In een woonwiek in Wolvege, an de oostkaante van et spoor, hebben de straotnaemen Stellingwarver naemen die te maeken hebben mit et netuurgebied Rottige Miente an de westkaante van Wolvege. Een peer eerdere veurbeelden in disse serie: De Foeke (54), De Miete (82) en De Barte (222). En hier dan De Snikke. Een snikke was een boot veur et vervoer van meensken, dieren en bosschoppen. Et peerd kwam in vroeger tieden in de liende veur de snikke. (Foto en tekst: Johan Veenstra)

In Wolvege staot an de Keiweg een groot gebouw daor jeugdhonk De Schaekel in onderbrocht is. Een mooie naeme veur aj’ meensken mit mekeer in kontakt brengen willen. (Foto’s en tekst: Johan Veenstra)

De Veurdele is de naeme van een straote in Ni’jvene. Hans Salverda zag dat en maekte d’r een foto van. Eerder is in disse rebriek de naeme ok al es opneumen, want zo hiet ok de kringloopwinkel in Noordwoolde.

An de Brink in Dwingel staot resteraant/pankoekeboerderi’je De Zaagkoele. Et is een oolde boerderi’je uut 1837. De boer die d’r indertied woonde, hadde een koele naost de deure. Daor koj’ waeter uuthaelen as d’r braand uutbreken moch. De man was trouwens ok nog timmerman, hi’j zaegde plaanken van bomen. En dan kriej’ dus de naeme De Zaagkoele. (Foto’s en tekst: Johan Veenstra)

Kwikkels is een diels onverhad weggien/reed in de buurtschop Witte Peerden. Henk Jager leup hier kotleden langes, want et was diels te modderig om te fietsen. De naeme zol et meervoold wezen kunnen van et woord kwikke. Dat is neffens et Stellingwarfs Woordeboek een twieg uut de kop van een iekenboom. Bi’j et pad langes hej’ in ieder geval boswallegies mit o.e. stobben en overstaonders van ieken.