In april wodde bi’j et Stokersverlaot in Appelsche een biezunder monement onthuld. Et is onderdiel van de zonuumde Liberation Route, een herdaenkingsroute angaonde de Twiede Wereldoorlog. In Appelsche zorgde de Historische Veriening veur dit monement. Op et bod is in vier taelen, waoronder et Stellingwarfs, et volgende te lezen:

Tiedens de Twiede Wereldoorlog ston Frieslaand d‘r omme bekend dat et een rustige perveensie en goed onderduukparredies was. Mar ok hier was spraoke van geweld, verzet, verraod, vervolging, verwoestings en wodden meensken doodscheuten. Nao de lochtlaandingsopperaosie Armherst kwam in Zuudoost-Frieslaand de bevri’jding op gang. In de naacht van 7 op 8 april laanden hier zoe’n 700 Fraanse parresjutisten. Een tal kwam terechte op ’e greens tussen Drenthe en Frieslaand, in de buurt van Appelsche.

(Foto’s en gegevens: Akkie Zeilstra)

Venekoten heurt niet tot de ooldste buurtschoppen bi’j Oosterwoolde. Mar de naeme wodde al wel in 1543 nuumd, en al veul en veul moet d’r in dit gebied bewoning west wezen. Dat bleek doe d’r hier in 1933 zaand wunnen wodde en d’r een tal bleien en klokbekers vunnen wodde deur anneteur-archeoloog Jan Hendrik Popping.

Van alle buurtschoppen van Oosterwoolde bin now de infobodden mit teksten in et Stellingwarfs in disse rebriek plaetst. Van iene nog niet. En dat kan ok (nog) niet, want bliekber is indertied et infobod veur die buurtschop vergeten. Om welke buurtschop et gaot? Jardinge! En laot daor now krek de veurzitter van de SSR wonen… Hi’j zal d’r wark van maeken, het hi’j kotleden angeven… Want dat dit zo niet kan, daor weren we et vanzels mitien over iens! (Foto’s en tekst: Sietske Bloemhoff)