Redaktie

Van Jaap Elzenaar van De Hoeve kregen we veur de rebriek ‘Stellingwarfs in et wild’ disse beide foto’s. Jim zien hier de schoele van De Hoeve mit de mooie Stellingwarver naeme De klaeter. ‘Klaeter’ is een Stellingwarver benaeming veur de ‘ratelpopulier’; die boom zol hier eerder veul staon hebben. As de wiend deur et blad van die boom gaot heur ie een ‘klaeterend’ geluud…

Ok sommige winkels hebben een mooie Stellingwarver naeme. Zo stuurde Hans Liest van Berkoop disse foto van woonwinkel Et Kenon in Berkoop. Krek an de ere kaante van de weg staot een echt kenon dat eertieds opgreven wodde bi’j de Bekhofschaans. Zo zal disse winkel ongetwiefeld an zien aorige naeme kommen wezen!  

De bungalow an de Frankenaweg in Else, van Theunis Jaap Kastelein – zien femilie was vroeger de eigener van de Iekenlaene –, het ok de naeme van et weggien Iekenlaene kregen. Liekewel staot die naeme op ‘e schostien even wat aanders angeven…

Foto en gegevens: Hendrik Betten, Else  

Tot veur kot ston de Iekenlaene in Else niet angeven mit een naembottien. Et verbieningsweggien tussen de Hoofdweg en de Butenweg is in de volksmond netuurlik al sund jaor en dag bekend as de ‘Iekenlaene’ en gul as een centraol voetpad. Bi’j de Butenweg, now zoe’n betien bi’j kampeerplak d’ Elf Ieken, ston in de tied dat de tram nog deur Else kwam de tramhalte mit een straotlantaarn. Et wodde doe altied goedvunnen dat et weggien deur iederiene bruukt wodde. Doe in 1973 d’r om Else henne een ni’je rondweg anlegd wodde, wodde et klinkerweggien deur die weg wried deurbreuken. Kotleden wodden d’r an et eerste- en officiële stok straote mit klinkers vanof de Hoofdweg twie botties mit daorop Iekenlaene plaetst. Et diel dat overbleven is, is pattekelier eigendom, mar daor bin ok botties kommen. Krek as bi’j et kaetsen kun de botties nog verhangen wodden om zo de hiele Iekenlaene an te geven.

De foto’s en de gegevens kommen van Hendrik Betten van Else. 

Op ‘e Hoeve hebben ze nog niet zo lange leden een ni’j dörpshuus kregen. Et is nog zo ni’j dat et nog niet van een naeme veurzien is. Jaap Elzenaar van De Hoeve gong op onderzuuk uut en heurde dat de oolde naeme doukies weer op et gebouw plaetst wodden zal. Die Stellingwarver naeme is ’t Hokkien, en is wel te zien op de prieslieste van et dörpshuus.