Redaktie

Zoe’n 600 meensken kwammen naor de tentoonstelling ‘De Twiede Wereldoorlog in de regio’

door

De Blesse, 14415

Vanof 13 april tot en mit 26 april was d’r bi’j de Stellingwarver Schrieversronte in Berkoop de tentoonstelling  ’De Twiede Wereldoorlog in de regio’. Mit mekeer tegen de zeshonderd meensken kwammen naor Berkoop om die unieke tentoonstelling te bekieken. Roem twiehonderd d’r van weren leerlingen van tien basisschoelen uut beide Stellingwarven. Veur heur bezuuk was een speciaole lesbrief ontwikkeld, zodat alle verschillende onderwarpen van de tentoonstelling goed an bod kwammen. De leden van de warkgroep die de tentoonstelling inricht hebben, weren Hendrik Betten, Roelof Dragt, Pieter de Jong, Jan Menger en Jan de Vries. Zi’j weren ok tiedens de eupeningstieden altied bi’j de tentoonstelling betrokken,  zodat mit naeme de leerlingen mit heur eventuele vraogen bi’j heur terechte konnen. Soms kwam et ok veur dat ooldere bezukers spontaon de kiender vertelden over heur herinnerings an de periode 1940-1945. Die verhaelen maekten uteraord veul indrok. Uut de reakties het blieken daon dat d’r, bi’j de schoelen liekegoed as bi’j de ere bezukers, ommeraek veul wardering veur de tentoonstelling was. (Foto: Sietske Bloemhoff)

Netuur in et Stellingwarfs op schoeleTV

door

Freddie en RJ

Ruurd Jelle van der Leij

Op deensdag 28 april, 12 en 19 meie is voegelkenner en fotograaf Ruurd Jelle van der Leij te zien in et pergramme ‘Tsjek’ van de Friese schoeletillevisie. De vroegere inwoner van Hooltpae en fotograaf van Et Stellingwarver voegelboek verzorgt drie keer et netuuronderdiel ‘Netuurlik’ van dat pergramme veur de basisschoelen. De opnaemen bin kotleden maekt naodat hi’j vraogd was veur zien mitwarking an ‘Tsjek’. Van der Leij prissenteert zien onderwarpen in et Stellingwarfs, ok al was him vraogd om dat in et Fries te doen… De onderwarpen die an bod kommen bin de iesvoegel, de wolf en de adder. An dat dadde onderdiel warkt ok de Stellingwarver netuurkenner Andries van der Veen uut Wolvege mit. De opnaemen bin o.e. maekt in et Drents-Friese woold bi’j Appelsche.

‘Tsjek’ is op Omroep Frieslaand te zien, en begint morgens om 10.30 ure.

Kursus Laandschopsgeschiedenis Appelsche ofsleuten

door

laandsch. Appelsche

Drs. Dennis Worst (links) mit de kursisten op et ni’je Bosbargpad. (Foto: Lenus v.d. Broek)

Zaoterdagmorgen 25 april wodde de kursus Laandschopsgeschiedenis in Appelsche ofsleuten. Krek as eerder in Else en Oosterwoolde was d’r ok now weer veul belangstelling en wardering veur disse biezundere kursus. Deur goed 25 personen wodde de uut zes dagdielen bestaonde kursus volgd. De afsluting beston uut een interessaante excursie o.l.v. Jantsje Bijmholt van Staotsbosbeheer- zi’j volgde ok de kursus – en kursusleider Dennis Worst van Else. Tiedens de uut vier aovenden en twie excursies bestaonde kursus Laandschopsgeschiedenis is d’r behalven ommedaenken veur de geschiedenis van et laandschop o.m. andacht veur de netuur van et betreffende gebied; Corné Joziasse van Staotsbosbeheer was om die reden iene van de kursusleiders. De ere aovends wodden verzorgd deur drs. Dennis Worst (laandschopsgeschiedenis en geschiedenis Appelsche) en dr. Henk Bloemhoff (veldnaemen Appelsche).

De kursus Laandschopsgeschiedenis wodde opni’j organiseerd deur de Stellingwarver Schrieversronte, dit keer i.s.m. de Historische Verieninge van Appelsche e.o. Dörpen die ok interesse hebben veur disse unieke kursus kun kontakt opnemen mit de Stellingwarver Schrieversronte in Berkoop.

kursus Appelsche

Sophie Linde Bos wint fotowedstried

door

eerste pries 2015

De winnende foto van Sophie Linde Bos uut Steggerde

Sophie Linde Bos uut Steggerde  is de winner wodden van de twiejaorlikse  fotowedstried veur leerlingen van de Stellingwarver basisschoelen. De fotowedstried is een initiatief van de Stellingwarver Schrieversronte, de wedstried wodt om de twie jaor holen. De twiede pries wodde toekend an Thijs Jager van Berkoop, de dadde gong naor Anita Oosting uut Oosterwoolde. Veur basisschoele Buttinge van Oosterwoolde was d’r een eervolle vermelding. De opdracht was dit keer om een kenmarkende foto te maeken van ien van de revierties, beken, kenalen of sloden, die in Stellingwarf veurkommen. In een kotte tekst moest angeven wodden waoromme juust veur die foto keuzen wodde. Anita Oosting (groep 8, Buttingeschoele) hadde veur een mooie sfeerfoto van et broggien over de Boven-Kuunder bi’j Jardinge zorgd, wiels Thijs Jager (groep 3, de Tjongeling) prachtige, drievende tentakelachtige pompeblaeden in de Braandemeer op de foto zet had. ‘Die blaeden doen me an aliëns daenken’, vertelt Thijs. De eerste prieswinner Sophie Bos (groep 3, Triangel, Steggerde) vertelt bi’j heur mooie foto van De Lende dat et huus van heur omke vlakbi’j et reviertien in Else staot. Daoromme hebben heur heit en mem Sophie as twiede naeme Linde geven.

 

Thijs Jager

De twiede pries gong naor Thijs Jager uut Berkoop

De jury (Lenus van der Broek en Sietske Bloemhoff) vunnen een eervolle vermelding veur groep 8 van de Buttingeschoele van Oosterwoolde ok verdiend vanwegens et insturen een prachtige serie foto’s in en om Oosterwoolde.

De winnende foto’s zullen bi’jkotten publiceerd wodden in et Stellingwarfs tiedschrift De Ovend. Alle inzunnen foto’s bin te zien op de speciaole webstee veur hiemkunde in et basisonderwies www.stellingwerf-heemkunde.nl.

anita

De dadde pries gong naor Anita Oosting van Oosterwoolde

 

Et speunkruud bluuit!

door

20150421_121833

Et speunkruud is een algemiene plaante van vochtige, vruchtbere grond. Hi’j gruuit in et schaad onder bomen of struken of gewoonweg tussen et grös. De veurnaemste gruuiplakken bin in tunen en op slootkaanten. De plaante gruuit vaeke in dichte groepen, want hi’j vermeerdert him hadde mit zien okselknollegies. Pattie meensken vienen et daoromme mar ontuug. Toch starft de plaante al in de veurzoemer boven de grond of. Wat dat anbelangt kuj’ d’r mar evenpies last van hebben. De vroege blaeden bin geschikt veur de konsumptie. Ze bin onder aanderen riek an vitemine C. In de loop van de meitied wodt et gehalte gifstoffen zoe’n stok hoger dat de konsumptie dan ofraoden wodden moet.

Bron: ‘Et Stellingwarver Plaanteboek’, Henk J. Jager, Berkoop, 2006

Foto: Jaap Elzenaar