De Menkaampe is een hiele mooie Stellingwarver naeme van de menverieninge van Noordwoolde op ’t West van Noordwoolde. Henk Jager van De Blesse zorgde veur de foto en gegevens.

In de baarm veur een verkavelingsboerderi’je in de Niekspoolder bi’j Blesdieke zag Henk Jager van Blesdieke disse vlagge. Et is wel dudelik waor de zuvelboerinne weg komt: Uut Blesdieke! D’r is hier ok een rustpunt om even an te stikken veur een koppien koffie of zoks-zo-wat.

Hans Salverda van Zorgvlied fietst ommeraek graeg, en maekt onderwegens mooie foto’s veur onder eren disse rebriek. As hi’j dan weer zowat an huus toe is mag hi’j nog wel es even anstikken bi’j de gezellige camping De Hertenweide in zien woonplak. Daor kuj’ gewoon Drents en ok Stelligwarfs praoten. De tael van Zorgvlied en wiede omgeving vaalt taelkundig onder et Stellingwarfs, mar et is vanzels begriepelik dat et op dit plak Drents nuumd wodt!

Bi’j de iesbaene van Ni’jlaemer staot sund kotten een bod mit et gedicht Bekentenis van Johan Veenstra d’r op. Dat is in et kader van et grote keunstperjekt Iisbaan yn’e maaitiid. D’r is een peer jaor leden een boek uutkommen mit dezelde titel bi’j uutgeveri’je Louise in Grou. Daor staon foto’s en  ofbeeldings van schilderi’jen in van iesbaenen in Frieslaand. Plus gedichten over dat thema. D’r bin now ok een tal fietsroutes uutgeven die bi’j alderhaande iesbaenen langesgaon. En bi’j die iesbaenen staon gedichten uut dat boek. Et gedicht van Johan Veenstra is zodoende koppeld an de iesbaene van Ni’jlaemer.

De Stichting Naobuur in Vledder is opricht om een brogge te slaon tussen de burgers, oold en jong, en alle zorginstaansies. Et warkgebied van de stichting beslat de volgende dörpen en buurtschoppen: Vledder, Vleddervene, Frederiksoord, Wilhelminaoord, Ni’jesliek, Doldersum, Zorgvlied, Waoteren en Oolde Willem. (Foto’s en tekst: Johan Veenstra)