Jong van hatte mit et Stellingwarfs de toekomst in
Redaktie 
In Ni’jhooltwoolde staot an de Weerdiek dit huus mit de Stellingwarver naeme ‘De Haegen’. De betekenis van et woord haege is een stroke laand tussen twie kraggen. Bi’j et turfstikken wodde de grond op ’e haegen gooid, zo bin ze ontstaon. De foto’s mit de gegevens kommen van Johan Veenstra van Ni’jhooltpae.
Bedde en broggien. Dat is et Stellingwarfs veur ‘bed and breakfast’! Daorveur kuj’ terechte bi’j Fokje Siegersma middenin Ni’jhooltpae tegenover de oolde schoele. Ie kun d’r ommeraek goed slaopen en kriegen d’r lieke lekkere broggies! De foto mit de gegevens wodde oons veur de rebriek ‘Stellingwarfs in et wild’ toestuurd deur Johan Veenstra.
Op vri’jdagaovend 23 oktober orgeniseren Stichting Kunstwerf en de Stellingwarver Schrieversronte gezaemelik een biezundere streekkulturele aovend. Veur et schoft vertelt streekkenner Geert Lantinga van Wolvege an de haand van een schitterende PowerPoint over de vroege geschiedenis van Stellingwarf tot an ongeveer 1200 toe, doe de eerste Stellingwarver dörpen ontstaon binnen. In flink wat oorkonden van die tied of bin de naemen d’r van veur et eerst te lezen en is daoromme et bestaon van die dörpen zeker. Mar wanneer haj’ hier de eerste bewoners, waor kwammen ze weg en hoe zag et laandschop d’r hier veur et jaor 1000 aenlik uut? Over al die onderwarpen vertelt Geert Lantinga op indrokwekkende wieze.
Volksverhaelen
Nao et schoft zal Klaasje Herder van Oosterwoolde oolde volksverhaelen uut Stellingwarf vertellen. Ze maekte daorveur een keuze uut de prachtige verhaelen van volksverhaeleverteller Wube Lamers van de Kuunderwal (1912-2001), zoas hi’j ze indertied deur overlevering kende en deurgaf.
Herkomst en betekenis
Nao et vertellen van de verhaelen zal taelkundige dr. Henk Bloemhoff ingaon op de aachtergrond en betekenis van de (Stellingwarver) volksverhaelen. Waor kommen ze weg, wodden ze mit een bepaolde reden verteld, wat zol de betekenis wezen kunnen en kwammen ze ok op ere plakken veur zoas in ere Nedersaksische gebieden.
Veur iederiene die interesseerd is in zien eigen leefomgeving is disse aovend een ‘must’ om naor toe te gaon!
Daotum en tied: vri’jdagaovend 23 oktober, vanof 20.00 ure
Plak: Hotel-Resteraant De Zon in Oosterwoolde
Intree: € 5,00
Risserveren: Stellingwarver Schrieversronte (0516-451108, info@stellingwarfs.nl) of Stichting Kunstwerf (info@kunstwerf.com)
Oflopen woensdag was d’r in Berkoop weer de jaorlikse hiemkundemiddag veur leerkrachten van et Stellingwarver basisonderwies. Die middag wodde opni’j veul ni’j lesmateriaol veur et vak Hiemkunde in et basisonderwies prissenteerd, mar ok was d’r ommedaenken veur al uutvoerde en nog lopende hiemkundige projekten.
PowerPoint vroege geschiedenis
Streekkenner Geert Lantinga leut veur et schoft een ruwe versie zien van een PowerPoint over de vroege geschiedenis van Stellingwarf. Et is een bewarking van de PowerPoint die Lantinga o.e. zien lat tiedens de Snuffelkursus Stellingwarfs. D’r wodde arg positief op disse indrokwekkende prissentaosie reageerd, zodat Lantinga de PowerPoint veerder ofwarken zal. Ok veur bi’jheurend les- en verwarkingsmateriaol zal de kommende tied zorgd wodden.
