401. De Tille

door

In de buurtschop Medhuzen bi’j Oosterwoolde staot an de Rijweg een bod van een historische route om Appelsche, De Fochtel en Raevenswoold henne. Die route is een prachtig initiatief van de saemenwarkende dörpen Raevenswoold, Appelsche (inkl. Appelsche-Boven) en De Fochtel. Op et bod wodt hier en daor ok Stellingwarfs bruukt, en dat vienen we netuurlik ok hiel mooi. Et zol liekewel nog mooier west wezen as dat konsekwent gebeurd was. Zo wodt de buurtschop Medhuzen in et Nederlaans vermeld, mar De Tille in et Stellingwarfs. Et Grootdiep wodt twie keer nuumd, ienkeer mit de juuste schriefwieze, en ien keer as Groot Diep. Ok de infermaosie angaonde de Boven-Kuunder is, is krek as de naemsanduding d’r van, wat onzorgvuldig gebeurd. Zoks is vanzels dan toch wel wat spietig… (Foto’s en tekst: Sietske Bloemhoff)

Nedersaksisch

door

Zoas in Stellingwarf et Stellingwarfs beheurlik veul in et eupenbaor bruukt wodt – intied staon d’r in de rebriek op disse webstee Stellingwarfs in et ‘wild’ al 400 veurbeelden daorvan – in ere Nedersaksische regio’s is et niet eers! Annie Dedden uut Wolvege, die ok nogal es foto’s veur Stellingwarfs in et ‘wild’ instuurt zag kotleden de volgende veurbeelden daorvan in de omgeving van De Lutte in de gemiente Losser in Twente. Op iene van de foto’s kuj’ zien dat daor de overkoepelende Nedersaksische stuurgroep Nedersaksisch leeft en verbindt zorgde veur et plaetsen van een Twentse weens. Ok de Stellingwarver Schrieversronte is in die stuurgroep vertegenwoordigd.

De oflopen daegen stuurde Annie nog wat veurbeelden van Twentse teksten in et eupenbaor. Zoas Un kussie en dan goan, da’s de variaant van die wi’j hier bi’jomme kennen: Tuut en d’r uut! Jim zien wel: in et Twenst schrieven ze oa in plak van ao. Da’s aenlik wel jammer, want in alle ere Nedersaksische regio’s schrieven ze, krek as oons, ao. Et zol arg mooi wezen as Twente dat ok doen gaon zol… In de gemiente Losser staon ok bodden mit spreuken, zoas twieje daorvan te zien binnen op de laeste beide foto’s. Zol zoks now ok niet slimme aorig wezen in Stellingwarf? Ja, toch?

400. Bruunsmapattien

door

Nommer 400 (!) in disse serie, waor we in zien laoten waor en hoe et Stellingwarfs in et eupenbaor bruukt wodt, is Bruunsmapattien op ‘e Rizzerd. In de serie zaggen we wel es eerder dat een eigennaeme bruukt wodde veur een ‘straotnaemebottien’, zoas nommer 51 mit Slagers Laene. Disse foto wodde nog niet zo lange leden maekt deur Hans Salverda.

399. De Iekhof

door

In Waoteren staot de mooie en toepasselike naeme De Iekhof op een huus op ‘e hoeke van de Hogeweg en de Lange Drift. Zoas jim zien kunnen staon d’r om et huus henne staon hiel wat ieken! (Foto en gegevens: Hans Salverda)