Jong van hatte mit et Stellingwarfs de toekomst in
Redaktie Kursisten van de kursus laandschopsgeschiedenis, mar ok ere interesseerden, kun in de toekomst verschillende pdf’s van PP-prissentaosies van de kursus op dit plak daelelaeden.
Cursus landschapsgeschiedenis – presentatie ontstaansgeschiedenis Appelscha
Cursus landschapsgeschiedenis – presentatie dorpsgeschiedenis Appelscha
Uut naeme van alle inwoners van Ni’jberkoop wodde op 4 meie om even veur acht ure aovens deur et bestuur van Plaetselik Belang een kraanze legd op et graf van smid Meine Land. Land wodde in december 1944 doodscheuten in zien smederi’je, doe hi’j weigerde om carbid te leveren. Bi’j de plechtighied weren zeune Boele Land, die zien vrouw en veerdere femilie anwezig. Boele Land woont sund jaor en dag in Jelsum, mar is hier bi’jomme nog altied bekend van zien Stellingwarver verhaelen. Zo schreef hi’j o.e. de Stellingwarver novelle ‘Gooldsje’.
(Foto’s: Sietske Bloemhoff)
Vanof et parkeerplak van It Fryske Gea an de Alberdalaene in Ni’jberkoop kuj’ prachtig kuieren. ´Zo koj’, aj´ in westelike richting langs de Catspoele (boverste foto) lopen, uuteindelik uut in de Delleboeren. Hielemaole aachterin dat mooie netuurgebied ziej´ dan disse schitterende poele´ (twiede en dadde foto), vertellen Ype en Joke Dijkstra van Oosterwoolde. Ype maekte ok een peer mooie foto´s bi´j beide poelen.
Mit eupen raemen
vangt et dörp
et veurjaor op
een waarmer zunne
verdrift et smoeke
van et winterschoft,
deurstroomt et leven
mit een ni’je fleur
en nocht;
trillend hangt de meitied
in de prille nevellocht.
Uut: Zonder zille, Jan van Overtjonger, O0sterwoolde, 1983
Foto: Ype Dijkstra (pinksterbloemen, tussen de Prikkedam en et dörp Makkinge)
Vanof 13 april tot en mit 26 april was d’r bi’j de Stellingwarver Schrieversronte in Berkoop de tentoonstelling ’De Twiede Wereldoorlog in de regio’. Mit mekeer tegen de zeshonderd meensken kwammen naor Berkoop om die unieke tentoonstelling te bekieken. Roem twiehonderd d’r van weren leerlingen van tien basisschoelen uut beide Stellingwarven. Veur heur bezuuk was een speciaole lesbrief ontwikkeld, zodat alle verschillende onderwarpen van de tentoonstelling goed an bod kwammen. De leden van de warkgroep die de tentoonstelling inricht hebben, weren Hendrik Betten, Roelof Dragt, Pieter de Jong, Jan Menger en Jan de Vries. Zi’j weren ok tiedens de eupeningstieden altied bi’j de tentoonstelling betrokken, zodat mit naeme de leerlingen mit heur eventuele vraogen bi’j heur terechte konnen. Soms kwam et ok veur dat ooldere bezukers spontaon de kiender vertelden over heur herinnerings an de periode 1940-1945. Die verhaelen maekten uteraord veul indrok. Uut de reakties het blieken daon dat d’r, bi’j de schoelen liekegoed as bi’j de ere bezukers, ommeraek veul wardering veur de tentoonstelling was. (Foto: Sietske Bloemhoff)