291. d’ Olde Tuunderije

door
d’ Olde Tuunderije is de Stellingwarver naeme van een tuunbedrief an de Keuningin Wilhelminalaene in Willemsoord.
Op iene van zien fietstochies in die mooie streek zag Henk Jager van De Blesse dit bod en maekte d’r een foto van. Zoas we et vaeker tegenkommen in disse serie is ok hier et woord ‘olde’ bruukt in plak van ‘oolde’.

290. ’t Boskefé Kobus

door
Bi’j camping Zonnekamp in Zorgvlied heurt Boskefé Kobus. Ik ston daor jaorenlaank in de grote zael mit mien boeken op ’e hobbymark op Twiede Pinksterdag. Spietig dat corona de laeste twie jaor roet in et eten gooid het. Over de hiele gevel van et kefé staot een tekst in et Stellingwarfs. ’t Boskefé Kobus… een biezunder plakkien    Bliede daj’ d’r binnen! Veur een happien en een draankien  Die tekst was niet in iene foto weer te geven. (Foto’s en tekst: Johan Veenstra)

289. Buttinge

door
Bi’j nommer 283 gaf ik al an dat d’r rond Oosterwoolde een flink tal buurtschoppen te vienen binnen. Bi’j elke buurtschop staot een arg mooi infermaosiebod mit tal van gegevens over die buurtschop. De naeme van de buurtschop, liekegoed as de meerste infermaosie op et bod, is in et Stellingwarfs. Al was die op et bod in de buurtschop Buttinge niet best te lezen doe ik daor kwam… Et bod is op et mement aorig gruun uutsleugen, dat daor moet even een soppien an te passe kommen om alles weer leesber te maeken. A’k die kaante opkom za’k daor wis en zeker even veur zorgen!
(Tekst en foto’s: Sietske Bloemhoff)

288. ’t Pennekaampie

door
Disse foto van et bottien mit de mooie Stellingwarver naeme ’t Pennekaampie wodde maekt an de Baorsweg in de buurtschop Baors. De naeme op et bottien is die van een camping. Baors ligt in de gemiente Stienwiekerland, waorvan de tael dus, krek as die van et zuudwesten van Drenthe, taelkundig bi’j et Stellingwarfs heurt. De foto wodde instuurd deur Henk Jager uut De Blesse die tussen zien thuuswark deur even een fietstochien in de omgeving maekte en doe dit bottien zag.

287. Uutblaosbaankie

door

‘Ik zit op dit baankien in Wapservene en bin onderwegens naor de Doeze in ’t Holtingerveld. Ik bin an de gang om de boekprissentaosie te regelen op vri’jdagaovend 24 september in Zorgvlied om half achte.’ Dat gaf Hans Salverda laest an doe hi’j drok was mit et orgeniseren van de prissentaosie van zien boek Groot Wateren Een oase van weldaad. Hi’j stuurde mitien een foto van et baankien mit.

Omreden de tael van et zuudwesten van Drenthe taelkundig onder et Stellingwarfs vaalt, nemen we in disse rebriek ok Stellingwarver naemen, die in die streek in et eupenbaor bruukt wodden, mit. Etzelde gelt trouwens veur de tael van et noordwesten van Overiessel; et gaot dan om et gebied dat meerstentieds de ‘Kop van Overiessel’ nuumd wodt..