Op twie spandoeken wodt et straottheater De Verdwenen Peerden ankondigd; an de retonde bi’j Makkinge en bi’j de Doevekaampe in Berkoop. Et straottheater is hielemaole in et Stellingwarfs en wodt op 3 en 4 augustus opvoerd in Ni’jberkoop en Berkoop.
165. ’t Kragelhuus
Henk Jager van Berkoop zag, doe hi’j onderwegens was veur zien warkgever It Fryske Gea, opni’j et gebruuk van et Stellingwarfs butendeure. Dit keer op een naembod van een bedde-en-broggiengelegenhied an de deurgaonde weg in Buil.
Stellingwarf in Vierdaegse Nijmegen
Netuurlik doen d’r alle jaoren ok Stellingwarvers mit an de Vierdaegse van Nijmegen. Da’s gien ni’js. Mar mooi is et vanzels wel as dielnemers zien laoten waor ze wegkommen. En mit riegelmaot laoten ok Stellingwarvers dat zien. Zo kuierde een peer jaor leden Geert Dekker mit zien kollegakuierders uut Wolvege de tocht in shirties mit een Stellingwarver tekst. Dit jaor dee Arie den Blanken van Makkinge, hi’j is o.e. lid van de Raod van Advies van de Stellingwarver Schrieversronte, mit en hadde de Stellingwarver vlagge van Oost an zien rogzak hangen. Bi’j ankomst op de laeste dag stak hi’j liekewel de vlagge in top van een hanteerbere vlaggemast, zodat zien bruur him herkennen zol. En dat lokte, want die maekte disse foto!
Ni’je roman van Johan Veenstra prissenteerd
Vri’jdagaovend kwam de zeuvende roman van Johan Veenstra ’Vroeger is veurgoed veurbi’j’ uut tiedens een literaire aovend in mfc De Ni’je Stienze in Ni’jhooltpae.
De schriever gaf et eerste exemplaor an Sippy Tigchelaar die bi’j Omroep Frieslaand warkt het en indertied bi’j Veenstra thuuskwam om zien radioverhaelties op te nemen. Johan Veenstra vertelde anslutend op indrokwekkende wieze over een pat uut zien ni’je roman, zodat de ongeveer tachtig meensken die de aovend mitmaekten veur een groot diel et boek mitien anschaften. Veenstra wodde tiedens de aovend interviewd deur neerlandikus Peter Riksma uut et Drentse Zaandpol, mar van vroeger uut Wolvege. Et doel is dat een diel van dit interview laeter dit jaor plaetst wodden zal in et Stellingwarfs tiedschrift ’De Ovend’.
Veur meziek zorgde de Grunninger Jan Henk de Groot uut Hoogezaand. Ok dat bleek een schot in de roze te wezen; zien optreden, mit o.e. et bekende ‘De mama van Michel’, wodde ommeraek wardeerd.
Schrieversronteveurzitter Klaas van Weperen eupende en sleut de aovend en vertelde o.e. over de aktiviteiten van de SSR die d’r de kommende tied an zitten te kommen, zoas kommend weekaende et straottheater De Verdwenen Peerden, op 1 september de prissentaosie van et boek van Freddie de Vries, de sutelaktie vanof 3 september en de première van de film ‘Daor klept de klokke weer’ op 13 september.
(Foto’s: Lenus v.d. Broek)
NOG KAORTIES VEUR DE VERDWENEN PEERDEN OP 3 AUGUSTUS!
De kaorties veur et straottheater De Verdwenen Peerden op zaoterdag 4 augustus bin naogenoeg uutverkocht. Dat gelt niet veur vri’jdag 3 augustus; via info@stellingwarfs.nl kuj’ nog kaorties risserveren. Et is an te raoden om dat vandaege of morgen mitien te doen! De kaorties kosten € 15,00, daor is de picknick onderwegens bi’j inbegrepen.