Jong van hatte mit et Stellingwarfs de toekomst in
Redaktie 
Op et pleintien in Berkoop tegenover de beide kefé’s staot de kiosk van Eupen Stal mit de Stellingwarver naeme ‘et Anlopien’. Tiedens de vier weken durende keunstroute van Eupen Stal bin hier de kaorties en ketalegus te koop. De foto wodde veur de rebriek Stellingwarfs in et ‘wild’ instuurd deur Hans Liest van Berkoop.
De Gaegelpolle is de naeme van een zorgboerderi’je en winkel an de Duustereweg in Oosterwoolde. De gaegel is een struke die lekker rokt. Ze stopten vroeger wel takkies gaegel in de bedstee of et bedde om vlooien tegen te gaon. De polle wodt zodoende ok wel vlooiekruud nuumd. (Tekst en foto: Johan Veenstra)
Kotleden stuurde Annie Dedden van Blesdieke oons disse foto toe veur de rebriek Stellingwarfs in et ‘wild’. Ze maekte de foto in Langedieke waor ze de Stellingwarver naeme ‘Oons Dörpshuus’ op… et dörpshuus van dat plak staon zag!
Foto: Jaap C. Elzenaar
Op zaoterdag 31 oktober holen de Stellingwarver Schrieversronte, Plaetselik Belang De Hoeve en JAWIS gezaemelik een grote Stellingwarver Dag. Die dag speult him of in en rond dörpshuus ’t Hokkien en begint middags om 14.00 ure. In et gebouw wodt dan mitien een biezundere fototentoonstelling eupend; veur die tentoonstelling zorgen leerlingen van De Klaeter. Buten gaot op etzelde mement veur de kiender een levend gaanzebodspul uut aende, dat speciaol veur disse dag liend wodden kon van et dörp Else. Bi’j regen is et spel in ’t Hokkien.
Tentoonstelling
Om veur de tentoonstelling zorgen te kunnen hebben vuuf leerlingen van De Klaeter foto’s maekt van biezundere plakken in et dörp. Plakken waorvan zi’j vienen dat die veur de Hoevigers over 50 jaor nog belangriek binnen. Mar veurdat de foto’s maekt wodden het streekkenner Geert Lantinga van Wolvege de kiender verteld over de geschiedenis van De Hoeve en over de netuur in en om et dörp. Naodat de foto’s maekt binnen, het Sietske Bloemhoff van de Schrieversronte uutlegd waor aj’ rekening mit holen moeten aj’ een verhaeltien schrieven willen. Tiedens die les hebben de leerlingen vervolgens een verhaeltien schreven over de keuze van heur foto. De foto’s mit de uutleg zullen middags allemaole te zien wezen in ’t Hokkien, anvuld mit ere foto’s van de schoele. Daornaost wodt een deurlopende PowerPoint vertoond van oolde foto’s van De Hoeve, waor de foto’s van de leerlingen ok in verwarkt binnen. Veur die biezundere prissentaosie zorgt Jan de Vries van Wolvege, hi’j was eertieds heufd Onderwies van de gemiente West-Stellingwarf. De foto’s en de verhaelties wo’n butendat bundeld bi’j de Schrieversronte en die boekies wo’n ok op 31 oktober prissenteerd.
Ledewinaktie
Vanof 14.00 ure holen leden van de Stellingwarver Schrieversronte een ledewinaktie in en om et dörp henne. De Schrieversronte het om de 1000 leden henne, die zes keer in et jaor et Stellingwarfs tiedschrift De Ovend toestuurd kriegen.
Fietsexkursie
Vanof 14.30 ure is d’r veur jong en oold een prachtige fietsexkursie o.l.v. Freddie de Vries van Hooltpae. Die tocht zal, mit onderwegens veul uutleg over de biezunderheden van de netuur, zoe’n twie uurties duren. Een unieke kaans om meer over de netuur in en om De Hoeve an de weet te kommen!
Geoschatzuken: eerste Stellingwarver Geocache!
Veur de wat ooldere jeugd gaot d’r middags, ok om 14.00 ure, een biezundere aktiviteit uut aende. Et gaot om ‘geoschatzuken’ en dat is de eerste echte Stellingwarver geocache. Veur de mooie Stellingwarver naeme van dit spel zorgde Hen le Duc van De Hoeve; zien dochter ontwikkelde de tocht die ongeveer vuuf kilometer is speciaol veur disse dag. Om d’r an mit te doen hej’ wel een smartfoon neudig! Et starten kan tussen 14.00 en 16.00 ure vanof ’t Hokkien.
Aovens: ienakter, veurdrachten en meziek
Aovens is d’r vanof 20.00 ure een ommeraek fleurig, kultureel pergramme in ’t Hokkien! Zo zal de Hoeviger tenielploeg een hilarische ienakter naor veuren brengen… Lieske Schiere van Ni’jhooltpae hoolt twie biezundere veurdrachten uut vroegere tieden, de Scheve Schaats Band lat van him heuren, én zangeres/akkordeonist Lammy Bruyns, van vroeger uut Vinkege, brengt heur ni’jste Stellingwarver lieties! Oflopen zommer wun ze nog mit iene daorvan et Stellingwarfs Meziekfestival in Appelsche.
De toegang van alle onderdielen van disse Stellingwarver Dag is ommenocht!
(Foto’s: Lenus v.d. Broek)
Veur de Kring van Bercoop verzorgde de Stellingwarver Schrieversronte maendagaovend in et Victoriapark in Wolvege een Stellingwarver aovend. Veurzitter Sjoerd Stienstra kon roem 150 leden van de Kring welkom hieten an et begin van de aovend die ommeraek in de smaek valen zol. Veur et schoft leuten Jan Koops (Oosterwoolde) en Jan de Vries (Wolvege) een prissentaosie zien van oolde foto’s en prentbriefkaorten uut et kerngebied van de Kring van Bercoop; dat is zoe’n betien et middengebied van Stellingwarf. In de prissentaosie was butendat een twietal oolde filmpies opneumen. Et iene leut beelden zien van de tram zoas die vroeger deur et gebied gong, et ere beelden van lessen rietvlechten in Noordwoolde. Nao et schoft vertelde Schrieversronte-direkteur Sietske Bloemhoff over et wark van de stichting en dan mit naeme over de verni’jde koers van de laeste jaoren. Daornao wodde de CAV-film van Berkoop dri’jd, die film wodde in 1957 opneumen bi’j gelegenhied van de eupening van de ni’je CAV-febriek in dat dörp. De 38 menuten durende film geft een prachtig beeld over et boereleven in Stellingwarf in die tied. An et aende van de aovend maekte veurzitter Stienstra bekend dat Kring van Bercoop een flinke donaosie an de Schrieversronte schinken zal vanwegens et verzorgen van disse slim slaegde aovend. De Kring van Bercoop ondersteunt in zien kerngebied aktiviteiten van orgenisaosies of instellings die van algemien belang binnen.