229. Peerdemaegien Anneke 50 jaor
Vandaege 13 meie 2020 is Schrieversrontemitwarkster Anneke Steenbeek 50 jaor wodden. Dat is veur iederiene die dit bod veur heur huus staon zicht wel dudelik! Dat Anneke heur inzet veur et Stellingwarfs, daor zal ok gieniene an twiefelen… En dat gelt wis en zeker ok veur de maekers van dit prachtige bod! Anneke, ok zo nog even: VAN HATTE FIELSETEERD!!
De tied veuruut mit de ni’je Stellingwerver Spreukekelender 2021!
Veur iederiene die graeg op tied is en ok graeg bi’j de tied blift, is d’r goed ni’js. Want de ni’je Stellingwarver Spreukekelender veur ankem jaor 2021 is oflopen weke al verschenen! De mitwarkers hebben opni’j veur een arg ofwisselende kelender zorgd mit tal van aorige verhaelen, gedichten, wies- en wetensweerdigheden, en gao mar deur. De mitwarkers an de kelender van 2021: Roely Bakker, Harmen Houtman, Kees Koopstra, Attie Nijboer, Sjoukje Oosterloo, Jaap Sikkema, Tuller en Stella Werf. De koördinaosie en saemenstelling was krek as veurgaonde jaoren in hanen van Sietske Bloemhoff.
In de kelender is ok oolder wark te lezen, zoas verhaelen en gedichten uut et Stellingwarver tiedschrift ’De Ovend’, dat onderhaand al krapan vuuftig jaor bestaot. Daornaost bin d’r alderhaande aorige en vermaekelike taelstokkies in de kelender opneumen, d’r staot een hiele riegel grappies in, en d’r bin tael- en fotopuzelties in opneumen! De foto van een mooie boom in et Fochtelervene veurop de kelender is maekt deur Ype Dijkstra van Oosterwoolde.
De Stellingwarver Spreukekelender verschient sund jaor en dag bi’j uutgeveri’je Van de Berg in Almere. De kelender is te koop bi’j de boekwinkels in Wolvege en Oosterwoolde, en bi’j de Stellingwarver Schrieversronte in Berkoop (info@stellingwarfs.nl).