Ni’js – Pagina 166 – StellingPlus.nl

Gratis en veur niks! (Een ni’j verhael van Sjoukje Oosterloo)

25 februari 20202 juni 2016 door Redaktie

Gratis en veur niks!

Wiels ik genoeglik mien middagmaol naor binnen zit te warken heur ik de brievebusse klepperen. Et zal wel weer reklame wezen daenk ik bi’j mezels, dat wodt een stokmennig keren in de weke mit grote pakken deur de brievebusse drokt. Die pakken bin zo dikke dat ze mar krek deur de busse passen. En as et now es wat biezunders is, mar nee heur, alle weken wodt d’r weer etzelde goed anrikkemedeerd wa’k hielendal niet neudig bin. Bi’jglieks baankstellen, bedden en schoenen. Die winkels daenken zeker da’k iedere weke mar weer een ni’j baankstel of een bedde anschaffen gao. Now, mooi niet dus!

De middag is al halverwege as et me weer in de zin komt da’k de brievebusse heurd hebbe, zodoende kiek ik es even in de gang wat as d’r op ’e deurematte ligt. Et bliekt gien reklame te wezen, mar de postbode het zien ronde al daon zie ik. Een klein kevot en een hiele groteniene liggen daor mit heur beidend geduldig op mi’j te waachten. Ni’jsgierig pak ik et boeltien op en kiek es wie d’r an mi’j docht het. Et kleine kevot bliekt van mien ziekefoons te kommen. Wat kan dat now toch wezen, vraog ik me of. De drie maonden veur de ofrekinge die ik ieder vorrels jaor toestuurd kriege bin nog niet verstreken. Rap rits ik et kevot eupen en mien oge schöt over de tekst henne naor et bedrag dat hielendal onderan staot. Et bliekt da’k over et oflopen jaor nog ien euro en veertien centen betaelen moet veur mien eigen bi’jdrege. Sjongejonge, wat een alderheiseliksten groot bedrag, daenk ik schamper. De postzegel gelt nog meer as wa’k betaelen moete. Zoks hadden ze toch ok mit de eerstvogende rekinge verrekenen kund. Zo is et lak nog duurder as de brief, foeter ik.

Dan maek ik et onwieseliken grote kevot eupen en zie dat et van mien pensioenverieninge komt. Ze laoten me weten dat et d’r slecht veur staot wat de centeraosie anbelangt, mar da’k dit jaor nog wel etzelde bedrag uutbetaeld kriege as eerder. Hoe et toekem jaor komt weten ze nog niet, ik zol dan best wel es minder pensioen beuren kunnen, mar as de tieden mitvalen kan et ok wel mitvalen. Now wat een groot ni’js, hen! En dat in zoe’n levensgroot kevot! Ni’js waor as ik gien cent wiezer van worre. Et geld dat ze spendeerd hebben an die grote kevotten en bovendat ok nog an die dure postzegels veur et versturen van die nikszeggende tiedinge an heur pensioenklaanten, hadden ze beter in de pensioenpot doen kund donkt me. Mar ja, ik bin mar een klein raedertien in et grote gehiel, en heb niks in te brengen. Et gaot al krekkengeliek as mit oons speergeld, alles wodt minder. De renten gaon omlege en de baanken mienen, as de rente onder nul komt, dat ze oons dommiet betaelen laoten moeten omreden oons geld bi’j heur stald wodt. Ze vergeten dat ze oons speergeld al jaoren bruukt hebben om mit te beleggen en d’r smakken weenst mit maekt hebben. Om mien geld dan mar van de baank te haelen en et thuus in een oolde sokke te beweren zie ik nog niet zo zitten, da’s ok niet zonder geveer. De baank wil me wel tegemoet kommen deur een kluus an me te verhuren. Ja, daor trap ik mooi niet in! Dan moe’k ok nog hure betaelen om mien geld op te bargen. Mar ik heb een biesterbaorlik idee en daor gao ik bi’jkotten mit naor de baankdirrekteur. Mien anbod is da’k alle daegen wel in et baankgebouw ommestappen wil om zo op mien eigen centen te passen die daor bi’j heur op ’e rekinge staon. Daor hoef ik dan gien rente veur, dat doe ik hielendal gratis en veur niks!

Sjoukje Oosterloo

Tomke maekt him klaor

29 mei 2016 door Redaktie

Mit een peer daegen is et weer zo wied! Dan gaot Tomke in de veurleesweke naor alle Stellingwarver ukkespeulplakken toe. Mar hi’j wil d’r vanzels dan wel een betien hemmel op staon! Daoromme dat veurleeskoördinater Akkie Zeilstravan Raevenswoold him, mit alle ere Tomkes en zien kammeraoties, even in de wiend uutwapperen lat.

