Foto van de maond

door

print ree sietske

Op StellingPlus is mit riegelmaot prachtig wark van netuurfotograaf Ruurd Jelle van der Leij te zien. Ok disse ‘Foto van de Maond’ wodde deur him maekt.

Wie meer van zien prachtige netuurfoto’s zien wil, kan vanzels kieken op zien webstee www.rjvanderleij.nl. Veur wie et misschien niet wet: Ruurd Jelle verzorgt ok schitterende lezings angaonde de Stellingwarver voegelwereld, waorbi’j hi’j vanzels ok ommeraek veul van zien unieke foto’s zien lat. Wie veur zien verieninge of klub Ruurd Jelle boeken wil, jim kun him berieken deur te mailen naor rjvanderleij@gmail.com of deur him te bellen: 0630253737.

 

Verlotting ni’j boek WINTERWILLE

door

 Veur kiender: verlotting tien eerste winterboeken Winterwille

De prissentaosie van Winterwille, et ni’je winterboek veur kiender, is op woensdagmiddag 20 november bi’j de boekwinkels The Readshop in Wolvege en Bruna in Oosterwoolde. Veur dit biezundere feest kun kiender van vier tot dattien jaor naor de winkels kommen waor tussen 15.30 en 16.30 ure vufe van de ni’je boeken verlot wodden. Daornaost zorgt de Stellingwarver Schrieversronte, de uutgever van et boek, veur nog meer aorige priezen. Alle kiender die kommen kriegen ok een biezundere bouwkleurplaete of een puzel mit, daor, nao inlevering, ok nog mooie priezen mit te winnen binnen. Tiedens et uurtien zullen de verschillende mitwarkers an et boek wat uut eigen wark veurlezen of zien laoten.

print haas sietske

Foto: Ruurd Jelle van der Leij 

An et boek Winterwille warkten mit mekeer acht schrievers mit van wie de meersten al langer doende binnen mit et schrieven van verhaelen, riempies of strips veur kiender. In et boek op A-4 fermaot staon verhaelen, gedichten, striptekenings, foto’s, spullegies, puzels, kleurplaeten en zo henne. Veur die grote verscheidenhied an onderwarpen zorgden Herma Egberts, Nanda van Gestel, Xavière Kolk, Ruurd Jelle van der Leij, Christine Mulder, Sjoukje Oosterloo, Frank Spijkers, Freddie de Vries en Sietske Bloemhoff. Veur de opmaek van et boek zorgde Herma Egberts van Klare Kijk uut Berkoop. Et boek telt 112 bladzieden en kost € 12,95, de drok is verzorgd deur Printbase uut Suntjehannesge.

Praotgroep Stellingwarfs

door

Op maendag 4 november gong in Berkoop de konversaosiekursus ‘Praotgroep Stellingwarfs’ uut aende. De Praotgroep is veural bedoeld veur meensken die et Stellingwarfs mondeling nog niet zo machtig binnen. Deur tiedens de kursus op verschillende menieren de tael mondeling goed te oefenen, hopen de kursisten op een goed eindrisseltaot. De meerste kursisten geven an et vremd te vienen, dat ok al geven ze an veural Stellingwarfs tegen heur te praoten, dat vaeks toch niet gebeurt. Om die reden wodde al vaeker vraogd naor de meugelikhied om mit te doen an een konversaosiekursus.  De ‘Praotgroep Stellingwarfs’ is opzet en wodt geven deur Sietske Bloemhoff en Ypie v.d. Boer, zeuven kursisten doen mit an disse eerste Praotgroep.

AFTER PEGGY wint Stellingwarfpop

door

After Peggy winner Stellingwarfpop 2013, Makkingester Shady Lane twiede

DSC_2430, After Peggy

After Peggy (foto: Lenus v.d. Broek)

, Shady Lane

Shady Lane (foto: Lenus v.d. Broek)

Roem honderd meensken kwammen zaoterdag 9 november of op et popfestival Stellingwarfpop. Et festival dat orgeniseerd wodt deur de Stellingwarver Schrieversronte, wodde holen in et dörpshuus van Makkinge. Spietig genoeg was deur ziekte van zangeres Sietske Sytsma et duo Rosie Kills uutvalen, zodat vuuf bands in anmarking kwammen veur de priezen.

De jury bleek veur alle optredens veul wardering te hebben. De priezen gongen liekewel naor ‘The After Midlife Group (dadde pries), Shady Lane (twiede pries); winner wodde After Peggy mit et lied ‘Zin’.

De jury beston uut Klaas Ozinga (Makkinga), Peter Riksma (Zandpol) en Kjest Herder (Oosterwoolde). Op vri’jdagaovend 22 november zullen dielen van et festival, waoronder de Stellingwarver lieties, op Omroep Odrie te heuren wezen tussen 7 en 8 ure.  Hieronder volgt de tekst van et winnende lied:

 

Zin

Tekst en meziek: Ewout Kroes

Doe ik deur de straote leup

Zag ik jow daansen in et schaad

Waachtend op waarmte en liefde

 

En ik leup jow leven in, gaf jow dat wat ik had

We zaggen de maone en de steerns

‘k Was niet eerder zo verliefd

 

Refrein

Liefde geft zin an ‘t leven, zoas we leven gaon we uut de tied

Liefde geft zin an ’t leven, dus wees niet benauwd, en schaem je niet

 

We daansten, hullen mekeer beet in jow huus

Nooit eerder vuulden we oons zo thuus

 

En we blieven now veur altied bi’j mekeer

Oonze hatten slaon as ien, elke keer weer

Drinken wien, vri’jen, hieltied opni’j,

Ik bin van jow en ie bin van mi’j

 

Refrein

Liefde geft zin an ‘t leven, zoas we leven gaon we uut de tied

Liefde geft zin an ’t leven, dus wees niet benauwd, en schaem je niet

Kommende zaoterdag in Makkinge: Stellingwarfpop 2013!

door

Ok al doen de dielnemers an Stellingwarfpop veural mit vanwegens de altied gezellige sfeer, de spanning is ondertussen ok best te vernemen. Wie zol dit jaor veur et beste Stellingwarfstaelige lietien zorgen en wie zorgde daorbi’j veur de mooiste meziek? Et is veur de orgeniserende warkgroep now al dudelik dat de uut drie personen bestaonde jury et bi’j et beoordielen van de zes spiksplinterni’je lieties niet makkelik kriegen zal. Veur de drie beste lieties stelt de orgeniserende Stellingwarver Schrieversronte drie geldpriezen beschikber.

De volgende bands doen zaoterdagaovend mit: Rosie Kills, The After Midlife Group, Shady Lane, Spirit of the dark, ‘k Wait Nait en After Peggy. Tiedens et juryberaod an et aende van de aovend is d’r een speciaol optreden van de winner van veurig jaor, Serge Epskamp.

Stellingwarfpop wodt kommende zaoterdagaovend holen in et dörpshuus van Makkinge. Et festival begint om half achte, de toegang is gratis.

The After Midlife Group

Op de foto: De West-Stellingwarver fermaosie The After Midlife Group dot veur de twiede keer mit an Stellingwarfpop.