van de oflopen jaoren. De warkgroep Publiciteit van de Stellingwarver Schrieversronte zorgt butendat veur een grote verlotting daor aj’ tal van mooie priezen mit winnen kunnen. De aovend begint om 20.00 ure.
Stellingwarfpop 2012
Op zaoterdag 29 september zal veur de vuufde keer et Stellingwarfs popfestival Stellingwarfpop holen wodden. Dit keer is et festival in Berkoop op de Doevekaampe. Stellingwarfpop begint aovens om zeuven ure en duurt tot middernaacht. De prissentaosie is krek as de veurige twie keer in hanen van Coen Speelman. Coen is behalven meziekkenner ok drummer van de an de weg timmerende band A liquid landscape.
Om an Stellingwarfpop mitdoen te kunnen moet an een peer veurweerden voldaon woddden. Zo moet in elk optreden op zien minst ien Stellingwarfstaelig nommer naor veuren brocht wodden. Dat nommer moet oorspronkelik wezen, dat gelt niet alliend veur de tekst mar ok veur de meziek. Een deskundige jury zal uutmaeken wie veur et beste/origineelste/mooiste en ni’jste Stellingwarver lied zorgde. Veur de winner wodt een mooie geldpries beschikber steld.
An Stellingwarfpop kun zeuven bands, singer/songwriters, rappers en zo mitdoen. Op dit mement hebben heur al twie acts opgeven. Anmellen kan tot 1 september. Bands die graeg mitdoen willen kun heur anmellen bi’j de Stellingwarver Schrieversronte in Berkoop. Dat kan deur even te bellen naor 0516-451108, mailen kan ok , naor info@stellingwarfs.nl. (Laeter meer…)
Kursus Gedichten schrieven
Op donderdagaovend 27 september begint in et gebouw van de Stellingwarver Schrieversronte in Berkoop een kursus Gedichten schrieven. De kursus bestaot uut vier aovens en wodt geven deur neeerlandikus Peter Riksma uut Zaandpol (bi’j Emmen). De kursus zol al eerder geven wodden, mar deur verschillende oorzaeken is dat niet gebeurd.
Bi’j de kursus gaot et dus om et schrieven van gedichten; waor kriej’ dan allemaole mit te maeken, wat veur perblemen kuj’ integen kommen. Tiedens de kursusaovens is d’r daoromme veul ommedaenken veur aspekten die mit et schrieven van poëzie te maeken hebben. Een peer daorvan bin: moet poëzie altied riemen, vorm en inhoold, zin en historie, riemschema’s, daenken in beelden, kompesisie, et onderwarp, foefies bi’j et dichten, schrieven in de praktiek en publiceren.
De kursus wodt in et Stellingwarfs geven, mar et schrieven kunnen van de Stellingwarver tael is om disse kursus volgen te kunnen, gien vereiste. Alle kursusaovens (27 september, 4, 11 en 18 oktober) bin van 19.30 – 21.30 ure. De kosten bin € 50,00 per persoon, daor bin de koffie en thee, mit wat d’r bi’j, bi’j inbegrepen. Anmellen kan op et kantoor van de Stellingwarver Schrieversronte in Berkoop deur even te bellen naor 0516-451108, mailen kan vanzels ok naor info@stellingwarfs.nl.
Welkom in et mooie Stellingwarf
O.e. op de webstee van de kraante Stellingwerf is te lezen dat d’r op de welkomstbodden bi’j de perveensiegreens in Noordwoolde-Zuud een Stellingwarver tekst te lezen is. Op de bodden bi’j O0st- en Westvierdepatten staot op een A-viertien de volgende tekst: Jim bin hattelik welkom in et mooie Stellingwarf. Toeval of niet, schrift de Stellingwerf-webstee, mar de tekst moet opplakt wezen op de dag dat de Stellingwarver Schrieversronte zien 40-jaorige jubileum officieel vierde. Dat was op donderdag 5 april in ’t Vlechtwark in Noordwoolde. Doe de Friestaelige toegangsbodden indertied plaetst wodden kwammen daor liekewel aorig wat reakties op. Stellingwarfstaelige bodden zollen veul meer veur de haand legen hebben. Daor is now dan bliekber veur zorgd!