Intied bin alle ni’je veurleesboekies, tegere mit de haandpoppen naor de veurlezers brocht en kan de veurleesaktie beginnen. De Tomke-veruleesaktie wodt ieder jaor in de eerste volle weke van juni an alle ukkespeulplakken anbeuden. Mit Friese, Bildtse en Stellingwarver boekies wodt de aktie in de hiele perveensie holen. In Stellingwarf bin zoe’n twintig vri’jwilligers van de Stellingwarver Schrieversronte op pad om de aktie goed slaegen te laoten.

Foto: Akkie Zeilstra

Kursus Stellingwarfs ofsleuten

29 mei 2016 door Redaktie

Mit een unieke exkursie in et netuurgebied bi’j de Schaopedobbe in Else wodde kotleden de kursus ’Stellingwarfs veur beginners’ ofsleuten. Exkursieleider was Geert Lantinga, die ok mit riegelmaot exkursies leidet veur It Fryske Gea, van wie et netuurgebied is. Tiedens de exkursie vertelde Lantinga over de biezunderheden en et ontstaon van dit prachtige stokkien Stellingwarf, waor lange leden de schaopen wusken wodden.

De kursus zels wodde dit jaor holen in De Hoeve, zeuven meensken deden d’r an mit. An et aende van de exkursie rikte Lantinga de kursisten een ‘Bewies van mitdoen’ uut. De kursusleiding beston veerder uut Henk Bloemhoff en Mark van Veen. Et doel is dat de kursus in november opni’j uut aende gaon zal, dit keer in Appelsche in de Hoolten Klinte, et gebouw van de Historische Verieninge.

Ofsluting kursus Laandschopsgeschiedenis Der Izzerd en omgeving

25 mei 2016 door Redaktie

Mit mekeer op ’e fiets deur et dörpsgebied van Der Izzerd, Oolde- en Ni’jhooltwoolde, zo wodde op deensdagaovend 24 meie de kursus Laandschopsgeschiedenis, die dit veurjaor in Der Izzerd holen is, ofsleuten. Tiedens de fietstocht was d’r ommedaenken veur de ontstaonsgeschiedenis van et laandschop en de kultuurhistorische elementen die daor nog in weeromme te vienen binnen. Zo wodden o.e. de ‘poolder’ van Der Izzerd, et oerdal van de Oolde Kuunder en et oolde karkhoffien van Hooltwoolde opzocht. Via de Heirweg (Ni’jhooltwoolde) gong et an op ’e Scheene, die de greens vormt tussen Der Izzerd en Hooltpae. Kursusleider Dennis Worst leut tiedens de tocht o.e. zien hoe hi’j grondborings uutvoert en wat zoe’n onderzuuk je as onderzuker vertellen kan. Zo blieken d’r onder de ophoging van de karkeheuvel op et oolde karkhof van Hooltwoolde nog resten vene te zitten (zie foto). An de haand daorvan vertelde Worst de kursisten ien en aander over et laandschop zoas dat d’r in de twaelfde of dattiende ieuw uutzien hebben moet, doe wodde de karke op dat plak sticht.

Et doel is dat de Stellingwarver Schrieversronte in 2017 opni’j een kursus Laandschopsgeschiedenis anbieden zal, mar dan weer in een eer Stellingwarfs dörp.

Dennis Worst dot een grondboring op et oolde karkhof van Hooltwoolde.

Foto’s: Joop Sanders

Goed bezochte jaorvergeerdering SSR

13 mei 2016 door Redaktie

Van rechts naor links de bestuursleden Jan Russchen, Hendrik Fokkema, Henk Koelma, Geke Zanen, Jan Baas, veurzitter Ype Dijkstra en direkteur Sietske Bloemhoff. Op ‘e foto ontbrekt Peter Riksma, die d’r vanwegens griep niet bi’j wezen kon. Foto: Lenus v.d. Broek

Mit et jaorverslag van 2015 gong de Algemiene Raod van de Stichting Stellingwarver Schrieversronte tiedens de jaorvergeerdering op 12 meie unaniem akkoord. Zoe’n veertig leden van die Algemiene Raod maekten disse biezundere jaorvergeerdering mit. De jaorvergeerdering was biezunder omreden drie leden van et bestuur oftredend weren en niet herkiesber. Neffens et Huushooldelik Riegelment kun bestuursleden twie keer drie jaor diel uut maeken van et bestuur, veur de veurzitter geldt drie keer drie jaor. Dat laeste gul veur Ype Dijkstra, de ere beide oftredende bestuursleden weren Geke Zanen en Henk Koelma. Laestnuumde was vanof 2010 ponghoolder.

