De naeme van dit straantien an De Lende kregen we toestuurd van Wolly Huinink van Wolvege. Ze vertelt daorbi’j: ‘Hiel vaeke fietsen we over et prachtige fietspad langs De Lende en dan kommen we ok langs dit straantien. Sund kot hiet dat Wiegers straantien.’
235. Piet zien kraom
Nommer 88 in disse mooie serie is Bennies Kraom in Blesdieke, daor aj’ o.e. nustkassies kopen kunnen. Annie Dedden zorgde indertied veur die naeme. Ik fietste vandemiddag (13 juni 2020) over de Sepiepenlaene (Lijsterbeslaan) in Blesdieke en zag daor… Piet zien kraom. Daor kuj’ ok nustkassies kopen. Dit moet dezelde kraom wel haost wezen, zoj’ zo zeggen. Mar… de naeme is veraanderd. (Foto’s en tekst: Johan Veenstra)
Stellingwarfs op podcasts veur jong en oold
Podcasts is de laeste jaoren beheurlik in opkomst. De hieltied meer meensken maeken daor –daankber – gebruuk van. Want ommes, ie kun zéls bepaolen wanneer aj’ naor een bepaold onderwarp luusteren willen, en ie hoeven niet op een tiedstip te waachten dat d’r op ’e radio of tillevisie ommedaenken veur is.
Podcasts bin d’r in alderhaande soorten en ok de duur d’r van is hiel verschillend. Van boeken, luusterverhaelen, meziek tot ni’js en aachtergrondinfermaosie, soms kot en soms aorig lang van tiedsduur. Ok veul radiopergrammes kuj’ onderhaand weerommeheuren via een podcast.
De Stellingwarver Schrieversronte is al een schoffien doende mit de ontwikkeling van podcasts. De eersten daorvan bin plaetst op de webstee Stellingplus.nl, en daor kuj’ ze op twie menieren vienen: bovenan in de thuusbladziede en in de linkerkolom. Daor is mitien ok de onderverdieling te vienen.
An now toe bin alle uutzendings van et streekkulturele radiopergramme ‘In Twielochten’ plaetst, en et eerste wat langere verhael. Dat verhael gaot over de Stellingwarver struukrover van eertieds: Jan Hut.
D’r wodt warkt an meer podcasts mit verhaelen en boeken veur jong en oold, mar deur et coronavirus wo’n d’r op dit mement gien opnaemen maekt. Et plaetsen van ni’je podcasts zal daoromme nog even duren.
