Redaktie

Kjest Herder: ni’je redakteur De Ovend

door

 

Ovendredakteur Kjest Herder (foto: Sietske Bloemhoff)

Een man mit een goeie schriefervering, een briede belangstelling veur wat d’r in de omkrieten speult, ervering as redakteur van et vri’jdagmiddagpergramme ’Buurman en Buurman’ van de lekaole omroep Odrie, dat pergramme prissenteert hi’j butendat ok… En now vanof et kommende aprilnommer is Kjest Herder van Oosterwoolde ok redakteur van et Stellingwarfs tiedschrift De Ovend. Bi’j de Stellingwarver Schrieversronte is hi’j gien onbekende, want Kjest zit ok in de warkgroep die et Stellingwarfs Meziekfestival orgeniseert.

D’r wodde al een posien naor uutbreiding van de redaktie van De Ovend zocht, omreden redakteur Jannes Westerhof weten laoten het dat hi’j et vanwegens zien gezondhied wat rustiger an doen willen zol. Westerhof blift liekewel now en dan nog wel bi’jdregen leveren, zo is zien doel. Et ere redaktielid is Jan Koops, Sietske Bloemhoff is buroredakteur.

Veur de redaktie wodt nog meer uutbreiding uutkeken; anvulling d’rvan wodt zocht in Stellingwarf-Westaende.

LF2018: Stellingwarfs in de Taeletuun van et Laand van Tael

door

Op weg naor Liwwadden!

In feberwaori veraandert de Preenzetuun in Liwwadden in een echte Taeletuun! Krek as bloemen in een echte tuun gruuien en bluuien, gruuit en bluuit daor dan tael. Van letter tot woortien, van woortien tot zin, van zin tot verhael, van boek tot boek tot … tot … , och, aenlik is alles tael! In de Taeletuun gaoj’ op zuke naor tael, speul ie mit tael, beleef ie tael en maek ie tael. Alle Stellingwarver basisschoelen kun van april tot en mit oktober 2018 mitdoen an et pergramme de Taeletuun. Et pergramme richt him op meertaelighied en is beschikber in et Stellingwarfs, et Bildts en et Fries. De jongste kiender gaon in de Taeletuun op zuke naor de vrunden van Tomke (ukken) of Renze de Kikkerd (groep 1 en 2). Veur de kiender van groep 3, 4 en 5 gaot d’r in de tuun een wereld an taelen eupen. En de leerlingen van de bovenbouw kun een spannend (tael)aeventuur verwaachten. Alle Stellingwarver basisschoelen en ukkespeulplakken kun heur via de Stellingwarver Schrieversronte opgeven.

De Taeletuun is een onderdiel van et LF2018-projekt Laand van Tael, en is een initiatief van de Afûk, i.s.m. Cedin, Stichting Bildts Aigene en de Stichting Stellingwarver Schrieversronte.

Bewoners zorginstellings genieten van verhaelen

door

   

Ankie Verbaan lest veur in LindeStede (foto: Lenus v.d. Broek)

   

Luusteren naor verhaelen en meziek van Jacob Have in Rikkingehof (foto: Lenus v.d. Broek)

Berkoop. Ieder jaor bezorgen zoe’n twintig vri’jwilligers van de Stellingwarver Schrieversronte veul bewoners van alle zorginstellings en verpleegtehuzen in Stellingwarf en De Menning in Wilhelminaoord een prachtige morgen of middag. Tiedens die morgen of middag wodt d’r uut een speciaol veur disse aktie saemenstelde veurleesmappe veurlezen in et Stellingwarfs. Donderdag 1 en vri’jdag 2 feberwaori gebeurde dat al weer veur de elfde keer en opni’j bleek wel dat de veurleesvri’jwilligers van de Schrieversronte hier ieder jaor veul meensken een groot plezier mit doen.

De veurleesmappe van de vri’jwilligers wodt zowat alle jaoren van ni’je verhaelen en gedichten veurzien, zodat veur heur de keuze ok alle keren groter wodt. Sommige veurlezers lezen niet alliend veur, mar nemen ok een meziekinsterment mit en zingen veur en mit de meensken bekende oolde lieties, zoas bi’jglieks Jacob Have uut Appelsche. Die mooie ofwisseling van verhaelen en meziek wodt deur et pebliek ommeraek wardeerd. Hiel vaeke wodt an de veurlezers vraogd of ze niet wat vaeker kommen kunnen, en pattie veurlezers voldoen graeg an die vraoge.

Veur de koördinaosie van de aktie zorgden dit keer de vaaste Schrieversrontevri’jwilligsters Kiena Bouwer (De Haule) en Akkie Zeilstra (Raevenswoold) en Schrieversrontemitwarkster Joke Coenrades (De Oosterstreek).

Veul wille mit Freddie de Vries

door

  

Foto’s: Baukje Krediet

Meraokels veul wille hadde et pebliek vri’jdagaovend bi’j et luusteren naor de verhaelen van de Stellingwarver schriever Freddie de Vries. De biebeltheek van Noordwoolde hadde vri’jdagaovend i.s.m. de Stellingwarver Schrieversronte veur een optreden van him zorgd i.v.m et eupeningsweekaende van Kulturele Heufdstad 2018. Op die aovend wodden in tal van aandere plakken in de hiele perveensie verhaelen verteld. De belangstelling in Noordwoolde was zo groot, dat De Vries veur twie optredens zorgde i.p.v. iene.

Freddie de Vries schrift al weer hiel wat jaoren veural kruderige verhaelen, die soms bi’j et hilarische of binnen. Bi’j zien optredens kommen die verhaelen nog beter uut de varve, vanwegens zien biezundere meniere van vertellen. Et pebliek in de biebeltheek van Noordwoolde zal him disse prachtige aovend mit de schriever uut Hooltpae dan ok nog lange heugen.

Van De Vries verschient dit veurjaor zien eerste bundel mit verhaelen. Eerder zorgde hi’j, tegere mit Ruurd Jelle van der Leij, veur ‘Et Stellingwarver voegelboek’ dat in 2012 uutgeven wodde deur de Stellingwarver Schrieversronte.

155. Et witte voetien

door

Veur de rebriek Stellingwarfs in ’t ‘wild’ kregen we van Henk Jager uut Berkoop opni’j een mooi veurbeeld daorvan. Et gaot om de naeme van een huus an et Voetpad in de Westhoeke van West-Stellingwarf: ‘Et witte voetien’.