Anbod dörps- en netuurgidsen
Anslutend wodde een ni’j anbod bekendmaekt. Via de Stellingwarver Schrieversronte, die veur veerweg et meerste hiemkundige lesmateriaol zorgt, kun schoelen now ok dörpsgidsen inhuren. Veur schoelen is et zo arg makkelik om op een verantwoorde wieze goeie streekkenners uut de omgeving over heur eigen leefomgeving vertellen te laoten. Sund 2012 maeken schoelen op die wieze ok gebruuk van netuurgidsen, en daor is ieder jaor veul vraoge naor.
Fotoprojekt De Hoeve
Geert Lantinga en Sietske Bloemhoff vertelden daornao over een biezunder projekt zoas dat op et mement deur basisschoele De Klaeter van De Hoeve uutvoerd wodt. In et kader van de Stellingwarver Dag op 31 oktober in dat dörp bin leerlingen doende mit een fotoprojekt. Nao drie info-lessen (over de historie van et dörp, de netuur in en bi’j et dörp en et schrieven van een infermetief verhaeltien) gaon leerlingen foto’s maeken in et dörp. Foto’s van plakkies, huzen, netuur en zo wat henne, die zi’j belangriek vienen veur de meensken die over 50 jaor in et dörp wonen. Op 31 oktober wo’n de foto’s mit uutleg tentoonsteld, tegere mit foto’s van zoe’n vuuftig jaor leden.
Buurtschoppeprojekt
Ommedaenken was d’r ok veur et buurtschoppeprojekt van de Oostenburgschoele van Oosterwoolde. Die schoele zorgde o.l.v. Jos Donker en Marjolein Spitteler oflopen veurjaor veur een prachtig schoelebried projekt rond de buurtschoppen van Oosterwoolde. Deurdat de schoele middels et projekt Kiek Es extra financiële steun en begeleiding kriegen kon, kon et projekt op roeme wieze uutvoerd wodden.
www.stellingwerf-heemkunde.nl
Tot slot vertelde Klaas Dijkstra – hi’j is webbeheerder van de speciaole hiemkundewebstee stellingwerf-heemkunde.nl – over et ni’jste lesanbod op die webstee. Daor is onderhaand een schat van gegevens en onderwarpen veur et basisonderwies op te vienen, mit veul bi’jheurend verwarkingsmateriaol.
Veur wie graeg mit et schrieven van et Stellingwarfs an de slag gaon willen zol, en meer over de aachtergrond van disse mooie Nedersaksische tael weten wil, begint eerdaegs weer een kursus ‘Stellingwarfs veur beginners’
Et lezen van et Stellingwarfs gaot zowat alle meensken wel goed of, mar et schrieven d’r van is een aander verhael… Dat leer ie veural deur et vule te doen en deur d’r mit eren en mit mekeer mit an de gang te wezen. Behalven daj’ bi’j disse kursus dus aorig in de weer binnen mit de schrieveri’je, is d’r ok ommedaenken veur et praoten in et Stellingwarfs. Ok veur de biezundere geschiedenis en ligging van et gebied is d’r ommedaenken.
Zes lesaovens en exkursie
De kursus ‘Stellingwarfs veur beginners’ bestaot uut zes lesaovens van de hieltied twie uren en wodt geven deur o.e. dr. Henk Bloemhoff en Geert Lantinga. De kursus wodt ofsleuten mit een exkursie in een Stellingwarfs netuurgebied.
De beginnerskursus wodt veur et eerst niet in Berkoop holen, mar op ’e Hoeve. In 2016 wodt de kursus opni’j in een aander dörp anbeuden. Meensken die interesse hebben kun et beste even bellen mit et kantoor van de Schrieversronte: 0516-451108, of mailen naor: info@stellingwarfs.nl.
Plak: et verieningsgebouw ’t Hokkien op ’e Hoeve.
Daotums:10, 17 en 24 november; en 5, 12 en 19 jannewaori
Tieden: 19.30 – 21.30 ure
Pries: € 60,-, lesmateriaol en koffie/thee inbegrepen