Jong van hatte mit et Stellingwarfs de toekomst in
Redaktie 
Et is meraokels mooi dat staorigan de officiële – Stellingwarver – naemen van revieren, kenaolen en zo henne de hieltied meer zichtber bruukt wodden. Op 15 meert 2006 wodden die naemen, krek as de Friese naemen veerderop in Frieslaand, officieel vaastesteld deur de perveensie. Dat gelt dus ok veur de naemen van de revieren daor de verni’jde N 381 over henne gaot, in dit geval De Kuunder bi’j Oosterwoolde.
De foto’s veur ‘Stellingwarfs in et wild’ bin instuurd deur Jan Oosterhof van Makkinge.
Jim zien hier foto’s van de ni’je brogge over De Kuunder bi’j de Drie Tolhekken. Die brogge kreeg de mooie Stellingwarver veldnaeme Lochtenrek, op initiatief van Durk Gorter, Jan Oosterhof en Wiebe van der Vliet uut Makkinge.
Lochtenrek, ok wel Et Lochtenrikke nuumd, is de naeme van een bossien dat ‘nuumd wezen kunnen zol naor een stuw of zowat in De Kuunder (Popping, 1903); een bron uut 1859 het et daor ok dudelik over (>Luchtenriksmaadje)’. Disse gegevens, en nog veul meer over disse biezundere veldnaeme, bin te lezen in et boek ‘Veldnaemen van Stellingwarf, diel VII, Oosterwoolde’ (Stellingwarver Schrieversronte, 2017, ISBN 978-90-6466-191-4)
De foto’s wodden toestuurd deur Jan Oosterhof uut Makkinge.
Paoskevuur in Hooltpae! En wat zongen ze eertieds in Hooltpae om mar genoeg branige veur et Paosvuur te kriegen?
Hej’ je nog een oolde maande / Hej’ je nog een bossien riet? / Aanders wil oons paosvuur niet branen / Aanders braant oons paosvuur niet (bron Stellingwarfs Woordeboek, foto’s Harmen Houtman)
Van 3 t/m10 juni Stellingwarfs in et Taelepaveljoen (© Afûk)
Vanof begin april t/m oktober zullen in et Taelepaviljoen MeM van et Laand van Tael in Liwwadden kleine taelen uut Europa, streektaelen en –dialekten uut Nederlaand en minderhiedstaelen uut Liwwadden centraol staon. Al die taelen zullen heur een weke lange prissenteren mit optredens van schrievers, dichters, koren en meziekgroepen, mar d’r zullen ok infermaosiemiddaegen over wezen en warkwinkels geven wodden. Mit mekeer zullen zoe’n 30 taelen van heur zien en heuren laoten: tiene uut Frieslaand en Nederlaand, tiene uut Europa en tiene uut Liwwadden.
De Scheve Schaats Band uut Wolvege (© Sietske Bloemhoff)
Vanzels is d’r ok ommedaenken veur et Stellingwarfs. De Stellingwarver weke begint op zundagmiddag 3 juni. Die middag treedt de Scheve Schaats Band van Wolvege en laoten tal van heur bekende lieties heuren. Heur optreden wodt ofwisseld deur veurdrachten van en deur Zeeuwse schrievers. Veur de Zeeuwen is et dan mitien de ofslutende middag van heur prissentaosieweke. Op donderdagaovend 7 juni wodt de Stellingwarver film ‘Daor klept de klokke weer’ vertoond in de ni’je fiilmzaek van Tresoar, wiels in et taelepaviljoen de rockband SOTD (eerder Spirit of the dark) op. Disse band rond Jannie en Eise Dijkstra uut Else hebben de laeste jaoren veur een uniek Stellingwarfstaelig rippertoire zorgd.
Dichteres Attie Nijboer van Oosterwoolde (© Sietske Bloemhoff)
Op de ofslutende Stellingwarver middag op 10 juni treden de Stellingwarver dichters Attie Nijboer en Harmen Houtman op. Die middag begint mitien de Oostfriese weke mit een optreden van de ok in Nederlaand de hieltied bekender woddende Annie Heger.
In de eerste weke van juni zorgt de Stellingwarver Schrieversronte veerder o.e. veur een middag rond de veldnaemen van Oosterwoolde, d’r is ommedaenken veur heur serie van tien routegidsen, d’r wo’n Stellingwarver volksverhaelen verteld en d’r zal een prissentaosie wezen over de klokkestoelen in Oost- en West-Stellingwarf.
Et Taelepaveljoen is te vienen in de Preenzetuun; die tuun, vlakbi’j de Oldehove, is veur dit biezundere jaor ommebouwd tot Taeletuun. Et Laand van Tael (Lân fan Taal) is een initiatief van de Afûk in et kader van Liwwadden Kulturele Heufdstad 2018.
De première van de film ’Daor klept de klokke weer’ zal wezen op donderdagaovend 26 april. Die feestelike gebeurtenis wodt holen in et Buurthuus van Noordwoolde en is alliend bi’j te wonen deur geneudigden.
Op et mement wodt d’r nog hadde warkt an mit naeme an filmmeziek, et inlezen en plaetsen van de verteltekst, de inleidende beelden en de oftiteling. De oflopen tied bin de beeldmontage en kleurkorrekties ofrond, daorveur zorgden regisseur Thomas Rovers (Grunningen) en regie-assistent Marco Reekers (Amsterdam). Ok bin kotleden de laeste punties op de ’i’ zet van de animaosiefilmpies die in ‘Daor klept de klokke weer’ opneumen wodden. Veur die filmpies zorgde keunsteneres Henrieke Kruise uut Grunningen; zi’j was ok degene die veur de anklieding van de dekors zorgde.
Nao de première zal de film in verschillende dörpen vertoond wodden. De film is daorveur te huur bi’j de Stellingwarver Schrieversronte in Berkoop. Op donderdagaovend 7 juni wodt de film dri’jd in de ni’je filmzael van Tresoar in Liwwadden, as ien van de Stellingwarver LF 2018-onderdielen van et Laand van Tael.