In et plak Ooldemark komt de straotnaeme Zieltjes veur. Et woorddiel ziel betekent ‘sluus’, zoas dat bi’jglieks ok veurkomt in de plaknaeme Schoterziel / Schoterzijl. Meerdere naemen in de omgeving herinneren an de eerdere vervening en et turfstikken, zoas ok de naeme Telwal. Zoe’n wal hadde een waeterkerende funktie. De naeme Zieltjes zol aenlik in geef Stellingwarfs Zielties west hebben moeten… (Foto en gegevens: Hans Salverda)

In Else zag Hans Salverda laestdaegs et bussien van een straotemaeker staon, mit daorop de naeme van zien bedrief d’Olde Smilde in et Stellingwarfs angeven.

Hans Salverda het hier grif even mooi zeten doe hi’j disse foto maekt het. Et baankien staot bi’j camping ‘Oude Willemsveldt’ in et Drentse pat van de buurtschop Oolde Willem bi’j Appelsche.

’t Naber-huus is de naeme van een huus in Sunt Jaansklooster. Et dörp wodt ok wel ’t Klooster nuumd. Zo te zien ston d’r hier in 1667 al een huus. Dat is al een jaormennig leden! Ik hebbe gien idee waor de naeme wegkomt. Zol Naber hier een femilienaeme wezen kunnen? Die et wet, mag et zeggen! (Foto’s en tekst: Johan Veenstra)

In Vledder hiet et gebouw daor et döpshuus en een kefé-resteraant in zitten De Tippe. Een tippe kan een hoeke wezen van een taofel of een laeken. Een tippe grond kan ok. Misschien lag hier in vroeger daegen wel een hoekige stroke grond en dat et gebouw daoromme disse naeme kregen het. Ik wete et niet, et is mar een idee. (Foto’s en tekst: Johan Veenstra)