Jong van hatte mit et Stellingwarfs de toekomst in
Redaktie 
Op disse auto van Eupenbaore warken staot een tekst in et Stellingwarfs. De foto is maekt doe de auto op ‘e Hoeke in Ni’jhooltpae ston en daor volk van de gemiente West-Stellingwarf an et wark was. De tekst mit de foto’s bin veur de rebriek Stellingwarfs in et wild instuurd deur Johan Veenstra.
Bi’j et verzorgingstehuus Lenna in Wolvege staot op een groot bod ‘Et gaot weer bluien!’; een mooie veurjaorstekst in et Stellingwarfs. Now schrieven we in et Stellingwarfs altied bluuien, mar in et westelike Stellingwarf wodt et woord vaeks mit de ‘ui’ uutspreuken, dus mit de klaank van et Nederlaanse ‘bui, lui of… ui’! En daoromme ziej’ dan ok wel es disse schriefwieze. De foto wodde instuurd deur Annie Dedden uut Wolvege.
De Veerkieker: groep 4 tegere mit muzikaant Bas van Domburg in de weer mit Stellingwarfs en meziek (foto: Marjolein Spitteler)
Oflopen donderdag wodde in et perveensiehuus in Liwwadden bekend maekt wie in et oflopen schoelejaor veur et beste arfgoededukaosieprojekt in de perveensie zorgd hadde. Dat projekt is een initiatief van Stichting Keunstwurk en de Museumfederatie Fryslân om zo projekten die andacht besteden an lekaol arfgoed te steunen. Alle projekten bin bedoeld veur leerlingen van et basisonderwies.
Dit keer weren d’r twie projekten veur de pries nommeneerd: et projekt De Veerkieker van de Stellingwarver Schrieversronte en et projekt ‘Op avontuur op Ameland’ (op initiatief van Joke Mosterman en Peter Kienstra.
As winner wodde et Amelaander projekt anwezen; dit projekt betrekt schoelekiender bi’j alles wat Amelaand te bieden het. Ien middag in de maond gaon de kiender de schoele uut om et eilaand te bekieken. In de lessen is d’r ok veul ommedaenken veur de twie Amelaander streektaelen.
Ok al wun De Veerkieker niet, de jury hadde ommeraek veul wardering veur et projekt. Bi’j dit schoelebriede hiemkundeprojekt veur alle Stellingwarver basisschoelen wodt et anbod van arfgoedinstellings in de regio koppeld an dat van, mit naeme lekaole, keunsteners. De Veerkieker wodde ontwikkeld deur Marjolein Spitteler, Willy Bergsma en Wikje Haan. Et projekt wodde financieel steund deur Fonds Ooststellingwerf en et perveensiaole Iepen Mienskipfûns.
Jan Brokken (foto: Jelmer de Haas)
De literaire warkgroep ’Alles Rondom Tael’ van Stichting Kunstwerf, waor ok de Stellingwarver Schrieversronte in vertegenwoordigd is, orgeniseerd veur et dadde jaor een konsertlezing mit auteur Jan Brokken en pianist Marcel Worms. Dit keer gaot et om et pergramme ’Chopin rond de Evenaar’, en dat zal wezen op zundag 15 april in theaterkefé Le Brocope in Berkoop. Jan Brokken vertelt stokken uut zien prachtige non-fictie boek Waarom elf Antillianen knielden voor het hart van Chopin, Marcel Worms speult walsen, mazurka’s en danza’s van de deur Chopin beïnvloede komponisten Wim Statius Muller, Jacobo Palm, Rudolf Palm, Edgar Palm (Curaçao), Ernesto Lecuona (Cuba), Ignacio Cervantes (Cuba), Louis Moreau Gottschalk (New Orleans), Teresa Carreño (Venezuela) en Francisco Mignone (Brazilië).
De kosten bin € 15,00, risserveren kan via info@kunstwerf.com.
De Verdwenen Peerden: een muzikaol en visueel spektaokel dat mit spoed oolde lappen zocht!
Veur dit spektaokel dat op 4 augustus 2018 in Berkoop holen wodt bin we op zuke naor ni’je en oolde, mooie en minder mooie lappen. Wie het d’r op ’e zoolder nog wat liggen? Et mag van alles wezen: ketoen, linnen, ribflewiel, wol… Kleurig en minder kleurig, bedrokt en effen. We gaon d’r patchworkklieden van maeken, waor we dan weer de kostuums van ni’jen willen veur de veurstelling. De lappen kun inleverd wodden bi’j de SSR in Berkoop tiedens kantooruren (9.00 – 16.00 ure). We kun ze evt. ok bi’j jow ophaelen. Bel dan mar even naor: 0516-451108.