Ofscheid Geke Zanen en Henk Koelma

Veurzitter Ype Dijkstra roemde in zien toespraoke de inzet van Geke Zanen. Zi’j was een slim betrokken bestuurslid en was altied uut op verni’jing. Daornaost was, mar blift ze ok aktief, zoas binnen de warkgroep H.J. Bergveldpries. Veul lof hadde de veurzitter ok veur ponghoolder Henk Koelma, die zien financiële zaeken altied slim nauwgezet uutvoerde. Mar ok nuumde Dijkstra de kwaliteiten van Koelma as et gong om de kontakten mit de overheden. Ok Henk Koelma blift nao zien vertrek nog wel es wat uut de wege zetten veur de SSR.

Gerda Hoogeveen en Hans Salverda bin de ni’je bestuursleden van de SSR

Benuming ni’je bestuursleden

Veur de vakketure die ontston deur et vertrek van Geke Zanen stelde et bestuur de Algemiene Raod veur om Hans Salverda van Zorgvlied te benumen. Salverda is al jaoren aktief veur de SSR op verschillende fronten. Zo zit hi’j o.e. in een warkgroep die doende is mit et schrieven van een biezunder boek over de historie van et greensgebied tussen Stellingwarf en Westervelde, mar dot hi’j ok alle jaoren mit an de sutelaktie. Veur de vakketure die ontston deur et vertrek van Henk Koelma stelde et bestuur Gerda Hoogeveen van De Fochtel kandidaot. Gerda Hoogeveen is nog onbekend binnen de Schrieversronte, mar dreegt et Stellingwarfs en de Stellingwarver streekkultuur een waarm hatte toe. Gerda Hoogeveen is in et daegeliks leven warkzem as financieel beleidsmitwarker van de gemiente Merum.

Ofscheid Ype Dijkstra, vakketure veurzitter

Jan Baas, de twiede veurzitter van de SSR, leut in zien toespraoke naor de vertrekkende veurzitter Ype Dijkstra toe weten ommeraek veul wardering te hebben veur zien grote inzet al die jaoren veur de Stellingwarver Schrieversronte. ‘Et was butendat een geweldige ervering om in een bestuur te zitten mit zoe’n kundige bestuurlike veurzitter as jow al die tied weren,’ zo leut hi’j weten. Ok angaonde zien grote en enthousiaste inzet veur hiel veul Schrieversronte-aktiviteiten hadde Baas veul goeie woorden over.

Goeie woorden kwammen d’r ok van oold-bestuurslid Attie Nijboer, die twie jaor leden uut et bestuur gong. Omreden zi’j nog altied hiele goeie herinnerings an die tied het, wol ze ok nog graeg even et woord voeren. ‘Et vul me indertied niet mit om d’r mit op te holen, en dat zullen jim vast krek zo erveren,’ zo zee ze. ‘Mar et went ok wel weer, en d’r zal grif ok veur zorgd wodden dat jim allemaole nog mit riegelmaot benaoderd wodden om argens mit te helpen.’

Op dit mement is d’r nog een vakketure veur een veurzitter. Al bin d’r wel goenend benaoderd, et bestuur kon tiedens de jaorvergeerdering nog gien kandidaot veurstellen. Ype Dijkstra blift blift nog evenpies betrokken bi’j et bestuur om de opvolging veur mekeer te kriegen..

Stellingwarftrofee

Nao de bestuurswisseling wodde Ype Dijkstra extra in et zunnegien zet deur him de Stellingwarftrofee uut te rikken. Die trofee wodde een tal jaoren leden insteld en is bedoeld veur meensken die heur slim inzetten, of inzet hebben, veur de Stellingwarver tael en streekkultuur. Et bestuur, mar ok de leden, zo bleek wel uut de reakties in de zael, vun dat Ype Dijkstra de pries meer as toekwam.

Verhaelen en lieties

Nao et schoft weren d’r vermaekelike optredens van drie van de mitwarkers an de CD ‘Op ’e luuster staon’. Femmie van Veen las twie prachtige humoristische verhaelen veur van H.J. Bergveld, wiels Johan Veenstra zien ‘goolden oolde’ verhael ‘Op ’e fiets vot’ vertelde. Tot slot zong Henk Bloemhoff de lieties ‘Oolde plaets’ en ‘Waor de Lende’, himzels begeleidende op ’e gitaar. . Hi’j sleut de aovend of mit een biezunder lied, ‘Op ‘e Fochtel in Stellingwarf’. Dat was toepasselik, want Dijkstra vint as oold-Fochteler De Fochtel et mooiste Stellingwarver plak.